ބިންވެރިޔާ ސްކީމްގެ ދަށުން ގޯތި ނުލިބޭ މީހުންނަށް ގޯތި ލިބުނު ކަމަށް ވަގު ލިޔުންތަކެއް ތައްޔާރުކޮށް ވަގަށް ގޯތިތަކެއް ވިއްކި ކަމަށް ތުހުމަތުކުރެވޭ މައްސަލައިގައި ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ) ގެ މެނޭޖިން ޑިރެކްޓަރަކަށް ހުރި އިބްރާހިމް ފަޒުލް ރަޝީދުގެ މައްޗަށް މިހާތަނަށް އެއްވެސް ތުހުމަތެއް ނުކުރާ ކަމަށް ފުލުހުން ބުނެފި އެވެ.
މި މައްސަލަ ތިލަވުމާއެކު ޖިނާއީ ތަހުގީގެއް ފަށާފައިވާއިރު ފުލުހުންގެ ތަހުގީގާ ގުޅޭ މައުލޫމާތު ހިއްސާކުރުމަށް މިރޭ ނޫސްވެރިންގެ ބައްދަލުވުމެއް ވަނީ ބާއްވާފަ އެވެ. މިހާތަނަށް ތަހުގީގުގައި ހަ މީހަކާ ސުވާލުކޮށްފައިވާކަން ފުލުހުން ވަނީ ހާމަކޮށްފަ އެވެ.
"ފަޒުލްއަކަށް އަޅުގަނޑުމެން އަދި މިހާ ހިސާބަކަށް އެއްވެސް ތުހުމަތެއް ނުކުރަން. އެހެން ނަމަވެސް ތަހުގީގު ދާ ވަރަކުން އެއްވެސް ފަރާތަކަށް ތުހުމަތު ކުރެވޭ ކަމަށްވާނަމަ އެ ފަރާތަކާ ސުވާލުކޮށް ތުހުމަތު އިއްވާނަން," ނޫސްވެރިޔަކު ކުރި ސުވާލަކަށް ޖަވާބު ދެއްވަމުން އެސިސްޓެންޓް ކޮމިޝަނާ އޮފް ޕޮލިސް އަބްދުﷲ ޝަރީފް ވިދާޅުވި އެވެ.
މައްސަލައިގެ ތުހުމަތުވާ މީހުންގެ ޕާސްޕޯޓު ހިފަހައްޓަން ޖެހޭނަމަ އެކަން ވެސް ކުރާނެ ކަމަށް ފުލުހުން ބުނެފައިވެ އެވެ. މިހާތަނަށް އެފަދަ އެއްވެސް އަމުރެއް ނެރެފައި ނުވެ އެވެ.
މި މައްސަލައިގެ ތެރެއިން އެންމެ ބޮޑު ތުހުމަތެއް އަމާޒު ވަނީ ފަޒުލްއަށެވެ. ސަބަބަކީ އާންމުވީ ލިޔެކިޔުންތަކުގެ ތެރޭގައި އޭނާގެ ބޭބެ، އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލު ރަޝީދުގެ ބިމެއް އޮތް ކަމަށް ބުނެ ވަށާ ފާރު ރޭނުމުގެ ހުއްދައަށް އެދިފައިވާތީ އެވެ.
ވަށާ ފާރު ރޭނުމުގެ ހުއްދަ ނުދޭ ކަމަށް ފަޒުލް ތަކުރާރުކޮށް ވިދާޅުވި ނަމަވެސް މި މައްސަލައިގައި ހިމެނޭ ލޮޓް ނަމްބަރުގައި ވަށާ ފާރު ރާނާފައި ހުރި ކަން "އަދަދު" ގެ ނޫސްވެރިން ވަނީ ކަށަވަރުކޮށްފަ އެވެ.
ވަގަށް ގޯތި ވިއްކި މައްސަލައިގެ ތަހުގީގަށް ފުލުހުން ވަނީ އިއްޔެގެ ހަވީރުގެ ވަގުތެއްގައި އެޗްޑީސީއަށް ވަދެފަ އެވެ. ފުލުހުން މި މައްސަލަ ބަލަމުން ދަނީ ފޯޖުކޮށްފައި ހުރި ލިޔެކިޔުންތަކެއް ބޭނުންކޮށްގެން ގޯތިތަކެއް ހޯދި ކަމަށް ތުހުމަތުކުރެވޭތީ އެވެ.
އެންޓި ކޮރަޕްޝަން ކޮމިޝަން (އޭސީސީ) އިން ވެސް އަންނަނީ މި މައްސަލަ ތަހުގީގުކުރަމުންނެވެ.
