ކާނިވާ ސަރަހައްދުގައި އެމްޑީޕީން ބޭއްވި ޖަލްސާގައި "ތީ ބަހުލޫލެކޭ" ލަވަ ކީ ދުވާފަރު ކައުންސިލް މެންބަރު މަރިޔަމް ޔަޝްފާ ޕޮލިހަށް ހާޒިރު ވާން އަންގައިފި އެވެ.
ޔަޝްފާ މިއަދު "އަދަދު" ނޫހަށް ވިދާޅުވީ އޭނާ ހާޒިރުވާން އެންގީ ފޯނުން ގުޅާފައި ކަމަށާއި، މިއަދުގެ ވަގުތެއްގައި ޗިޓު ހަވާލު ކުރާނެ ކަމަށް ފުލުހުން ބުނި ކަމަށެވެ.
"ފުރަތަމަ ގުޅީ ދުވާފަރު ފުލުހުން. އަހަރެން ބުނިން ކޮން ކަމަކާހޭ. ހާޒިރު ކުރަނީ ކޮން ކަމެއްގައި ކަމެއް އެ ކޮޅުން ނުބުނި. ދެން ގުޅީ މާލެއިން، އަޅުގަނޑު ގާތު ބުނީ ޖަލްސާގައި ދެއްކި ވާހަކައަކާ ގުޅިގެން ކުރެވޭ ތުހުމަތެއްގައި ކަމަށް،" ޔަޝްފާ ވިދާޅުވި އެވެ.
ޔަޝްފާ މަޝްހޫރު ވެގެން ދިޔައީ ނޮވެންބަރު 11، ގައި އެމްޑީޕީގެ ދަނޑިކޮށި ޖަގަހައިގައި ވާހަކަ ދައްކަމުން ކީ ބަންޖަކަށް ފަހު އެވެ.
އެއަށް ފަހު "ތީ ބަހުލޫލެކޭ" ލަވަ އޭނާ ހުށަހެޅީ "ގާނޫނުއަސާސީގެ ދިފާއުގައި ރައްޔިތުން" ނަމުގައި ޑިސެމްބަރު 10 ވަނަ ދުވަހުގެ ރޭ ކާނިވާ ސަރަހައްދުގައި އެމްޑީޕީން ބޭއްވި ޖަލްސާގަ އެވެ.
ރީތި ރާގަކަށް ޔަޝްފާ ހުށަހެޅި "ތިއީ ބަހުލޫލެކޭ، ތިއީ ޝައިތާނެކޭ، މަށާ ކައިރި ނުވާށޭ، މަށާ ކައިރި ނުވާށޭ" ލަވަ ވަރަށް ބޮޑަށް ވައިރަލް ވެގެންދިޔަ އެވެ.
މި ސަރުކާރު އައި ފަހުން ސިޔާސީ ޕޯޑިއަމްއެއްގައި ދެއްކި ވާހަކައަކާ ގުޅިގެން ޔަޝްފާ ފިޔަވައި، އެހެން މީހަކު ޕޮލިހަށް ހާޒިރުވާން އަންގާފައެއް ނުވެ އެވެ.
މޯލްޑިވިއަން ޑިމޮކްރެޓިކް ޕާޓީގެ ސޯޝަލްމީޑިއާ އެކްޓިވިސްޓު، ހުސެއިން ޝާފިއު (ތުއްތު) އެކްސްގައި ކުރި ޕޯސްޓަކާ ގުޅިގެން ޑިސެމްބަރު 1 ގައި އޭނާ ޕޮލިހަށް ހާޒިރުކޮށް ބަޔާން ނެގި އެވެ.
ޝާފިއު ބުނީ ނޮވެމްބަރު 8، ގައި "Charlie_thuhthu" ގެ ނަމުގައި އެކްސްގައި ހިންގާ އެކައުންޓުން ކޮށްފައިވާ ޕޯސްޓަކީ އެއްވެސް މީހަކަށް ނިސްބަތްކޮށް ކޮށްފައިވާ ޕޯސްޓެއް ނޫން އެ ޕޯސްޓުގައި އެއްވެސް މީހެއްގެ ހިތުގައި ބިރުވެރިކަން އުފެދިދާނޭ ފަދަ ވާހަކައެއް ނޯންނާނެެ ކަމަށާއި އެ ޕޯސްޓުގައި ބުނާ "ކައްޒާބު" ވަކި މީހަކަށް ނިސްބަތް ކުރީ ފުލުހުން ކަމަށެވެ.
ދަނޑިކޮށި ޖަގަހައިގައި ޔަޝްފާ ކީ ބަނދި
އިމެއް ނެތޭ، މިނެއް ނެތޭ، ދިރެއް ނެތޭ، ބިރެއް ނެތޭ.
ގޮތެއް ނެތޭ، ފޮތެއް ނެތޭ، ލަދެއް ނެތޭ، ހަޔާތް ނެތޭ.
--
ރައިވަރުން އަހަރެނާ، ފައިނުމާނޭ ހަމަ ހިލާ.
އައި ކަމަކު ނިޔަތުގާ، އަނގަ ބެދޭނޭ ދޮގު ބެޔާ.
ރައިވަރުން ވާދަކޮށްލަން އައި ސޮރާ، ދޮގު ހަދަން މޮޅު ހޮޅިގަނޑާ.
ރައްޔިތުން އިނދަޖައްސާ ކުރަގަނޑާ، ރައްޔިތުން ނިކުމެ ހަވަރަށް ދެމާ.
--
