ސިޔާސީ ޕާޓީތަކުގެ ވަކިވަކި މެންބަރުން ސިޔާސީ ޕާޓީތަކުގެ ގާނޫނާ ހިލާފުވެއްޖެނަމަ އޭނާ ނިސްބަތްވާ ޕާޓީއެއް 100،000ރ. އިން ޖޫރިމަނާ ކުރެވޭގޮތަށް ގާނޫނަށް ބަދަލުގެންނަށް ސަރުކާރުން ރައްޔިތުންގެ މަޖިލީހަށް ހުށަހަޅައިފި އެވެ.
ސަރުކާރުގެ ފަރާތުން މި ބިލު މަޖިލީހަށް ހުށަހެޅުއްވީ ވެރިކަންކުރާ ޕީއެންސީގެ މެންބަރު ދިއްދޫ ދާއިރާގެ މެންބަރު އަބްދުއްލަތީފު މުހައްމަދު އެވެ. އެ ބިލުގެ ފުރަތަމަ ކިޔުން މިއަދު އޮތް މަޖިލީހުގެ ޖަލްސާގައި ވަނީ އިއްވާފަ އެވެ.
ސަރުކާރުން މި އިސްލާހު ހުށަހެޅީ ސިޔާސީ ޕާޓީތަކުން ޒިންމާ އުފުލަން ބާރުއެޅުމަށާއި، އެ ގާނޫނާ ހިލާފުވާ މިންވަރު މަދުކުރުމަށް ކަމުގައި ބިލު ހުށަހެޅުއްވި މެންބަރު ބުނެފައިވެ އެވެ.
މީގެ ކުރިން ގާނޫނު އޮތް ގޮތުން ގާނޫނާ ހިލާފުވާ ހާލަތެއްގައި އެ މީހަކު 30،000ރ. އާއި 75،000ރ. އާ ދެމެދުގެ އަދަދަކުން ޖޫރިމަނާ ކުރެވޭނެ އެވެ. ސަރުކާރުން މި މާއްދާއަށް އިތުރުކުރަން ހުށަހަޅާފައިވަނީ މި ޖޫރިމަނާގެ އިތުރުން އެ މީހަކު ނިސްބަތްވާ ޕާޓީވެސް 100،000ރ. އިން ޖޫރިމަނާ ކުރުމަށެވެ.
މީގެއިތުރުން، އިންތިހާބަކަށް ވާދަކުރުމަށް ސިޔާސީ ޕާޓީއެއްގެ ޓިކެޓު ހޯދުމަށް ޕްރައިމަރީގައި ވާދަކުރާ ފަރާތްތަކަށް ޓިކެޓު ނުލިބޭ ހާލަތެއްގައި އެ އިންތިހާބުގައި ދެން ވާދަނުކުރެވޭނެ ކަމަށް ގާނޫނުގައި އޮތް މާއްދާ އުވާލަންވެސް ސަރުކާރުން ވަނީ ހުށަހަޅާފަ އެވެ. އެ މާއްދާއަކީ ގާނޫނުއަސާސީއާ ހިލާފު މާއްދާއެއްކަމަށް މީގެ ކުރިން ދިވެހިރާއްޖޭގެ ސުޕްރީމް ކޯޓުންވެސް ވަނީ ކަނޑައަޅާފަ އެވެ. އެގޮތަށް އެ ކޯޓުން ކަނޑައެޅުއްވީ 2019 ވަނަ އަހަރު، ހ.ތިމާވެށި އަބްދުﷲ ޖާބިރު އެކޯޓަށް ހުށަހެޅި މައްސަލައެއްގަ އެވެ.
