29 އޮކްޓޯބަރު 2024 - 05:21 3
އަހުމަދު އާއިދު
ފޭދޫ ދެކުނު ދާއިރާގެ މެންބަރު އިބްރާހިމް ދީދީ: އޭނާ ވިދާޅުވީ އޭސީސީ އަދި އީސީއަށް ރައީސުން ކަނޑައެޅުމުގެ ބާރު ރައީސަށް އޮންނަން ޖެހެނީ ސަރުކާރު ބޭނުންވާ ގޮތަށް ކަންކަން ނުވާތީ ކަމަށް ---- ފޮޓޯ: މަޖިލިސް އިދާރާ
29 އޮކްޓޯބަރު 2024 - 05:21 3
އިލެކްޝަންސް ކޮމިޝަނާއި އެންޓި ކޮރަޕްޝަން ކޮމިޝަނުގެ މައްޗަށް ސަރުކާރަށް ނުފޫޒު ފޯރުވޭ ގޮތަށް, އެ ދެ ކޮމިޝަނުގެ ރައީސް އާއި ނައިބު ރައީސް އައްޔަނު ކުރުމުގެ ބާރު ރައީސުލްޖުމްހޫރިއްޔާ ދިނުމަށް ގާނޫނު ބަދަލުކުރަން ޖެހޭ އެއް ސަބަބަކީ ސަރުކާރުން ބޭނުންވާ ގޮތަށް ކޮމިޝަންތައް ނުހިންގުން ކަމަށް ފޭދޫ ދެކުނު ދާއިރާގެ މެންބަރު އިބްރާހިމްދީދީ ވިދާޅުވެއްޖެ އެވެ.
މިގޮތަށް ގާނޫނަށް އިސްލާހު ގެނައުމަށް ސަރުކާރުން މަޖިލީހަށް ހުށަހެޅި ބިލު ބަލައިގަނެ މިއަދުގެ ޖަލްސާގައި އެ ބިލަށް ދަނީ ބަހުސްކުރަމުންނެވެ. އެ ބަހުސްގެ ތެރެއިން އިބްރާހިމް ވިދާޅުވީ، ކޮމިޝަނުތަކުގެ ރައީސުންނަށް 'ރައީސް' ކީމަ އެބޭފުޅުންގެ ހައިސިއްޔަތު އޮޅޭ ކަމަށާއި ސަރުކާރާއި ރައްޔިތުން ބޭނުންވާ ކަންކަން ކޮމިޝަންތަކުގެ ނުކުރާ ކަމަށެވެ.
"ހުރިހާ ކޮމިޝަނެއް ވެސް މިގޮތަށް ބަދަލުކުރަންވީ. ރައީސް ކީމަ ހުރިހާ ކޮމިޝަންތަކުގެ ރައީސުންނަށް ހީވަނީ މިއީ އެކިއެކި ތަފާތު ގައުމުތަކުގެ ވެރިންހެން. އެބޭފުޅުން މި ކޮމިޝަންތައް ހިންގަން އުޅެނީ ދިވެހި ރާއްޖޭގެ ދައުލަތް ނުވަތަ ދިވެހި ސަރުކާރަކުން ބޭނުންވާ ނުވަތަ ދިވެހި ރައްޔިތުން ބޭނުންވާ ގޮތަކަށް ނޫން. ތިމަންނަމެން ބޭނުންވާ ގޮތަށް ހިންގަން އުޅެނީ،" އޭނާ ވިދާޅުވި އެވެ.
މިހާރު ގާނޫނު އޮތް ގޮތުން ކޮމިޝަނަށް މެންބަރުން އައްޔަންކުރަނީ ވެސް ރައީސް ބޭނުންވާ ބޭފުޅުންގެ ނަންތައް މަޖިލީހުން ފާސްކޮށްގެން ކަމަށެވެ. އެހެންކަމުން އެ ކޮމިޝަންތަކުގެ މެންބަރުން، ކޮމިޝަނުގެ ރައީސުން ހޮވުމުގެ ބަދަލުގައި ރައީސް އެ މަގާމަށް ނަން ފޮނުވުމުން މަޖިލީހުން އެ ނަން ފާސްކުރުން އެއީ އެއްވެސް މައްސަލައެއް ނޫން ކަމަށް ވެސް އިބްރާހިމް ވިދާޅުވި އެވެ.
ރައީސް ޑރ. މުހައްމަދު މުއިއްޒު އަށް ގިނަ ބާރުތަކެއް ދިނުމަށް އަބަދުވެސް ވަކާލާތުކުރަމުންދާ އިބްރާހިމް މިއަދު ވަނީ ކޮމިޝަންތަކުގެ އިތުރުން އަތޮޅު ކައުންސިލްތަކުގެ ރައީސުންނަކީ ވެސް ރައީސް އައްޔަންކުރައްވާ ބަޔަކަށް ހަދަން ގޮވާލައްވައިފަ އެވެ.
"ހަގީގަތަކީ މި ރާއްޖޭގަ މިތިބަ އަތޮޅު ކައުންސިލްތަކުގެ ވަނީ ރައީސުލްޖުމްހުރިއްޔާ އައްޔަންކުރަން. މި ބޭފުޅުންނަށް އަތޮޅު ހިންގޭތޯ. އޭރު ރައީސުލްޖުމްހުރިއްޔާ ކަތީބުން ނުވަތަ އަތޮޅު ވެރިން އައްޔަންކުރި ޒަމާނުގަ މާ ރަނގަޅެއް ނޫންތޯ އަތޮޅުތަކުގެ ކަންތައްތައް ހިނގަމުންދިޔަ ގޮތް. އޭރު އޮންނަ ސަރުކާރަކާ ގުޅިގެން ސަރުކާރުން އެދޭ ގޮތަކަށް ތަރައްގީގެ މަޝްރޫއުތަކާއި، ގައުމަށް ލިބޭ އެއްޗަކާ ނުލިބޭ އެއްޗަކާ ބަލައިގެން ނޫންތޯ އެކަންތައްތައް ކުރަމުންދިޔައީ،" އިބްރާހިމް ވިދާޅުވި އެވެ.
ނަމަވެސް، މިހާރު އަތޮޅު ވެރިންނާއި މިނިވަން މުއައްސަސާތަކުގެ ވެރިން ވެސް ދައުލަތާއި ސަރުކާރުން ބުނާ ގޮތް ނުހަދާ ކަމަށް ބުނެ އޭނާ މިއަދު ވަނީ ޝަކުވާ ކުރައްވައިފަ އެވެ. ގައުމުގެ ކަންކަން ހައްލުކުރުމަށް ގައުމުގެ ރައީސް ބޭނުންވާ މީހަކު ތަންތަނަށް އައްޔަންކުރުމުގެ ބާރު ދޭން ޖެހޭ ކަމަށާއި ރައީސް ހޮވަނީ ރައްޔިތުންގެ މެޖޯރިޓީން ކަންވެސް އޭނާ ފާހަގަކުރެއްވި އެވެ.
އޭސީސީއަށް ވެސް އޭނާ ވަރަށް ބޮޑަށް ފާޑުވިދާޅުވި އެވެ. އެގޮތުން ނިމިދިޔަ ދެ ސަރުކާރުން ކުރި "ވައްކަންތަކުގެ" އެއްވެސް މައްސަލައެއް އޭސީސީން ނުބަލާ ކަމަށާއި ކޮރަޕްޝަންގެ މައްސަލަތައް ބެލުން ފުލުހުންނާއި ހަވާލުކުރުމަށް ވެސް އޭނާ މިއަދު ވަނީ ގޮވާލައްވާފަ އެވެ. އަދި އޭސީސީން ބަލަން ޖެހޭނީ ފުލުހުން ހަވާލުކުރާ މައްސަލަތައް އެކަނި ކަމަށް ވެސް އޭނާ ވިދާޅުވި އެވެ.
0.00%
0.00%
0.00%
0.00%
މި ލިޔުން ކިޔާލުމުން
މި ލިޔުމާ ގުޅޭ ލިޔުންތައް
ބެއްޔާގެ ދަރި
5 months ago
ބައްލަވާ މެންބަރު. މިނިވަން މުއައްސަސާތަކޭ ކިޔަނީ ކޮންމެ ވެސް ކަމަކު. އެ ތަންތަން ހިންގަންޖެހޭނީ ރައީސުލްޖުމްހޫރިއްޔާ ނޫނީ ސަރުކާރު ކޮންމެހެން ބޭނުންވާ ގޮތަކަށް ނޫން. ލިޔެފައި އޮތް ގާނޫނާއި ގަވާޢިދުގެ ތެރެއިން. އެ ކަންކަމާ ހިލާފަށް ހިންގާ ނަމަ މިހާރު ވެސް އޮވޭ ތިޔަ ބޭފުޅުންނަށް އެކަަންކަން ބަލައި ފިޔަވަޅު އެޅުމުގެ ބާރު. އޭގެ ބަދަލުގައި ވަކި އެކަކަށް އެ ބާރުތައް ދޫކޮށްލުމަކީ ހުދުމުހުތާރު ގޮތެއް. ހާޢްސަކޮށް ހައްގުތަކާ ގުޅޭ ކަންކަމުގައި
ސައިޚް
5 months ago
މިވަރުގެ ގަމާރު، ގާނޫނު އަސާސީގެ އެއްމެ އަސީކަންކަން ނޭންގޭ މީހުން ގާނޫނުހަދަން މަޖިލީހައްވެއްދީމަ ވާނީ މިހެން، ބޮޑު އަނގައަކާ، ގޮތެއްފޮތެއް ބަލާނުލާ ވާހަކަ ދައްކަން އެނގުމަކީ އަދި ފުރިހަމަ ވީކީ ނޫން، މިކަން ހުއްޓުވަންޖެހޭ،
ވޯލް
5 months ago
ކޮމިޝަން އަކީ ސަރުކާރުން ބޭނުންވާގޮތަށް ހިންގަން ހަދާފަ ހުންނަ ތަންތަނެއް ނޫން. ދެން މާދަން ގޮސް ކޯޓުތައް އުވާލާފަ މނިނިސްޓްރީ އޮފް ޖަސްޓިސް އުފައްދަންވީ އެންނު. ކައުންސިލްތައް އުވާލާފަ މިނިސްޓްރީ އޮފް ސިޓީސް ކިޔާ ބޭކަރު މިނިސްޓްރީއެއް އުފައްދާގެން ތިޔަ އުޅެނީ.
Comment