އަލަށް ފާސްކުރި ލޭންޑް ޔޫސް ޕްލޭނުގެ ދަށުން ގުޅީފަޅުގެ ލޮޓު ނަންބަރުތަކުގެ ތަފުސީލު ހިޔާވަހި ޕޯޓަލަށް ހައުސިން މިނިސްޓަރީން އަޕްލޯޑު ކޮށްފި އެވެ.

އެ މިނިސްޓަރީން މިއަދު ކުރި އިއުލާނެއްގައި ބުނީ އަލަށް ފާސްކުރި ގުޅީފަޅުގެ ލޭންޑް ޔޫސް ޕްލޭނާއި ލޮޓް އެލޮކޭޝަން ޕްލޭންގެ ތަފުސީލުތައް ހިޔާވެހި ޕޯޓަލުން ފެންނާނެ ކަމަށެވެ.

ހިޔާވަހި ޕޯޓަލަށް އަޕްލޯޑު ކޮށްފައިވާ ތަފުސީލުގައި އެކި ބޮޑުމިނުގެ ގޯއްޗަށް ދީފައި ހުރީ އެކި ކުލަ އެވެ. ހައުސިން މިނިސްޓަރީން ބުނީ އެ ހުރިހާ ކެޓެގަރީތަކެއްގެ ގުރުނެގުން ވެސް ދާނީ ވަކީން ކަމަށެވެ. އެގޮތުން ކޮންމެ ކެޓެގަރީއަކަށް ހާއްސަ ފޮށިތަކެއް ބެހެއްޓިފައި ހުންނާނެ ކަމަށް އެ މިނިސްޓަރީން ބުންޏެވެ.

ހައުސިން މިނިސްޓަރީން އާންމުކޮށްފައިވާ ލޮޓް ނަންބަރުތަކުގެ ތަފުސީލު

ގުޅީފަޅުން ގޯތި ލިބުނު މީހުންގެ މެދުގައި ގުރުއަތު ނެގުން އޮތީ އަންނަ އަންގާރަ ދުވަހުގެ ހެނދުނު 9:00 އިން ފެށިގެން ދަރުބާރުގޭގަ އެވެ.

ހައުސިން މިނިސްޓަރީން ބުނީ ގުރު ކަރުދާސްކޮޅު ނެގުމަށްފަހު އޭގައިވާ ބާކޯޑު ވަގުތުން ސްކޭން ކުރާނެ ކަމަށާއި ސްކޭން ކުރުމާއެކު ގުރުނަގާ މާލަމުގައި ބަހައްޓާފައި ހުންނަ ސްކްރީނުން ފޯމު ނަންބަރާއި ލިބުނު ބިމުގެ ތަފުސީލު ފެންނާނެ ކަމަށެވެ. އަދި އެސްއެމްއެސްގެ ޒަރިއްޔާއިންނާއި ހިޔާވަހި ޕޯޓަލުން ވެސް ބިމުގެ ތަފުސީލު ފެންނާނެ ކަމަށް ހައުސިން މިނިސްޓަރީން ބުންޏެވެ.

ގުރު ނެގުން ކުރިއަށް ގެންދާނީ ހައުސިން މިނިސްޓަރީން ކުރިން އިއުލާނު ކުރި ލިސްޓުގައިވާ ތަރުތީބުން ކަމަށް އެ މިނިސްޓަރީން ބުންޏެވެ. ނަމަވެސް ގުރު ނަގަން މީހަކު ހާޒިރު ނުވެއްޖެ ނަމަ، ފޯމު ނަންބަރާއި ލިސްޓުގައި ހިމެނޭ ނަމާއި އައިޑީ ކާޑު ނަންބަރު ގޮވުމަށްފަހު ހައުސިން މިނިސްޓަރީގެ މުވައްޒަފަކު ގުރު ނެގުމަށްފަހު ކުރިއަށް ގެންދާނެ ކަމަށް އެ މިނިސްޓަރީން ބުންޏެވެ.