ރާއްޖޭގެ ދެ ވަނައަށް އެންމެ ބޮޑު ސިޔާސީ ޕާޓީ، ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ގެ ނައިބު ރައީސްގެ މަގާމަށް ފޮރިން މިނިސްޓަރު ޑރ. އަބްދުﷲ ހަލީލު އަދި ޕާޓީގެ ސެކްރެޓަރީ ޖެނެރަލްގެ މަގާމަށް އައިޖީއެމްއެޗް ގެ ސީއީއޯ އިބްރާހިމް އަބްދުއްރައްޒާގު ހަލީމް މިއަދު އައްޔަންކޮށްފި އެވެ.
އެ މަގާމަށް އެ ދެ ބޭފުޅުން އައްޔަންކުރީ މިހާރު ކުރިއަށްދާ ޕީޕީއެމްގެ ސެނެޓުގެ ކުއްލި ބައްދަލުވުމެއްގަ އެވެ. އެ ބައްދަލުވުމުގެ ރިޔާސަތު ބަލަހައްޓަވަމުން ގެންދަވަނީ މި ދެބޭފުޅުންގެ އިތުރުން އެ ޕާޓީގެ ނައިބު ރައީސްއެއް ކަމަށްވާ ޑިފެންސް މިނިސްޓަރު މުހައްމަދު ގައްސާން މައުމޫން އެވެ.
އެ ބައްދަލުވުމުގެ އެޖެންޑާގައި އޮތީ ޕީޕީއެމް އުވާލަން ނިންމުން ކަމަށް ބައެއް ސެނެޓަރުން "އަދަދު" ނޫހާ ވާހަކަ ދައްކަމުން ބުނެފައިވެ އެވެ.
މި ސަރުކާރުގެ އިސް މަގާމެއްގައި ހުންނެވި ބޭފުޅަކު ބައެއް ސެނެޓަރުންނަށް ފޯނުން ގުޅުއްވައި ޕީޕީއެމް އުވައިލުމަށް ވޯޓު ދިނުމަށް ވެސް އެދިވަޑައިގެންފައިވާ ބައެއް ސެނެޓަރުން ބުންޏެވެ.
ޕީޕީއެމް އުވައިލުމުގެ މަސައްކަތް ފެށީ ރައީސް ޑރ. މުހައްމަދު މުއިއްޒު އާއި ޕީއެންސީގެ ޗެއާޕާސަން އަބްދުއްރަހީމް އަބްދުﷲ ބޭނުންފުޅުވެގެން ކަމަށް، އެކަމާ ގުޅޭ ގޮތުން މި ނޫހާ އެއިރު ވާހަކަ ދެއްކި ޕީޕީއެމް/ޕީއެންސީގެ މެންބަރުން ވިދާޅުވި އެވެ.
ޕީޕީއެމްގެ ހިންގާ ގަވާއިދުގައި ބުނެފައިވާ ގޮތުން އެ ޕާޓީ ހިންގުމަށް ދަތިވާ މިންވަރަށް ޕާޓީ ގެ މާލީ ހާލަތު ދަށްވެ، ޕާޓީގެ ލީޑާޝިޕުން، ސެނެޓަށް ހުށަހަޅައި އެކަން ދިރާސާ ކުރުމަށް ފަހު ޕާޓީ އުވައިލަން ޖެހޭ ކަމަށް ސެނެޓުގެ ހަތަރު ބައިކުޅަ ތިންބައިގެ އަގުލަބިއްޔަތުން ފާސްކޮށްފި ނަމަ ޕާޓީ އުވާލެވިދާނެ އެވެ.
ޕާޓީ އުވާލެވޭ ހާލަތެއްގައި ޕާޓީގެ ފައިސާ އާއި މުދާ ބޭނުންކޮށްގެން ދަރަނި އަދާކުރުމަށް ފަހު ބާކީ ހުރި އެއްޗެއް ހަދިޔާ ކުރަންވާނީ، ރާއްޖޭގައި ރަޖިސްޓަރީ ކޮށްފައިވާ ސެނެޓުން ކަނޑައަޅާ ހައިރާތު ފަންޑަކަށެވެ.
