ހުރިހާ ސިޔާސީ ޕާޓީތަކެއް އެކުލެވޭ އިންތިގާލީ ސަރުކާރެއް އެކުލަވާލަން ކުރީގެ ރައީސް މުހައްމަދު ނަޝީދު މިއަދު ގޮވާލައްވައިފި އެވެ.
ނަޝީދު އެކްސް ގައި ކުރެއްވި ޕޯސްޓެއްގައި ވިދާޅުވީ އިންތިގާލީ ސަރުކާރެއް އެކުލަވާލަން ޖެހެނީ ބޭނުންޖެހިފައިވާ އެކި އިސްލާހުތައް ގެނައުމުގެ އިތުރުން މިނިވަން އިންސާފުވެރި އިންތިހާބެއް ބޭއްވުމަށް ކަމަށެވެ.
"ބޭނުން ޖެހިފައިވާ އަސާސީ، އޮނިގަނޑުގެ އިސްލާހުތައް ގެނައުމަށާއި، މިނިވަން، އިންސާފުވެރި އިންތިހާބެއް ރާވައި ހިންގަން ހުރިހާ ޕާޓީއެއް އެކުލެވޭ އިންތިގާލީ ސަރުކާރެއް އެކުލެއްވުމަށް ގޮވާލަން،" ނަޝީދު ކުރެއްވި ޕޯސްޓުގައި ވިދާޅުވި އެވެ.
ނަޝީދު ވިދާޅުވީ މުހައްމަދު މުއިއްޒުގެ އިތުބާރު ކެބިނެޓަށް ގެއްލިފައިވާ ކަމަށެވެ. އަދި މުއިއްޒުގެ މައްޗަށް ރައްޔިތުންގެ އިތުބާރު ވެސް ގެއްލިފައިވާ ކަމަށެެވެ.
މީގެއިތުރުން މި ދަނޑިވަޅުގައި ހަނގުރާމައިގެ ނޭދެވޭ އަސަރު ވެސް ރާއްޖޭގެ އިގްތިސޯދަށް ކުރަމުންދާކަން ނަޝީދު ފާހަގަކުރެއްވި އެވެ.
ނަޝީދު މިހެން ވިދާޅުވީ ސަރުކާރުގެ ޖުމްލަ 10 މިނިސްޓަރުން މިއަދު އިސްތިއުފާ ދެއްވުމާ ގުޅިގެންނެވެ. އެ މިނިސްޓަރުން މަގާމުން އިސްތިއުފާ ދެއްވީ އިސްލާހަށް ފުރުސަތު ދެއްވުމަށް ކަމަށް ރައީސް އޮފީހުން ބުންޏެވެ.
މިއަދު ކެބިނެޓުން ވަކިވި މިނިސްޓަރުން
1- މިނިސްޓާ އޮފް ޑިފެންސް މުހައްމަދު ޣައްސާން މައުމޫން
2- މިނިސްޓަރ އޮފް ފޮރިން އެފެއާޒް އަބްދުﷲ ހަލީލް
3- މިނިސްޓަރ އޮފް ހެލްތް އަބްދުﷲ ނާޒިމް
4- މިނިސްޓަރ އޮފް ޓޫރިޒަމް އެންޑް އެންވަޔަރަންމަންޓް ޠާރިޤު އިބްރާހީމް
5- މިނިސްޓަރ އޮފް ސޯޝަލް އެންޑް ފެމިލީ ޑިވެލޮޕްމަންޓް އައިޝަތު ޝިހާމް
6- މިނިސްޓަރ އޮފް ދިވެހި ލެންގުއޭޖް އާދަމް ނަސީރު އިބްރާހީމް
7- މިނިސްޓަރ އޮފް އެގްރިކަލްޗާ އެންޑް އެނިމަލް ވެލްފެއާ މަރްޔަމް މާރިޔާ
8- މިނިސްޓަރ އޮފް ޔޫތު، އިންފޮމޭޝަން އެންޑް އާޓްސް އިބްރާހީމް ވަހީދު
9- މިނިސްޓަރ އޮފް ސިޓީސް އާދަމް ޝަރީފު އުމަރު
10- މިނިސްޓަރ އޮފް ހަޔާ އެޑިޔުކޭޝަން، ލޭބާ އަލީ ހައިދަރު
ސަރުކާރުގެ މިނިސްޓަރުންތައް މިއަދު ވަކިކޮށްފައި މިވަނީ ނިމިދިޔަ ލޯކަލް ކައުންސިލް އިންތިހާބުގައި ސަރުކާރު ހިންގާ ޕީއެންސީ ބޮޑު ނާކާމިޔާބީއަކާ ކުރިމަތިލާފައި ވަނިކޮށެވެ.
ކައުންސިލް އިންތިހާބާއެކު ނެގި ފެންނަ ނުފެންނަ ވޯޓުން ވެސް ސަރުކާރުން ހުށަހެޅި ދެ އިންތިހާބު އެއްކޮށްލުމާ ގުޅޭ ހުށަހެޅުމަށް ވެސް ބޮޑުތަނުން ރައްޔިތުން ވަނީ ނޫނެކޭ ބުނެފަ އެވެ.
