ދެކުނު ކޮރެއާގެ ކުންފުންްޏެއް ކަމަށްވާ، ޓީކުއިން ކޮންސްޓްރަކްޝަން ކޯ ލިމިޓެޑް އަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ދައްކަން ޖެހޭ ތިން މިލިއަން ތިން ލައްކަ އަށްޑިހަ ދެހާސް ޑޮލަރު (ފަންސާސް ދެ މިލިއަން އެއް ލައްކަ ފަންސާސް ހާސް ހަތަރު ސަތޭކަ ސާޅީސް ރުފިޔާ) ދައްކަން ސިވިލް ކޯޓުން އިއްޔެ ހުކުމްކޮށްފި އެވެ.
ސިވިލް ކޯޓުން އިއްޔެ ކުރި ހުކުމްގައި ބުނެފައިވަނީ، އެފްއޭއެމް އާއި ޓީކުއިން ކޮންސްޓްރަކްޝަން ދެމެދުގައި، 20 މާޗް 2021 ގައި، އެއްބަސްވުމެއް ގާއިމްކުރެވުނު ކަމަށެވެ.
ވެވުނު، އެ އެއްބަސްވުމުގެ ދަށުން ވިލިމާލެ އާއި ހުޅުމާލޭގައި ތަރައްގީ ކޮށްފައިވާ ފުޓްބޯޅަ ދަނޑުތަކުގެ އަގުތަކުގެ ގޮތުގަޔާއި ހުޅުމާލޭގައި ކުރެވިފައިވާ ރީކޮންސްޓްރަކްޝަންގެ މަސައްކަތުގެ އަގުގެ ގޮތުގަޔާއި އެފްއޭއެމް އިން އަންގައިގެން ގެނެވުނު ބަދަލުތަކުގެ އަގު އަދި މި މައްސަަލައިގެ ތެރޭގައި، ގާނޫނީ ކަންކަން ފުރިހަމަ ކުރަން ހިނގި ހަރަދުތަކުގެ ގޮތުގައި، ޓީކުއިން ކޮންސްޓްރަކްޝަން އިން ހުށަހެޅީ، އެފްއޭއެމް އަތުން ފަސް މިލިއަން، ނުވަ ލައްކަ އެގާރަ ހާސް ދުއިސައްތަ ޑޮލަރު ހޯދުމަށެވެ.
އެފްއޭއެމް އިން ހުޅުމާލޭގައި ފުޓްބޯޅަ ސްކޫލް އެޅުމަށް ހޯދި ބިން: އެ ބިން މިހާރު ވަނީ އެޗްޑީސީން އަތުލައިފައި: މިއީ ފުޓްބޯޅަ ސްކޫލާ އެކު ޓާފް ދަނޑުތަކެއް އަޅަން ނިންމި ބިމެއް.--- ފޮޓޯ: އަދަދު
އެކަމަކު، މައްސަލަ ނިންމިއިރު، ކޯޓުން އެންގީ، ތިން މިލިއަން ތިން ލައްކަ އަށްޑިހަ ދެހާސް ޑޮލަރު (ފަންސާސް ދެ މިލިއަން އެއް ލައްކަ ފަންސާސް ހާސް ހަތަރު ސަތޭކަ ސާޅީސް ރުފިޔާ) މި މަހު އެއް ވަނަ ދުވަހުން ފެށިގެން، އެއް މަސް ތެރޭ ސިވިލް ކޯޓަށް ދައްކާ ހަލާސްކުރުމަށެވެ.
އެފްއޭއެމްގެ މާލީ ގިނަ މައްސަލަތަކެއް ފެންމަތިވެފައިވާއިރު، ދުނިޔޭގެ މައި ފުޓްބޯޅަ އިދާރާއިން ވަނީ އެފްއޭއެމް ހިންގުން ނޯމަލައިޒިން ކޮމިޓީއަކާ މިދިޔަ އޮގަސްޓް މަހު ހަވާލުކޮށްފަ އެވެ.
އެ ކޮމިޓީގެ މަސައްކަތް ފެށިތާ، މަހެއްހާ ދުވަހުން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން، ކޮމިޓީގެ ޗެއާމަން، އަހުމަދު ޒުހޫރު ވިދާޅުވީ، މި ވަގުތު، ލިޔެކިޔުމުން ފެންނަން ހުރި ދަރަންޏަށް ބަލާއިރު އުޅެނީ 30-35 މިލިއަން ރުފިޔާގެ ދެމެދުގައި ކަމަށެވެ. އެކަމަކު، ހުރިހާ ކަމެއްގެ މައުލޫމާތަށް ބަލާއިރު، ޖުމްލަ ދަރަނި، 85 މިލިއަން ރުފިޔާ އަށް ވުރެ އިތުރުވުމުގެ ފުރުސަތު އެބައޮތް ކަމަށް ވެސް ވިދާޅުވި އެވެ.
އެފްއޭއެމް އިން ފައިސާ ދޭން ޖެހޭ ފަރާތްތަކާ ވާހަކަ ދައްކައިގެން، ދަރަނީގެ ކަންކަން ރީސްޓްރަކްޗާ ކުރުމުގެ މަސައްކަތް ނޯމަލައިޒިން ކޮމިޓީން ކުރަމުން އަންނަ ކަމަށް ވިދާޅުވި އެވެ.
އެފްއޭއެމްގެ ފައިސާ އަށް ހިޔާނާތްތެރިވެފައިވާތީ އާއި މަނީ ލޯންޑަރިންގެ ތުހުމަތުގައި، އެފްއޭއެމްގެ ކުރީގެ ރައީސް ބައްސާމް އަދީލް ޖަލީލްގެ މައްޗަށް ވަނީ ދައުވާކޮށްފަ އެވެ. އަދި ފީފާ އިން އެފްއޭއެމް އަށް ދިން ކޮވިޑް ލޯނުން، ބައްސާމް ވަނީ އަމީން އެވެނިއު އިން ދެ ޕެންޓް ހައުސް ގަނެފަ އެވެ. އެ ދެ ޕެންޓް ހައުސް ފުލުހުންގެ ބެލުމުގެ ދަށަށް ގެނައުމުގެ މަސައްކަތް ވަނީ ފަށައިފަ އެވެ.
