ހިއުމަން ރައިސްޓްސް ކޮމިޝަން (އެޗްއާރުސީއެމް) ގެ ހުސްވެފައިވާ މެންބަރުކަމަށް އިލެކްޝަންސް ކޮމިޝަން (އީސީ) ގެ ކުރީގެ ނައިބު ރައީސް އިސްމާއިލް ހަބީބު އައްޔަނުކުރުމަށް ރައްޔިތުންގެ މަޖިލީހުން މިއަދު ރުހުން ދީފި އެވެ.
އެޗްއާރްސީއެމްއަށް ހަބީބް އައްޔަން ކުރަން ރުހުންދޭން މަޖިލީހުން ފާސްކުރީ މަޖިލީހުގެ މިއަދުގެ ޖަލްސާގައި އެކަމަށް ނެގި ވޯޓުގައި ބައިވެރިވެ ވަޑައިގެންނެވި 76 މެންބަރުންގެ ތެރެއިން 73 މެންބަރުން ވޯޓު ދެއްވައިގެންނެވެ. އޭނާއަށް ރުހުން ދޭން ނުފެންނަ ކަމަށް ވޯޓުދެއްވީ ތިން މެންބަރެކެވެ.
ހަބީބަށް ރުހުން ދޭން ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑާ ކޮމިޓީން އިއްޔެ ފާސްކުރީ އޭނާއާ އިންޓަވިއު ކުރުމަށް ފަހުގަ އެވެ. އެ އިންޓަވިއުގައި އޭނާއަށް 75 ޕަސެންޓުން މަތިން މާކްސް ލިބިވަޑައިގަތެވެ.
އެޗްއާރުސީއެމްގެ ގޮނޑިއެއް ހުސްވީ އެ ކޮމިޝަނުގެ ނައިބު ރައީސް ޑރ. އަހުމަދު އަދުހަމް އަބްދުالله އިސްތިއުފާ ދެއްވުމުންނެވެ. އެ މަގާމަށް ކުރިމަތިލުމުގެ ފުރުސަތު ރައީސް އޮފީހުން ތިން ފަހަރެއްގެ މަތިން ހުޅުވާލި އެވެ. ފުރަތަމަ ކުރި އިއުލާނުތައް ބާތިލުކުރީ އެކަށީގެންވާ ވަރަށް މީހުން ކުރިމަތިނުލާތީ އެވެ.
ހަބީބު ވޭތުވެދިޔަ 10 އަހަރު ހުންނެވީ އީސީގެ މެންބަރެއްގެ ގޮތުގަ އެވެ. އެންމެ ފަހުން ހުންނެވީ އެ ކޮމިޝަނުގެ ނައިބު ރައީސްގެ މަގާމުގަ އެވެ. ނިމިދިޔަ ރިޔާސީ އިންތިހާބުގައި ވެސް އޭނާ ހުންނެވީ އެ މަގާމުގަ އެވެ.
އީސީގެ ގާނޫނު ބުނާ ގޮތުން ކޮމިޝަނުގެ މެންބަރަކަށް ގިނަ ވެގެން ފުރިހަމަ ކުރެވޭނީ ދެ ދައުރެވެ. އީސީއަށް ހަބީބު ފުރަތަމަ އައްޔަންކުރީ މާޗު 13، 2014 ގަ އެވެ. ދެވަނަ ދައުރަކަށް އައްޔަންކުރީ މާޗު 13، 2019 ގަ އެވެ.
