އޮލިމްޕިކްސް އަކަށް ކޮލިފައިވި ފުރަތަމަ ދިވެހި އެތުލީޓުގެ މަގާމު ހޯދުމަށް ފަހު، ޓޭބަލް ޓެނިސް ތަރި ފާތިމަތު ދީމާ އަލީ، ރާއްޖެ އައުމާ އެކު، އޭނާ އަށް ޝަރަފްވެރި ހާއްސަ މަރުހަބާއެއް ކިޔައިފި އެވެ.
ދީމާ އާއި އޮލިމްޕިކްސް ކޮލިފިކޭޝަނުގައި ވާދަކުރި ރާއްޖޭގެ ޓީމަށް އެއާޕޯޓުން މަރުހަބާ ކިޔުމުގައި، ސްޕޯޓްސް މިިނިސްޓަރު އަބްދުﷲ ރާފިއު (ރާއްޕެ) އާއި އޮލިމްޕިކް ކޮމިޓީގެ ރައީސް މުހައްމަދު އަބްދުއްސައްތާރު (ޗަމްޕީ) އަދި ޓީޓީ އެސޯސިއޭޝަންގެ ރައީސް އަލީ ރަޝީދު (އައްޔަ) ބައިވެރިވެވަޑައިގެންނެވި އެވެ.
އެއާޕޯޓުގައި ބޭއްވި މަރުހަބާ އިވެންޓަށް ފަހު، ދީމާގެ ޝަރަފްގައި ސޯޝަލް ސެންޓަރުގައި ބޭއްވި ހާއްސަ އިވެންޓްގައި އެކި ކުޅިވަރުތަކުގެ ގައުމީ ޓީމުތަކުގެ ކުޅުންތެރިންނާއި އެސޯސިއޭޝަންތަކުގެ ވެރިން ބައިވެރިވެފައިވެ އެވެ.
މިއަދު ބޭއްވި އިވެންޓްގެ ތެރެއިން ދީމާ.--
މި އިވެންޓްގައި ވާހަކަދައްކަވަމުން، ޓީޓީ ރައީސް، އަލީ ވިދާޅުވީ، މިއަދަކީ ރާއްޖޭގެ ކުޅިވަރު އެހެން ހަރުފަތަކަށް ގެންދިއުމުގައި ޓީޓީ އަށް ތާރީހީ ދުވަހެއް ކަމަށެވެ.
"މިހާތަނަށް ރާއްޖޭގައި ކޮމްޕެޓިޝަނެއްގައި ބައިވެރިވެގެން ކޮލިފައިވި ފުރަތަމަ ކުޅުންތެރިއަކަށް މިވީ ދީމާ. ހާއްސަކޮށް ދީމާ އަށް ޝުކުރުދަންނަވަން،" އަލީ ވިދާޅުވި އެވެ.
"ކޮންމެ ކަމެއްވެސް އަސްލު އެޗީވްވާނީ ވަރަށް މަސައްކަތް ކޮށްގެން. އަޅުގަނޑުމެން ވެދާނެ 10 ވަރަކަށް އަހަރު އަނެއް ހާއްސަކޮށް ދީމާ އަށް ފޯކަސް ކޮށްގެން، ރާއްޖޭގެ ސަރުކާރާއި ސްޕޯޓްސް މިނިސްޓަރު އަދި އޮލިމްޕިކް ކޮމިޓީއާ އެކު ވެސް އަޅުގަނޑުމެން، މަސައްކަތްކޮށް، ކްރޮއޭޝިއާ އާއި ޗައިނާ އަށް ގޮސް، އެކިއެކި ގައުމުތަކާ ގުޅިގެން މަސައްކަތް ކުރާތީ، އޭގެ ސަަބަބުން މި ފުރުސަތު ލިބުނީ،" އަލީ ވިދާޅުވި އެވެ.
މި އިވެންޓްގައި ވާހަކަ ދައްކަވަމުން، މިނިސްޓަރު ރާފިއު އާއި އޮލިމްޕިކް ކޮމިޓީގެ ރައީސް ސައްތާރު ވެސް ވަނީ ދީމާ މި ކަން ހާސިލްކުރަން ކުރި ބުރަ މަސައްކަތުގެ އަގުވަޒަންކޮށްފަ އެވެ. އަދި މި ކަން ހާސިލްވުމުގައި، ހާއްސަކޮށް ދީމާގެ މައިންބަފައިންނާއި ދީމާ އަމިއްލަ އަށް ކުރި އަގުނުކުރެވޭ ބުރަ މަސައްކަތުން އިބްރަތް ހާސިލްކުރަން ޖެހޭ ކަމަށް ވިދާޅުވި އެވެ.
މީގެ ކުރިން ރާއްޖެ އަށް މުޅިން ވެސް އޮލިމްޕިކްސް އިން ފުރުސަތު ލިބިފައިވަނީ، ކޮލިފައިނުވާ ގައުމުތަކުގެ ތެރެއިން ލިބޭ އިންވިޓޭޝަނަލް (ޓްރައިޕާޓައިޓް)ގެ ފުރުސަތެވެ. އެކަމަކު، ދީމާ މި ވަނީ ކޮލިފިކޭޝަން ބުރެއް ފަހަނައަޅައި ގޮސް ދުނިޔޭގެ އެންމެ ބޮޑު ކުޅިވަރު މުބާރާތުން ފުރުސަތު ހޯދައިފަ އެވެ.
ދީމާ އަކީ، މޯލްޑިވްސް އޮލިމްޕިކް ކޮމިޓީން ދިން ޕެރިސް އޮލިމްޕިކްސް ސްކޮލަޝިޕް ލިބުނު އެތުލީޓެކެވެ. އަދި މިދިިޔަ ސަރުކާރުން ފެށި އަރުތަ ޕްރޮގްރާމްގެ ތެރެއިން ވެސް ދީމާ އަށް ޓްރެއިނިންގެ ފުރުސަތުތައް ދީފައިވެ އެވެ.
