ކަނޑާއި ވައިގެ ސަރަހައްދު ބަލަހައްޓަން އެމްއެންޑީއެފްއަށް ގެނެސްފައިވާ ޑްރޯންތައް ގަންނަން ތުރުކީއާއެކު ވީ އެއްބަސްވުމާއި ޑްރޯންތަކުގެ ތަފުސީލު ދިނުމަށް، ޑިފެންސް މިނިސްޓަރު ގައްސާން މައުމޫން ހާޒިރުކުރާ 241 ކޮމިޓީގެ ބައްދަލުވުން ސިއްރުކުރަން އެ ވުޒާރާއިން އެދުމުން އެގޮތަށް ފާސްކޮށްފި އެވެ.
މިއަދު ބޭއްވި އެ ކޮމިޓީގެ ބައްދަލުވުމުގައި ޑިފެންސް މިނިސްޓްރީން ފޮނުވި ސިއްރު ސިޓީއެއް ވަނީ ކޮމިޓީގެ މެންބަރުންނަށް ހުށަހަޅާފައިވެ އެވެ. އަދި އެ ސިޓީގައި ޑްރޯންތަކުގެ މަރުކާ އަދި އުފެއްދި ކުންފުނީގެ ނަން އޮތް ނަމަވެސް އިތުރު މައުލޫމާތު ދެވޭނީ ކޮމިޓީގެ ސިއްރު ބައްދަލުވުމެއްގައިކަމަށް ބުނެފައިވާ ކަމަށް ކޮމިޓީގެ މުގައްރިރު، ހަނިމާދޫ ދާއިރާގެ މެންބަރު އަބްދުލްގަފޫރު މޫސާ ވިދާޅުވި އެވެ.
އެގޮތުން ސިއްރު ބައްދަލުވުމުގައި ދެވޭނެ ކަމަށް ބުނެފައިވާ މައުލޫމާތުގެ ތެރޭގައި ޑްރޯންތައް ގަތް އަގުވެސް ހިމެނޭ ކަމަށްވެ އެވެ. ސިޓީގައިވާ ކަމަށް މުގައްރިރު ވިދާޅުވި މައުލޫމާތު ތަކަކީ ޕަބްލިކް ޑޮމައިންގައި ލިބެންހުރި މައުލޫމާތުތަކެކެވެ.
ޑްރޯންތަކުގެ ތަފުސީލުތައް މަޖިލީހުގެ ތަޅުމުގައި ދޭން ދެކޮޅު ހަދާ، އެ ތަފުސީލުތައް ހާމަކުރައްވާނީ 241 ކޮމިޓީގެ ސިއްރު ބައްދަލުވުމެއްގައި ކަމަށް ގައްސާން ވަނީ މާޗު 26 ގައި މަޖިލީހުގައި ހުންނަވާ ވިދާޅުވެފަ އެވެ.
މިނިސްޓަރު އަދި ވުޒާރާއިން ފޮނުވި ސިޓީގައި އެދިފައިވާ ގޮތަށް މި މައްސަލާގައި ދެން ބާއްވާ ބައްދަލުވުން ސިއްރުކުރަން ހުށަހެޅީ ފުވައްމުލަކު މެދު ދާއިރާގެ މެންބަރު ހުސައިން މުހައްމަދު ދީދީ އެވެ. އޭނާގެ ހުށަހެޅުއްވުމަށް ހުޅުމާލެ ދާއިރާގެ މެންބަރު އަލީ ނިޔާޒު ތާއީދުކުރެއްވިއިރު، އެ ހުށަހެޅުން ފާސްވީ މިއަދުގެ ބައްދަލުވުމުގައި ބައިވެރިވި މެންބަރުންގެ އަގުލަބިއްޔަތުންނެވެ.
މި ހިނގާ މާޗް 15، ގައި ނ. މާފަރުގައި ބޭއްވި ހާއްސަ ހަފުލާއެއްގައި ތުރުކީގެ ޑްރޯންތައް ފުރަތަމަ ފަހަރަށް ދައްކާލީ ރައީސް ޑރ. މުހައްމަދު މުއިއްޒެވެ. އެ ރޭގެ ހަފުލާގައި ޖުމްލަ ތިން ޑްރޯނެއް ފެނުނެވެ.
ޑްރޯން ގަތުމުގެ އެއްބަސްވުމާ ގުޅޭގޮތުން "އަދަދު" އިން ވާނީ އިތުބާރު ހުރި މަސްދަރުތަކާ ހަވާލާދީ އެ އެއްބަސްވުމުގެ އަގަކީ 37 މިލިއަން ޑޮލަރު (570 މިލިއަން ރުފިޔާ) ކަމަށް ރިޕޯޓުކޮށްފަ އެވެ. ސަރުކާރުން ގަނެފައިވަނީ ޑްރޯންތަކަކީ ތުރުކީގެ ބައިކާރު ކުންފުނިން އުފައްދާ ބައިރަކުތާރު ޓީބީ-2 ޑްރޯންތަކެކެވެ.
ނަމަވެސް ޑްރޯންތައް އިފުތިތާހު ކުރުމަށް ބޭއްވި ޖަލްސާގައި ވާހަކަ ދައްކަވަމުން ރައީސް ވަނީ އޭގެ ތެރެއިން ގިނަ އާލާތްތަކަކީ ތުރުކީގެ ސަރުކާރުގެ ހިލޭ އެހީގެ ދަށުން ދީފައިވާ ތަކެތި ކަމަށެވެ.
"ރައްޔިތުން އަޅުގަނޑާ ޒިންމާ ހަވާލުކޮށް ދެ ހަފުތާ ނުވަނީސް އެ ގައުމަށް އަޅުގަނޑަށް ދައުވަތު ދެއްވާ، އެމަނިކުފާނު އަޅުގަނޑަށް ކިޔުއްވި ހޫނު މަރުހަބާ އާއި ބެހެއްޓެވި ގާތްކަމަކީ އަދި ދެއްވެވި ސަމާލުކަމަކީ މިކަން މިއަދު ހަގީގަތަކަށް ވުމުގެ އަސްލު،" އެމަނިކުފާނު ވިދާޅުވި އެވެ.
ޑްރޯންތަކުގެ ތެރޭގައި ތުރުކީގެ ހިލޭ އެހީ ހިމެނޭ ކަމަށް ރައީސް ވިދާޅުވިއިރު، ސަރުކާރުން ވަނީ މި މުއާމަލާތާ ބެހޭ އެއްވެސް ކަމެއް ހާމަކުރަން ދެކޮޅު ހަދާފަ އެވެ. މި މައުލޫމާތު ހޯދަން މި ނޫހުގެ ނޫސްވެރިޔަކު ހުށަހެޅުމުން ދިން ޖަވާބުގައި ޑިފެންސް މިނިސްޓްރީން ވަނީ ތަފުސީލުތައް ދޭން ދެކޮޅު ހަދަނީ ގައުމީ ސަލާމަތަށް ނުރައްކަލެއް ކުރިމަތިވެދާނެތީ ކަމަށެވެ.
ތުރުކީން ޑްރޯން ގަތުމަށް ހިންގި މުއާމަލާތުގައި "ސިއްސައިގެންދާވަރުގެ" ކޮރަޕްޝަން ހިންގި ކަމަށް ތުހުމަތުކޮށް އެކަން ރައްޔިތުންގެ މަޖިލީހުން ބަލަން އިދިކޮޅު މޯލްޑިވިއަން ޑިމޮކްރެޓިކް ޕާޓީން ވަނީ ތުހުމަތުކޮށްފަ އެވެ.
