ރައްޔިތުންގެ މަޖިލީހުގެ އެންމެ ބާރުގަދަ ކޮމިޓީތަކުން އެ މަޖިލީހުގެ ނައިބު ރައީސް އަދި ދިއްގަރު ދާއިރާގެ މެންބަރު އަހުމަދު ނާޒިމް ވަކިކޮށްފި އެވެ.
މަޖިލީހުގެ އެންމެ ބާރުގަދަ ދެ ކޮމިޓީއަކީ މާލިއްޔަތު ކޮމިޓީ އާއި ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ) އެވެ. ނާޒިމްއަކީ މީގެ ކުރިން އެ ދެ ކޮމިޓީގައި ހިމެނިވަޑައިގެންނެވި މެންބަރެކެވެ.
ނަމަވެސް، މަޖިލީހުގެ ރަސްމީ ވެބްސައިޓުން މިހާރު ފެންނަ ގޮތުގައި އެ ދެ ކޮމިޓީ ވެސް މިހާރު އެކުލެވިގެންވަނީ ނާޒިމް ނުހިމެނޭ ގޮތަށެވެ. އޭނާ ފޮޓޯ ފެންނަނި ކުރިން ކޮމިޓީގައި މަސައްކަތް ކުރެއްވި މެންބަރުންގެ ފޮޓޯ ފެންނަ ތަނުންނެވެ.
މިއަދުގެ މަޖިލިސް ޖަލްސާގެ ރިޔާސަތު ވެސް ބެލެހެއްޓެވީ ނާޒިމް އެވެ. ރިޔާސަތުން އަންގާ އެންގުންތަކުގެ ތެރޭގައި އެއްވެސް ކަމެއް ނެތް ކަމަށް ޖަލްސާ ފަށަމުން ނާޒިމް ވިދާޅުވި އެވެ.
ޖަލްސާ މިހާރު ނިމިފައިވާއިރު ޖަލްސާ ނިންމަވާލައްވަމުން ވެސް މިފަދަ ބަދަލެއް ގެނައިކަން ރިޔާސަތުން އިއުލާނެއް ނުކުރެ އެވެ. މި ބަދަލު އިއުލާން ނުކުރަނީ ކީއްވެގެން ކަމެއް މިހާތަނަށް އެނގިފައެއް ނުވެ އެވެ. އޭނާގެ ބަދަލުގައި މި ކޮމިޓީތަކަށް އައްޔަނުކުރީ ކޮން މެންބަރުންނެއް ކަމެއް މިހާތަނަށް ސާފުކުރެވިފައެއް ނުވެ އެވެ.
މިކަމާ ގުޅިގެން ރައްޔިތުންގެ މަޖިލީހުގެ އިދާރާއާ ސުވާލު ކުރުމުން އެ އިދާރާއިން ވަނީ ވެބްސައިޓުގައި މައުލޫމާތު ހިމަނާފައިވަނީ ރަނގަޅަށްކަން ކަށަވަރުކޮށްދީފަ އެވެ.
ނާޒިމަކީ ސަރުކާރުގެ ކުންފުނިތައް ވިލަރެސްކުރާ އެސްއޯއީ ކޮމިޓީގެ ވެސް މެންބަރެކެވެ. މަޖިލީހުގެ ވެބްސައިޓުން އެނގޭ ގޮތުގައި އޭނާއަކީ މިހާރު ވެސް އެ ކޮމިޓީގެ މެންބަރެކެވެ.
އިގުތިސޯދީ ހާލަތު ރަނގަޅު ކުރަން އަޅަން ނިންމާފައިވާ ފިޔަވަޅުތައް އަޅަން ފަސްޖެހެމުންދާތީ މާލިއްޔަތު ކޮމިޓީގައި މީގެކުރިން ނާޒިމް ކަންބޮޑުވުން ވެސް ފާޅުކުރެއްވި އެވެ.
