ހުސްވެފައިވާ ޑިފެންސް މިނިސްޓަރުގެ މަގާމަށް ހަސަން ރަޝީދު ދާދި ދެންމެއަކު އައްޔަނުކޮށްފި އެވެ.
ޑިފެންސް މިނިސްޓަރުގެ މަގާމަށް ހަސަން ރަޝީދު އައްޔަނުކުރެއްވުމާ ހަމައަށް އޭނާ ހުންނެވީ ހައުސިން މިނިސްޓްރީގެ ސްޓޭޓް މިނިސްޓަރެއްގެ މަގާމުގަ އެވެ. އޭނާ އެ މަގާމަށް އައްޔަނުކުރީ ނޮވެމްބަރު 21، 2023 ގަ އެވެ.
ހަސަން ރަޝީދުއަކީ ކުރީގެ ވިލުފުށީ ދާއިރާގެ މެންބަރު، ރިޔާޒު ރަޝީދުގެ އެއްބަފާ ބޭބެ އެވެ. އަދި، އޭނާއަކީ މިހާރުގެ ފިނޭންސް މިނިސްޓަރު، މޫސާ ޒަމީރު އާ ވެސް އާއިލީ ގުޅުން އޮންނަ ގާތް ބޭފުޅެކެވެ.
ހަސަން ރަޝީދު ވަނީ އެންމެފަހުން އޮތް މަޖިލިސް އިންތިހާބުގެ ޕީއެންސީ ޕްރައިމަރީގައި، ވިލުފުށި ދާއިރާއަށް ވާދަކުރައްވައި ނާކާމިޔާބުވެވަޑައިގެންފަ އެވެ.
ހަސަން ރަޝީދު ވަނީ މީގެ ކުރިން، ކުރީގެ ރައީސް މުހައްމަދު ވަހީދު އާއި ކުރީގެ ރައީސް ޔާމިނުގެ ވެރިކަމުގައި ކޮންސްޓްރަކްޝަން މިނިސްޓްރީގެ ސްޓޭޓު މިނިސްޓަރުކަން ކުރައްވާފަ އެވެ. އޭރު އެ މިނިސްޓްރީގެ މިނިސްޓަރަކީ، މުއިއްޒު އެވެ.
މާލޭ އިންގްލިޝް ސްކޫލުން ކިޔަވައި ނިންމެވުމަށް ފަހު ހަސަން ރަޝީދު ގިނަ އަހަރުތަކެއް ވަންދެން ސިފައިންގެ މީހަކަށް އުޅުނެވެ. އެއަށް ފަހު ވަރަ މޯލްޑިވްސް އާއި ފިއުލް ސަޕްލައި ހިންގުމުގައި ވެސް އިސްކޮށް އުޅުއްވި އެވެ.
ޑިފެންސް މިނިސްޓަރުގެ މަގާމު ހުސްވީ، އެ މަގާމުގައި ހުންނެވި ގައްސާން މައުމޫން އެ މަގާމުން އިސްތިއުފާދެއްވުމުންނެވެ. އޭނާ އެ މަގާމުން އިސްތިއުފާދެއްވީ ރައީސް އޮފީހުން އަންގައިގެން އިއްޔެ އެވެ. ނަމަވެސް، އިސްތިއުފާދެއްވި ސަބަބެއް ހާމައެއް ނުކުރެ އެވެ.
