ރާއްޖެއަށް އިޒްރޭލުގެ ރައްޔިތުން އައުން މަނާކުރަން ލަފާދީ ރައްޔިތުންގެ މަޖިލީހުން ރައީސުލްޖުމްހޫރިއްޔާގެ އޮފީހަށް ފޮނުވި ސިޓީއާ ގުޅޭ ގޮތުން ސުވާލު ކުރުމުން، އެކަމަށް ދޭނެ ޖަވާބެއް ނެތް ކަމަށް އެ އޮފީހުން މިއަދު ބުނެފި އެވެ.
ރައްޔިތުންގެ މަޖިލީހުގެ ހާރިޖީ ގުޅުންތަކާ ބެހޭ ކޮމިޓީން ނޮވެމްބަރު 16، ގައި ރައީސް އޮފީހަށް ފޮނުވި ސިޓީއާ ގުޅޭ ގޮތުން މި ނޫހުން ސުވާލު ކުރުމުން ރައީސް އޮފީހުގެ ކޮމިއުނިކޭޝަން މިނިސްޓަރު އިބްރާހިމް ހަލީލު ވިދާޅުވީ "މިވަގުތު ތ ސުވާލަށް އަރުވާނެ ވަކި ޖަވާބެއް ނެތް" ކަމަށެވެ.
"މިއީ ރައްޔިތުންގެ މަޖިލީހާއި ކެބިނެޓާއި ގުޅިގެން ކުރައްވާފައި އޮތް ސުވާލަކަށް ވާތީ މިވަގުތު ތިސުވާލަށް އަރުވާނެ ވަކި ޖަވާބެއް ނެތް،" ހަލީލު ވިދާޅުވި އެވެ.
އިޒްރޭލުގެ ޕާސްޕޯޓު މަނާ ކުރަން ރައީސްއަށް ލަފާ އަރުވަން މަޖިލީހުގެ ހާރިޖީ ގުޅުންތަކާ ބެހޭ ކޮމިޓީން ނިންމީ އެ ކޮމިޓީގެ ހިމެނޭ މެންބަރުންގެ އިއްތިފާގުންނެވެ. އެގޮތަށް ނިންމީ، އިޒްރޭލު ޕާސްޕޯޓު މަނާ ކުރަން ގޮވާލާ މަޖިލީހުގެ އިދާރާ ކައިރި މުޒާހަރާ ކުރުމުން އެ މަޖިލީހުގެ މެންބަރު އަހުމަދު ހައިތަމް ހުށަހެޅި މައްސަލައަކާ ގުޅިގެންނެވެ.
އިޒްރޭލު ޕާސްޕޯޓު މަނާ ކުރަން ރައީސުލްޖުމްހޫރިއްޔާއަށް ލަފާ އެރުވުމަށް ނިންމައި އެ ސިޓީ މަޖިލީހުން ފޮނުވީ، ރައީސް އިބްރާހިމް މުހައްމަދު ސޯލިހުގެ ވެރިކަމުގެ ފަހު ދުވަހު، ނޮވެމްބަރު 16، ގައި ކަމަށް މަޖިލީހުން ބުނެ އެވެ.
ޑިސެމްބަރު 5، ގައި ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ރައީސް މުއިއްޒު ވިދާޅުވީ އިޒްރޭލުގެ ޕާސްޕޯޓުގެ މައްސަލަ ކެބިނެޓާ ހަމައަށް ގެންނަވާނެ ކަމަށާއި އެ މައްސަލަ ދިރާސާ ކުރެއްވުމަށްފަހު އަޅުއްވަންޖެހޭ ފިޔަވަޅުތައް އަޅުއްވާނެ ކަމަށެވެ.
"ރައްޔިތުންގެ މަޖިލީހުހެ ގަރާރެއް، އަޅުގަނޑަށް ދާދި ދެންމެ އަކު މައުލޫމާތު ލިބުނީ އޭޖީ އޮފީހަށް ރައްޔިތުންގެ މަޖިލީހުން ނިންމާފަ އޮތް ގަރާރެއް އެބަ އޮތޭ އައިސްފަ، އެހެންވީމަ އެ ގަރާރު ދިރާސާކޮށްފަ، އަޅުގަނޑުމެންނަށް މަޖުބޫރުވާ ކަމެއް ނުވަތަ ކުރަންޖެހޭ ކަމެއް ވެއްޖިއްޔާ ވަގުތުން ފިޔަވަޅު އަޅާނަން،" ރައީސް ވިދާޅުވި އެވެ.
އިޒްރޭލުން ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ ގަތުލުއާންމަށް 75 އަހަރުވެފައިވާއިރު ވޭތުވެދިޔަ ދެ މަސްދުވަހު ގާޒާއަށް މެދުނުކެނޑި ބޮންއަޅާތާ ދެ މަހަށް ވުރެ ގިނަ ދުވަސްވެއްޖެ އެވެ. އެ ހަމަލާތަކުގައި މަރުވި ފަލަސްތީނު މީހުންގެ އަދަދު 17،000 އަށް ވުރެ މައްޗަށް އަރަ އެވެ. އޭގެ ތެރޭގައި 7،000 އަށްވުރެ ގިނަ ކުޑަކުދިން ހިމެނެ އެވެ.
އިޒްރޭލުގެ އަނިޔާވެރިކަމާ ދެކޮޅަށް ރާއްޖޭގައި ދަނީ އެކި ހަރަކާތްތައް ހިންގަމުންނެވެ. އެގޮތުން ފާހަގަކުރެވެނީ ރާއްޖެއަށް އިޒްރޭލު ރައްޔިތުން އައުން މަނާކުރަން ގޮވާލާ ސިލްސިލާކޮށް ކުރަމުންދާ މުޒާހަރާތަކެވެ. ފަލަސްތީނުގެ ރައްޔިތުން ފުރިހަމަ މިނިވަންކަމަށް ކުރަމުންދާ ދަތުރުގައި ދިވެހިންނަކީ އަބަދުވެސް އެ ގައުމަށް އެންމެ ތާއީދުކޮށް ހިތްވަރުދޭ އެއް ގައުމެވެ.
