ލޮސް އެންޖެލްސް، ޔުނައިޓެޑް ސްޓޭޓްސް (ފެބްރުއަރީ 25) - ކުރިއަރަމުން އަންނަ އެމެރިކާގެ ފުޓްބޯޅަ ލީގު، މޭޖަ ލީގު ސޮކާ (އެމްއެލްއެސް)ގެ މެޗުތައް 2.5 ބިލިއަން ޑޮލަރުގެ އަގަކަށް ކުރިއަށް އޮތް 10 އަހަރު ދުވަހުގެ މުއްދަތަށް އެޕަލް ޓީވީ އަށް ވިއްކާލުމުގެ ޑީލް ފައިނަލް ކުރަމުން އަންނަ ކަމަށް ބުނެފި އެވެ.
މި ޑީލް ހިނގައިފިނަމަ، އެމްއެލްއެސް ވެގެންދާނީ މުޅި ދުނިޔެ އަށް އެއް ޕްލެޓްފޯމެއްގެ ޒަރިއްޔާ އިން ސްޓްރީމް ކުރެވޭ ގޮތަށް ކުރިއަށްގެންދާ ފުރަތަމަ ލީގަށެވެ.
އެމެރިކާގައި މީގެ ކުރިން އެމްއެލްއެސްގެ މެޗުތައް ދައްކާފައިވަނީ ފުރުސަތު ލިބޭ ޓީވީ ޗެނަލްތަކުންނެވެ. އެ ގޮތަށް މެޗުތައް ދައްކާއިރު ދިމާވާ އެންމެ ބޮޑު ގޮންޖެހުމަކީ އެމްއެލްއެސް މެޗުތައް އަޅުވަން ޓީވީތަކުން އެއްބަސްވަނީ އެމެރިކާގެ ފޯރިގަދަ ބާސްކެޓް ބޯޅަ މުބާރާތް، އެންބީއޭ ބާސްކެޓްބޯޅަ ލީގާއި އެންއެފްއެލް، އެމެރިކަން ފުޓްބޯޅަ ލީގުގެ މެޗުތައް ނުކުޅޭ ވަގުތުތަކުގައި ދައްކާ އެމްއެލްއެސް މެޗުތައް އަޅުވާ ގޮތަށެވެ. އެހެންވެ، އެމެރިކާގައި އެމްއެލްއެސް އިސްތިހާރު ކުރުމަށާއި މުޅި ދުނިޔޭގެ ނިސްބަތަށް ބެލިޔަސް އެމްއެލްއެސް ޕްރޮމޯޓްކުރަން ވަނީ ގޮންޖެހުން ބޮޑުވެފަ އެެވެ.
އެކަމަކު، އެޕަލް ޓީވީއާ އެކު މި ޑީލް ނިންމައި، މުޅި ދުނިޔެ އަށް ސްޓްރީމް ކުރެވޭ ގޮތަށް އެމްއެލްއެސް ކުރިއަށް ގޮސްފިނަމަ އޭގެ ނަތީޖާ އެކި ގޮތްގޮތުން ރަނގަޅުވާނެ ކަމަށް އެމްއެލްއެސް އިން ގަބޫލުކުރެ އެވެ.
އެމްއެލްއެސްގެ ކޮމިޝަނަރު، ޑޯން ގާބާ ބުނީ މިދިޔަ 10 ވަރަކަށް އަހަރަށް ބަލާއިރު، އެމެރިކާގެ ބައެއް ކްލަބްތަކުން ދުނިޔޭގެ މަޝްހޫރު ފުޓްބޯޅަ ކުޅުންތެރިން ގެނެސްގެން ލީގު ފޯރިގަދަކުރެވޭތޯ ބެލި ކަމަށާއި އެކަމަކު އެކަށީގެންވާ ވަރަށް އެކަން ނުކުރެވުނު ކަމަށެވެ. އެހެންކަމުން، އެހެން ދިމާލަކުން ވިސްނާއިރު، މީގެ އެންމެ މުހިންމީ ގިނަ ބަޔަކަށް ލީގު ފެންނަ ގޮތަކަށް ކުރިއަށްދިއުން ކަމަށްވާތީ އެޕަލް ޓީވީއާ އެކު މި ޑީލް މަޝްވަރާކުރަން ފެށީ ކަމަށް ގާބާ ވަނީ ބުނެފަ އެެވެ.
އެމެރިކާގައި 1996 ގައި ފުޓްބޯޅަ ލީގު ފެށިގެން އައީ 10 ޓީމުގެ މެދުގަ އެވެ. އެކަމަކު، އެކި ބަދަލުތައް ގެންނަމުން އައިސް، މިހާރު އެމެރިކާ އާއި ކެނަޑާ ހިއްސާވާގޮތަށް ޕްރޮފެޝަނަލް 29 ކްލަބެއް ހިންގަ އެވެ. މީގެ ކުރިން ކްލަބްތަކުގައި ތިބީ ގިނައިން އެމެރިކާ އާއި ކެނަޑާ އަށް ނިސްބަތްވާ ކުޅުންތެރިން ކަމުގައި ވިޔަސް، މިހާރު އެމެރިކާ ލީގުގައި 80 އެއްހާ ގައުމަށް ނިސްބަތްވާ އެކި ކުޅުންތެރިން އެބަ ކުޅެ އެވެ.
