އެންމެ ފަހުން ޓޫރިޒަމް ގާނޫނަށް ގެނައި އިސްލާހުގައި ކަނޑައަޅާފައިވާ ރޭޓުތަކުގައި އަންނަ އަހަރުން ފެށިގެން ގްރީން ޓެކްސް ނަގާ ގޮތަށް ޓޫރިޒަމް ގާނޫނު އިސްލާހުކުރަން ސަރުކާރުން ރައްޔިތުންގަ މަޖިލިހަށް ބިލު ވައްދައިފި އެވެ.
ގްރީން ޓެކްސްއާ ގުޅިގެން ހާއްސަ އިސްލާހެއް މަޖިލީހަށް ހުށަހަޅަން ޖެހުނީ މިދިޔަ ޖުލައި މަހު ރައީސް އިބްރާހިމް މުހައްމަދު ސޯލިހު ތަސްދީގުކުރެއްވި ޓޫރިޒަމް ގާނޫނަށް 11 ވަނަ އިސްލާހު ގެނައުމުގެ ގާނޫނުގައި ގްރީން ޓެކްސް ނެގޭނީ ވަކި ތާރީހެއްގައި ކަމަށް ބަޔާންކުރާތީ އެހާތަނަށް ގްރީން ޓެކްސް ނުނެގޭ މައްސަލަ ފެންމަތިވުމުންނެވެ.
މި މައްސަލަ އެންމެ ފުރަތަމަ ފެންމަތިކުރީ ވިޔަފާރިތަކަށް ލަފާދޭ ގާނޫނީ ބޭފުޅުންނެވެ. އޭރުން ފެށިގެން ސަރުކާރުން ވަނީ މިކަން ހައްލުކުރަން ގާނޫނު އިސްލާހުކުރުމުގެ މަސައްކަތް ފަށާފަ އެވެ. ނަމަވެސް ރައްޔިތުންގެ މަޖިލިސް ޗުއްޓީގައި އޮތުމާ ގުޅިގެން، އެ ބިލު ފޮނުވުނީ އަދި ކިރިޔާ އެވެ.
ސަރުކާރުން ގާނޫނު އިސްލާހުކުރަން ހުށަހަޅަނީ، މިހާރު އަމަލުކުރަމުންދާ ގާނޫނުގައި ބަޔާންކުރާ ރޭޓުތަކުގައި އަންނަ އަހަރުގެ ޖެނުއަރީ 1 ވަނަ ދުވަހުން ފެށިގެން ނަގާ ގޮތަށެވެ. އެހާތަނަށް ޓެކްސް ނަގާނީ ކުރިން ޓެކްސް ނަގަމުން އައި ރޭޓުތަކުގައި، ރިސޯޓުތަކާއި ސަފާރީތަކާއި ހޮޓާތަކުން ޓޫރިސްޓަކު ހޭދަކުރާ ކޮންމެ ރެއަކަށް ހަ ޑޮލަރު މަގުން އަދި ގެސްޓްހައުސްތަކުން ތިން ޑޮލަރު މަގުންނެވެ.
އަންނަ އަހަރުން ފެށިގެން އަންނަ ހަމައެކަނި ބަދަލަކީ މީހުން ދިރިއުޅޭ ރަށެއްގައި ހިންގާ ގެސްޓްހައުސްއެއް ވިޔަސް 50 ކޮޓަރިއަށް ވުރެ ގިނަ ނަމަ އެއިން ތަނެއްގައި ހޭދަކުރާ ކޮންމެ ދުވަހަކަށް، މީހަކަށް ހަ އެމެރިކާ ޑޮލަރުގެ ރޭޓުން ނެގުމެވެ. ޓޫރިޒަމް ގާނޫނަށް ގެނައި އިސްލާހުތަކުގެ ތެރޭގައި ގްރީން ޓެކްސްއާ ގުޅޭ ކަންކަން ހިމެނީ ވެސް މި ރޭޓުގައި ޓެކްސް ނެގުމުގެ ބޭނުމުގަ އެވެ.
ގާނޫނު ތަސްދީގުކުރި ފަހުން ގްރީން ޓެކްސް ނުނެގޭނެ ކަމަށް ބުނި ނަމަވެސް ސަރުކާރުން ވަނީ މި ޓެކްސް ނަގަން ޓޫރިސްޓުން އައިސް ތިބޭ ހުރިހާ ތަނަކަށް އަންގާފަ އެވެ. މިހާރު މަޖިލީހަށް ހުށަހަޅާފައި އިސްލާހުގައި ވެސް ވަނީ އެއްވެސް ޓޫރިސްޓެއްގެ އަތުން ގްރީން ޓެކްސްގެ ގޮތުގައި ނަގާފައިވާ ފައިސާ އެ ބަޔަކަށް ރައްދުނުކުރާ ނަމަ، އެ ފައިސާ ދައުލަތަށް ދައްކަން ޖެހޭނެ ކަމަށެވެ.
