ބަންޑާރަ އުސޫލުން ރައްޔިތުންނަށް ގޯތި ދޫކުރުމަކީ ދިގު މުއްދަތަކަށް ބަލާއިރު ދެމެހެއްޓެނިވި ގޮތެއް ނޫން ކަމަށް ހައުސިން މިނިސްޓަރު މުހައްމަދު އަސްލަމް މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މިނިސްޓަރު އަސްލަމް ހާޒިރުކުރުމުން ހެންވޭރު ދާއިރާގެ މެމްބަރު އަލީ އާޒިމް ވަނީ ބައެއް ރަށްރަށުން ހިލޭ ގޯތި ދިނުމުގެ ސިޔާސަތެއް އޮތްތޯ ސުވާލުކުރައްވާފަ އެވެ.
"މިއީ އަޑު އަހަން އުނދަގޫ ވާހަކަތަކަކަށް ވެދާނެ، އެއްވެސް މީހަކު ބޭނުމެއް ނުވެދާނެ ކަންނޭނގެ ކައިރި މުސްތަގުބަލެއްގައި ނޫނީ ދުރު މުސްތަގްބަލެއްގައި ވެސް ބަންޑާރައިން ގޯތި ދިނުމަކީ ހުއްޓާލަފާނެ ޒާތުގެ ވާހަކައެއް ކަމަށް އަޅުގަނޑުމެން ސިޔާސީ މީހަކު ވާހަކަ ދެއްކުން ވެސް، އެކަމަކު މިކަން ސަސްޓެއިން ކުރެވެން އަންނާނެ ގޮތަކީ އެއީ ކަމަށް އަޅުގަނޑު ދެކެނީ،" އާޒިމްގެ ސުވާލަށް ވަރަށް ތަފްސީލުކޮށް ޖަވާބު ދެއްވަމުން މިނިސްޓަރު ވިދާޅުވި އެވެ.
އަސްލަމް ވިދާޅުވީ ރާއްޖޭގައި އާބާދީ ކުރިއަށް އޮތްތަނުގައި ވެސް ދާނީ އިތުރުވަމުން ކަމަށާއި ރައްޔިތުން ބޭނުންވާ ވަރަށް "އަބަދަކު ނުހިއްކޭނެ" ކަމަށެވެ. އަދި، އެއާއެކު ބިމުގެ ވިޔަފާރި ވެސް ދާނީ ބޮޑުވަމުން ކަން ފާހަގަކުރެއްވި އެވެ.
"އެ ހުރިހާ ކަމަކަށް ގުޅުވާފައި އަޅުގަނޑުމެން އެބަޖެހޭ، އިހު ޒަމާނުގައި ކަންކުރި ގޮތާ މެދު-- އެކަން ގޯހީކީ ނޫން، އެ ޒަމާނަށް ބަރާބަރަށް އެކަން ހަމަ ރަނގަޅު، މިހާރު ގެންނަންވީ ކޮން ބަދަލުތަކެއްތޯ [ބަލަން ޖެހޭ]" އަސްލަމް ވިދާޅުވި އެވެ.
މީގެ އިތުރުން، އަސްލަމް ވަނީ އަމިއްލަ ރަށް ނޫން އެހެން ރަށް ރަށުން ގޯތި ދެވޭނެ އުސޫލެއް އޮންނަން ޖެހޭ ކަމަށް ދެކިވަޑައިގަންނަވާ ކަމަށެވެ. ގާނޫނުން އެކަން މަނާ ނުކުރިނަމަ ވެސް އަދިވެސް ކަން ހިނގަމުން އަންނަނީ އެހެން ކަމަށާއި މާލެއިން ގޯތި ދޫކުރުމަށް ހުޅުވާލީ އެ އުސޫލުގެ ދަށުން ކަމަށް ވެސް ވިދާޅުވި އެވެ.
"ހަމައެކަނި މާލޭގަ ޖެހުނީމަކާ ނޫން ނޫނީ އެ މީހެއްގެ ރަށުގައި ޖެހުނީމަކާ ނޫނޭ މިކަން ކުރަން ޖެހެނީ، މުޅި ގައުމާ ދޭތެރޭގައި އެއް ހަމައަކުން ވިސްނައި، ކޮންމެ ދިވެހި ރައްޔިތަކަށް ވެސް ކޮންމެ ތާކުން ވެސް [ލިބެން ޖެހޭ]، އެކަމަކު ހިލޭ ދޭ ކަމަށް ވަންޏާ އަޅުގަނޑަށް ހަމަ ޔަގީން އަޅުގަނޑުމެން ބަންޑާރައިން ދޭ އުސޫލު އޮވެއްޖެ ކަމަށް ވަންޏާ ޔަގީން ކޮންމެ މީހަކު ވެސް ބޭނުންވާނީ އޭނާއަށް ލިބިފައި އެހެން މީހަކަށް ލިބެން،" އަސްލަމް ވިދާޅުވި އެވެ.
މިއީ ކުރިއަށް އޮތްތަނުގައި ސިޔާސަތުތަކަށް ބަދަލު ގެނެވިދާނެ ގޮތެއް ކަމަށް ދެކިވަޑައިގަންނަވާ ކަމަށް ވެސް އޭނާ ވިދާޅުވި އެވެ.
