ގިނަ ދުވަސްތަކެއް ވަންދެން ހުއްޓިފައި އޮތް ގިރާވަރުފަޅު ހިއްކުމުގެ މަސައްކަތް މިއަދު ހެދުނު އަލުން ފަށާފައިވާ ކަމަށް ރައީސް މުހައްމަދު މުއިއްޒު އިއުލާނުކުރައްވައިފި އެވެ.
މުއިއްޒު މިކަން އިއުލާނުކުރެއްވީ މިއަދު ހެދުނު އެކްސްގައި ކުރެއްވި ޕޯސްޓެއްގަ އެވެ. އެ ޕޯސްޓާއެކު ހިއްސާކުރެއްވި ފޮޓޯ އަދި ވީޑިއޯ އިން އެ ސަރަހައްދު ހިއްކާތަނާއި އެ މަސައްކަތުގައި ބޭނުންކުރާ އެއް ޑްރެޖަރު ފެނެ އެވެ.
އަންނަ މަހުގެ ނިޔަލަށް ހިއްކާ ނިންމާނެ ކަމަށް މުއިއްޒު ވިދާޅުވެފައިވާ ގިރާވަރު ފަޅުގެ މަސައްކަތް މިފަހަރު ކުރަނީ އެމްއޭސީއެލްއާ ހަވާލުކޮށްގެންނެވެ. ބިން ހިއްކަން އެމްއޭސީއެލް އިން ގެނެސްފައިވަނީ "ފިލިޕޯ ބްރޫނެލެސްކީ" އަދި "އޮރެންޖު" ނަމަކަށް ކިޔާ ދެ ޑްރެޖަރެވެ.
މި ދެ ޑްރެޖަރުން މިދިޔަ ހަފުތާއާ ހަމައަށް ހިއްކަމުން ދިޔައީ ހުޅުމާލެ ފޭސް ތިނެކެވެ. ދެ ޑްރެޖަރުން އެ ސަރަހައްދު ހިއްކާ ނިންމާލީ ދެ މަސް ދުވަހުންނެވެ.
ގިރާވަރުފަޅުން 169 ހެކްޓަރު ހިއްކަން ހަވާލުކޮށްފައި އޮތް މަޝްރޫއުއަށް 50 ހެކްޓަރު އިތުރުކުރަން ނިންމައި އެ ފަޅު ހިއްކައި ނިމޭއިރު 219 ހެކްޓަރު ހުންނާނެ އެވެ. އޭގެ ތެރެއިން 90 ހެކްޓަރު ވަނީ މިހާރު ހިއްކާފަ އެވެ.
އެ ތަންތަނަކީ މިދިޔަ ސަރުކާރުން ހިންގި ބިންވެރިޔާ ސްކީމުގެ ދަށުން މާލޭ މީހުންނަށް ގޯތި ދޫކޮށްފައިވާ ތަންތަނެވެ.
ގިރާވަރުފަޅުން ދޫކުރާ ގޯތީގެ އަދަދާއި ބޮޑުމިން:
- 1،250 އަކަފޫޓުގެ 2،603 ގޯތި
- 1،650 އަކަފޫޓުގެ 1،214 ގޯތި
- 2،050 އަކަފޫޓުގެ 254 ގޯތި
- 2،450 އަކަފޫޓުގެ އެއް ގޯތި
ހުޅުމާލެ ފޭސް ތިނަކާއި ގިރާވަރުފަޅު އަދި ރަސްމާލެ ހިމެނޭހެން މާލެ ސަރަހައްދުގެ ބިން ހިއްކުމުގެ މަޝްރޫއުތައް އެމްއޭސީއެލް އާއި ހަވާލުކުރީ އެ މަސައްކަތް ކުރަން ކުރިން ހަދާފައިވާ އެއްބަސްވުންތައް އުވާލުމާށްފަހު އެވެ.
ކެޕިޓަލް މެރިން އެންޑް ސިވިލް ކޮންސްޓްރަކްޝަން (ސީއެމްސީ) އާއެކު ކުރިން ހަދާފައިވާ އެއްބަސްވުންތައް އުވާލީ އޭގެ ސަބަބުން އެ ކުންފުންޏަށް އެކި ސަރަހައްދުތަކުން ދިގު މުއްދަތަށް ބިން ދޭން މަޖުބޫރުވާތީ ކަމަށް މުއިއްޒު ވިދާޅުވި އެވެ.
މި ސަރުކާރުން އެ ކުންފުންޏަށް ރަސްމާލެ ހިއްކުމުގެ މަސައްކަތް ހަވާލުކުރީ ވެސް ހުޅުމާލެ އާއި ރަސްމާލެ އިން ބިން ދޭ ގޮތަށެވެ. އެ އެއްބަސްވުން އުވާލީ މަޝްރޫއު މަޑުޖެހި އެތައް މަހެއް ފާއިތުވުމުންނެވެ.
