ހިއްކޭނެ ތަންތަނާއި ނުހިއްކޭނެ ތަންތަން، އަދި ސިނާއީ އެހެނިހެން މަސައްކަތްތައް ކުރެވޭނެ ތަންތަނާއި ނުކުރެވޭ ތަންތަން ކަނޑައަޅައި "ސްޕޭޝަލް ޕްލޭނެއް" ދުރާލައި ހަދާފައި އޮތުމަކީ ތިމާވެށްޓަށް ލިބޭ ގެއްލުންތައް ކުޑަކުރުމަށްޓަކައި ވަރަށް މުހިއްމު ކަމެއް ކަމަށް އެންވަޔަރްމެންޓް ޕްރޮޓެކްޝަން އެޖެންސީ (އީޕީއޭ) އިން ބުނެފި އެވެ.

"އަދަދު" އަށް ދެއްވި ހާއްސަ އިންޓަވިއުއެއްގައި އީޕީއޭގެ ޑިރެކްޓަތް ޖެނެރަލް އިބްރާހީމް ނައީމް ވިދާޅުވީ ތަރައްގީގެ މަޝްރޫއުތައް ވަކި ތަނެއްގައި ހިންގުމާއި މެދު، ގޮތް ނިންމުމުގައި ތިމާވެށީގެ ގޮތުން ލަފައެއް ދިނުމުގެ ފުރުސަތު ނޯންނަ ކަމަށެވެ. އޭގެ ބަދަލުގައި ތިމާވެށީގެ ގޮތުން، އީޕީއޭގެ ލަފައެއް ހޯދަނީ މަޝްރޫއު ހިންގަން ބަޔަކާ ހަވާލު ވެސް ކުރާ ފަހުން ކަމަށް އޭނާ ވިދާޅުވި އެވެ.

"އެ ނޯންނަނީ ސްޓްރެޓެޖިކް އެސެސްމެންޓް އެކިޔާ މަރުހަލާތައް ނޯންނާތީ. ވަރަށް ކުރުކުރު، ކުރުރާސްތާ ވިސްނުމެއްގައި މަސައްކަތްކުރަމުން ދަނީ. ދުރު ރާސްތާ ވިސްނުމަށް މަސައްކަތްކުރުމެއް ނުއެއް އޮވޭ. ސްޕޭޝަލް ޕްލޭނެއް ނޯވޭ،" ނައީމް ވިދާޅުވި އެވެ.

އޭނާ ވިދާޅުވި ގޮތުގައި ރާއްޖޭގައި ގައުމީ ތަރައްގީގެ ޕްލޭނެއް އޮތް ނަމަވެސް މަސައްކަތައް ކުރިއަށް ގެންދަނީ އެ ޕްލޭނާ ވެސް އެއްގޮތަކަށް ނޫން ކަމަށެވެ. މަސައްކަތްތައް ކުރަނީ "އެފަދަ ޕްލޭނެއް ނެތޭ" ބުނެވޭ ފަދަ ގޮތަކަށް ކަމަށް އޭނާ ސިފަ ކުރެއްވި އެވެ. މަސައްކަތްތައް ކުރަމުން އަންނަނީ އޭރަކު އޮންނަ ސަރުކާރަކުން ބޭނުންވާހާ ގޮތަކަށް ކަމަށް ވެސް ނައީމް ވިދާޅުވި އެވެ.

"އެހެންވީމާ ފުރަތަމަ އެންމެ މުހިއްމު ކަމަކީ ހަގީގަތުގައި ރަނގަޅަށް ކަންކަން ކުރަން ބޭނުމިއްޔާ، މުޅި ގައުމު ޕްލޭންކޮށްލަން ޖެހޭނެ. ސްޕޭޝަލް ޕްލޭނެއްގެ ދަށުން. އޭރުން އެނގޭނެ [ތިމާވެށްޓަށް ލިބޭ ގެއްލުންތައް ކުޑަކޮށް] ރިސޯޓްތައް ހަދަންވާ ތަންތަނާއި ހިއްކަންވާ ތަންތަނާއި ނުހިއްކަންވާ ތަންތަނާ، ބޮޑެތި ބަނދަރުތައް ހަދަންވީ ތަންތަނާ އެއާޕޯޓް ހަދަންވީ ތަންތަނާ ހުންނަން ވާނީ އެނގިފައި،" ނައީމް ވިދާޅުވި އެވެ.

ރާއްޖޭގައި އެކި ސަރުކާރުތަކުން ހިންގި ތަރައްގީގެ ބައެއް މަޝްރޫއުތަކަކީ ތިމާވެއްޓަށް ވަރަށް ބޮޑަށް ގެއްލުންވާ ގޮތަށް ކުރި މަސައްކަތްތަކެއް ކަމަށް ތިމާވެށި ހިމާޔަތްކުރަން މަސައްކަތް ކުރާ މަދަނީ ޖަމިއްޔާތަކުން އަބަދު ވެސް ތުހުމަތުކުރެ އެވެ. އެންމެ ފަހުން ޖަމިއްޔާތަކުން އެފަަދަ ކަންބޮޑުވުމެއް ފާޅުކުރީ އައްޑޫގައި ބިން ހިއްކައިގެން ހިންގަން އުޅޭ މަޝްރޫއަކާ މެދުގަ އެވެ.