ކޮވިޑާ ގުޅިގެން ވަޒީފާ ގެއްލުނު މީހުންނަށާއި އާމްދަނީއަށް އަސަރުކުރި މީހުންނަށް ސަރުކާރުން ދޫކުރި އިންކަމް ސަޕޯޓް އެލަވަންސް ޕްރޮގްރާމަށް ދޮގު މައުލޫމާތު ހުށަހަޅައިގެން ހޯދި ގާތްގަނޑަކަށް ފަސް މިލިއަން ރުފިޔާގެ ތެރެއިން، އަދި އަނބުރާ ހޯދުނީ އޭގެ ތެރެއިން އެންމެ 11 ޕަސަންޓު ކަމަށް އޮޑިޓު އޮފީހުން ބުނެފި އެވެ.

އޮޑިޓާ ޖެނެރަލް އޮފީހުން 2020 ވަނަ އަހަރުގެ ނިޔަލަށް އާންމުކުރި "ކޮވިޑް-19 އެމަޖެންސީ އިންކަމް ސަޕޯޓް އެލަވަންސް ޕްރޮޖެކްޓް" އޮޑިޓް ރިޕޯޓުގައި ވަނީ، ނެޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) މެދުވެރިކޮށް ދޫކުރި އިންކަމް ސަޕޯޓުގެ ތެރެއިން، ދޮގު މައުލޫމާތު ދީގެން އޮޅުވާލައިގެން 4،974،477ރ. ހޯދާފައިވާ ކަމަށް ބުނެފަ އެވެ.

އޭގެ ފަހުން، 2021 ވަނަ އަހަރުގެ އެ ޕްރޮޖެކްޓުގެ އޮޑިޓު ރިޕޯޓުގައި ބުނީ، އެންސްޕާއިން އިތުރަށް ބެލި ބެލުމުގައި، ދޮގު މައުލޫމާތު ދީގެން އިންކަމް ސަޕޯޓު ދޫކުރެވުނު ޖުމްލަ އަދަދު 5,246,010.85ރ. އަށް އަރާ ކަމަށެވެ.

އޭގެ ތެރޭގައި ޖުމްލަ 485 ފަރާތެއް ހިމެނޭ ކަމަށް ފުރަތަމަ ބެލެވުނު ނަމަވެސް، އިތުރަށް ބެލި ބެލުމުން، އޭގެ ތެރެއިން 14 ފަރާތެއްގެ އަތުން ފައިސާ އަނބުރާ ހޯދަންނުޖެހޭ ކަމަށް ފަހުން ފާހަގަވި ކަމަށް ވެސް އެ ރިޕޯޓުގައި ބުނެފައިވެ އެވެ.

އެއާއެކު، އެ ޕްރޮޖެކްޓުގެ މަސްއޫލުވެރި އިދާރާ ކަމަށްވާ، އިކޮނޮމިކް މިނިސްޓްރީން އެ ފައިސާ އަނބުރާ ހޯދުމުގެ މަސައްކަތް ފަށައި، އޮޅުވާލައިގެން އެލަވަންސް ހޯދި މީހުންގެ ތެރެއިން 428 ފަރާތަކަށް ފައިސާ އަނބުރާ ދެއްކުމަށް މިހާރު އަންގާފައިވާ ކަމަށް ވެސް އޮޑިޓު އޮފީހުން ބުނެފައިވެ އެވެ.

ނަމަވެސް، އޮޑިޓު ރިޕޯޓުގައި ބުނި ގޮތުގައި، ނިމުނު ޖޫން މަހުގެ 23 ވަނަ ދުވަހުގެ ނިޔަލަށް، އަނބުރާ ހޯދުނު ފައިސާގެ ޖުމްލަ އަދަދަކީ އެންމެ 600,151.53ރ. އެވެ.

އެއީ އަނބުރާ ހޯދަންޖެހޭ ޖުމްލަ އަދަދުގެ ތެރެއިން އެންމެ 11 ޕަސަންޓެވެ.

ކޮވިޑުގެ ބަލިމަޑުކަމާ ގުޅިގެން ގިނަ ބައެއްގެ ވަޒީފާތައް ގެއްލުމާއި އާމްދަނީ ލިބުން ހުއްޓުމާ ގުޅިގެން ސަރުކާރުން މާލީ އެހީތެރިކަމެއް ފޯރުކޮށް ދިނުމަށް ފެށި އެ ޕްރޮގްރާމުގެ ދަށުން 2020 ވަނަ އަހަރުގެ ޑިސެމްބަރު މަހުގެ ނިޔަލަށް، 421 މިލިއަން ރުފިޔާއަށް ދޫކޮށްފައިވެ އެވެ.

މީގެ ކުރިން އޮޑިޓް އޮފީހުން ހެދި އިންކަމް ސަޕޯޓް ޕްރޮޖެކްޓުގެ ޕާފޯމަންސް އޮޑިޓުގައި، އޮޅުވާލައިގެން ހޯދި ކަމަށް ފާހަގަކުރެވުނީ ހަތަރު ލައްކައެއްހާ ރުފިޔާ އެވެ. ނަމަވެސް އެ ފަހަރު އޮޑިޓާ ޖެނެރަލް އޮފީހުން އެ އަދަދު ބިނާކުރީ، އެހާތަނަށް އިކޮނޮމިކް މިނިސްޓްރީން ހެދި ރިވިއުއަކުން ފާހަގަކުރެވުނު އަދަދުތަކަށެވެ.

އޮޅުވާލައިގެން ހޯދި ފައިސާގެ މައްސަލައިގައި އެފަހަރުވެސް އޮޑިޓް އޮފީހުން ވަނީ، އެ ފައިސާ ހޯދުން އަވަސް ކުރަން އިކޮނޮމިކް މިނިސްޓްރީއަށް އަންގާފަ އެވެ.

އެ އެންގުމާ ގުޅިގެން މިނިސްޓްރީން އޭރު ބުނީ އެ ފައިސާ ހޯދަން އަޅަން ޖެހޭ ފިޔަވަޅުތައް އަޅަން ފަށާފައިވާ ކަމަށެވެ. އެގޮތުން އޮޅުވާލި ކަމަށް ފާހަގަކުރެވުނު މީހުންނަށް، އެ ފައިސާ އަނބުރާ ރައްދުކޮށްދޭން އަންގާ، އެއްބާރުލުން ނުލިބޭ މީހުންނަށް ދައުވާ ކުރާނެ ކަމަށް ބުނެފައިވެ އެވެ.