ކުރީގެ ރައީސް އަބްދުﷲ ޔާމީންގެ ސަރުކާރުން ޗައިނާއިން ނެގި ލޯނުތަކާއި ހިންގި މަޝްރޫއުތަކަކީ "ދަރަނީގެ މަޅި"އެއް ކަމަށް ވިދާޅުވެ ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު މިފަހުން ދެއްކެވި ވާހަތަކަށް ޗައިނާއިން އަނެއްކާ ވެސް ރައްދު ދީފި އެވެ.

ބައިނަލް އަގްވާމީ އެކި ޕްލެޓްފޯމްތަކުގައި މީގެ ކުރިން ވެސް ޗައިނާއަށް ފާޑުވިދާޅުވެ ނަޝީދު ވާހަކަ ދައްކަވާފައިވާއިރު، މިހާރު އިންޑިއާއަށް ކުރައްވަމުން ގެންދަވާ ދަތުރުފުޅުގެ ތެރެއިން ވެސް އެމަނިކުފާނު ގެންދަވަނީ ޗައިނާއިން މަސައްކަތް ކުރަނީ ރާއްޖޭގެ ބިންތައް ފޭރެން ކަމަށް ތުހުމަތު ކުރައްވަމުންނެވެ.

ނަޝީދުގެ ވާހަކަތައް ދޮގުކޮށް ޗައިނާ އެމްބަސީން ނެރުނު ބަޔާނެއްގައި ވަނީ، ޗައިނާ ސަރުކާރުގެ އެހީ އަދި ލޯނުގެ ދަށުން ރާއްޖޭގައި ގާއިމްކޮށްފައިވާ އުމްރާނީ ބިނާތަކާއި އެ ބިނާތައް ހުރި ބިންތަކުގެ މިލްކުވެރިކަން އޮންނަ ދައުލަތެއްގެ ގޮތުގައި އަބަދުވެސް އޮންނާނީ ދިވެހި ދައުލަތް ކަމަށެވެ.

"ޗައިނާއިން ރާއްޖޭގެ ބިންތައް ފޭރިގަނެފައިވާ ކަމަށް ބުނެ ދެކެވޭ ވާހަކައަކީ ޗައިނާގެ އަގު ވައްޓާލަން ވެގެން ދައްކާ އެއްވެސް ހަގީގަތެއް ނެތް ވާހަކައެއް، ދަރަނީގެ މަޅީގެ ތުހުމަތުގައި އެއްވެސް އަސާސެއް ނެތް،" ޗައިނާއިން ނެރުނު ބަޔާނުގައިވެ އެވެ.

ޗައިނާގެ ޝިންހުއާ ނޫސް އެޖެންސީއަށް ފޮރިން މިނިސްޓަރު އަބްދުﷲ ޝާހިދު ދެއްވި އިންޓަވިއުއެއްގައި ޗައިނާއާ ދެމެދު ވެފައިވާ ލޯނު އެއްބަސްވުންތަކަކީ ދެ ގައުމަށް ވެސް ފައިދާ އޮތް "ވިން-ވިން" މުއާމަލާތްތަކެއް ކަމަށް ވިދާޅުވެފައިވާ ކަން ވެސް ޗައިނާއިން ފާހަގަ ކުރި އެވެ.

ކޮވިޑުގެ ބަލިމަޑުކަމުގެ ހާލަތު ދިމާވުމުން ކުދި އިގްތިސޯދުތަކަށް ދިމާވި ދަތިތަކުގެ ސަބަބުން ޗައިނާގެ ދަރަނި ދައްކަން އޮތް މުއްދަތު ސަސްޕެންޑް ކޮށްދީފައިވެ އެވެ. އެކަން ފާހަގަކޮށް ޗައިނާއިން ބުނީ ދިވެހި ގިނަ ބަޔަކު ޗައިނާއިން ކޮށްދޭ ކަންކަން ބަލައިގަންނަ ކަމަށް ގަބޫލު ކުރާ ކަމަށެވެ.

"އަޅުގަނޑުމެން ގަބޫލު ކުރަނީ ޗައިނާއިން ދޫކޮށްދިން މާލީ އެހީތެރިކަމަކީ ދަރަނީގެ މަޅިއެއްގެ ގޮތުގައި ސިފަކޮށް ދެކެވޭ ވާހަކަތަކުގެ ހަގީގީ ނިޔަތް ދިވެހިންނަށް ސާފުވާ ކަމަށް،" ނަޝީދުގެ ނަން ނުގެނެސް، އެމަނިކުފާނު ދައްކަވާ ވާހަކަތަކަށް ރައްދު ދެމުން ޗައިނާއިން ބުނެފައިވެ އެވެ.

ޗައިނާއިން ދޫކުރި ލޯނުތަކުން ގާއިމްކޮށްފައިވާ ބައެއް އުމްރާނީ ބިނާތަކަކީ އެ ލޯނު އަނބުރާ ދެއްކޭނެ ވަރުގެ ކުރިއެރުމާއި ތަރައްގީ ލިބޭނެ ބިނާތަކެއްގެ ގޮތުގައި ވެސް ޗައިނާގެ ބަޔާނުގައި ސިފަކޮށްފައިވެ އެވެ. އޭގެ ތެރޭގައި ސިނަމާލެ ބްރިޖާއި، ވެލާނާ އިންޓަނޭޝަނަލް އެއާޕޯޓްގެ އާ ރަންވޭ ހިމެނެ އެވެ.

ޔާމީންގެ ސަރުކާރުގައި އެންމެ ގާތް ގުޅުމެއް ޗައިނާއާއެކު ބޭއްވިއިރު، ނަޝީދު އޭރުން ފެށިގެން ވެސް އެކި ޕްލެޓްފޯމްތަކުގައި ޗައިނާއަށް ފާޑުވިދާޅުވެ ވާހަކަ ދައްކަވާފައިވެ އެވެ.

ޗައިނާއަށް 1.1 ބިލިއަން ޑޮލަރުގެ ދަރަންޏެއް ދައްކަން އޮތްއިރު، މަޝްރޫއުތައް ހިންގާފައިވަނީ ދެ ގުނަ އަގެއްގައި ކަމަށް ނަޝީދު ތުހުމަތު ކުރައްވަ އެވެ. ނަޝީދުގެ މި ތުހުމަތުތައް ޗައިނާއިން ގެންދަނީ ދޮގު ކުރަމުންނެވެ.