ކުރީގެ ރައީސް އަބްދުﷲ ޔާމީންގެ ސަރުކާރުގައި ޗައިނާއާއެކު ހެދި ފްރީ ޓްރޭޑް އެގްރީމެންޓު މި ސަރުކާރުން ކެންސަލްކޮށްފައިވާ ކަމަށް ބުނެ ރައްޔިތުންގެ މަޖިލީހުގެ ރައީސް މުހައްމަދު ނަޝީދު ދެއްކެވި ވާހަކަތައް ސަރުކާރުން ދޮގުކޮށްފި އެވެ.
ރައީސް ނަޝީދު މިހާރު އިންޑިއާއަށް ވަޑައިގެން ކުރައްވަމުންގެންދަވާ ދަތުރުފުޅުގެ ތެރެއިން، ވެރިރަށް ނިއު ދިއްލީގައި އޮތް ލެކްޗަރެއްގައި، ރާއްޖޭގެ ސަރުކާރުން ޗައިނާއާއެކު ހަދާފައިވާ ފްރީ ޓްރޭޑް އެގްރިމެންޓް ކެންސަލްކޮށްފައިވާކަމަށް އިއްޔެ ވިދާޅުވިކަމަށް އެ ގައުމުގެ ދަ ޕްރިންޓް ނޫހުން ވަނީ ރިޕޯޓުކޮށްފަ އެވެ.
އެކަމާއި ގުޅިގެން އިކޮނޮމިކް މިނިސްޓްރީއާ ސުވާލުކުރުމުން، އެ މިނިސްޓްރީން ބުނީ އެފަދަ ކަމެއް ހިނގާފައިވާ ކަމެއް އެ މިނިސްޓްރީއަށް އެނގިފައިނުވާ ކަމަށެވެ. އަދި, އެ އެގްރިމެންޓު ބާތިލުކުރުމުގައި ސަރުކާރުން ވަކި ގޮތެއް އަދި ނުނިންމާ ކަމަށް އިކޮނޮމިކް މިނިސްޓްރީން ބުނެ އެވެ.
ފްރީ ޓްރޭޑް އެގްރިމެންޓު ރިވިއުކުރުމުގެ މަސައްކަތް މިހާރު ކުރަމުން އަންނަ ކަމަށް އިކޮނޮމިކް މިނިސްޓްރީން ހާމަކުރި އެވެ.
ނަޝީދަކީ އަބަދު ވެސް ޗައިނާއާ ދެކޮޅަށް ވާހަކަ ދައްކަވާ ބޭފުޅެއްކަން ފާހަގަކުރެވެ އެވެ. އެގޮތުން، އެމަނިކުފާނު ވަނީ 2019 ވަނަ އަހަރު ވެސް ފްރީ ޓްރޭޑް އެގްރިމެންޓު އޮތީ މަރުވެފައި ކަމަށް ވިދާޅުވެފަ އެވެ.
ރާއްޖެއާ ޗައިނާއާ ދެމެދު ސޮއިކުރި ފްރީ ޓްރޭޑް އެގްރިމެންޓަކީ 2017 ވަނަ އަހަރުގެ ޑިސެމްބަރު މަސް ތެރޭ ސޮއިކުރި އެއްބަސްވުމެކެވެ. ނަމަވެސް އެ އެއްބަސްވުން އަދިއަދަށް ވެސް ތަންފީޒުކޮށްފައެއް ނުވެ އެވެ.
ނަޝީދު ދެއްވި އެ ލެކްޗަރުގައި އެމްޑީޕީގެ ސަރުކާރުން ވެރިކަމަށް އައިސް ޗައިނާއަށް ރާއްޖެއިން ބިން ލިބޭގޮތަށް ހަދާފައިވާ ހުރިހާ ގާނޫނުތަކާއި ގަވާއިދުތަކަށް ވެސް އަމަލުކުރުން ހުއްޓާލާފައިވާކަމަށް އެމަނިކުފާނު ވިދާޅުވިކަމަށް އެ ނޫހުން ބުނެ އެވެ.
ނަމަވެސް އެގޮތަށް އަމަލުކުރިނަމަވެސް އިންފްރާސްޓްރަކްޗާގެ އަގުބޮޑު މަސައްކަތްތައް ޗައިނާގެ ކުންފުނިތަކަށް ދުރާލައި ދީފައިވާތީ ރާއްޖެއަށް ދަރަނީގެ މައްސަލަތަކާއި ކުރިމަތިވެ ތާށިވާނެކަމަށް އެމަނިކުފާނު ވިދާޅުވި އެވެ.
ނަޝީދު އިތުރަށް ވިދާޅުވީ ޗައިނާއިން މަޝްރޫއުތަކުގެ އަގުތައް ވެސް އިންފްލޭޓްކޮށް ބޮޑުކޮށްފައިވާކަމަށް ތުހުމަތުކުރައްވާފަ އެވެ.
