ސްޓަރަކްޗަރަށް ދިމާވެފައިވާ މައްސަލަތަކަަކާއި ގުޅިގެން އަރަބިއްޔާ ސްކޫލު އިމާރާތުގައި މި ވަގުތު ހާލަތު ހުރި ގޮތުން އެތަނުގައި ކިޔަވައިދިނުން ރައްކާތެރި ނޫން ކަމަށް ނިންމާ ކުދިން ކިޔެވުން މެދުނުކެނޑި ކުރިޔަށް ގެންދަން އިއްޒުއްދީން ސްކޫލަށް ބަދަލުކުރަން އެޑިޔުކޭޝަން މިނިސްޓްރީން ނިންމައިފި އެވެ.

އަރަބިއްޔާ ސްކޫލުގެ ބެލެނިވެރިން ވަނީ ދަރިވަރުން އިއްޒުއްދީން ސްކޫލަށް ބަދަލުކުރަން ދެކޮޅު ހަދާފަ އެވެ.

އެކަމަކު މިނިސްޓްރީން މިރޭ ނެރުނު ބަޔާނެއްގައި ބުނީ ކުދިންގެ ކިޔެވުން މެދުނުކެނޑި ކުރިޔަށް ގެންދަން އަރަބިއްޔާ ސްކޫލުގައި ކިޔަވާ 700 އަށް ވުރެ ގިނަ ދަރިވަރުންގެ ކިޔެވުން ވަގުތީ ގޮތުން އިއްޒުއްދީނަށް ބަދަލުކުރަން ނިންމާފައިވާ ކަމަށެވެ.

އިމާރާތްކޮށް ނިމުނުތާ ނުވަ އަހަރު ނުވާ އަރަބިއްޔާ އިމާރާތުގައި ރެނދުލާ ބޮޑެތި ގެއްލުންތަކެއް ލިބުމާ ގުޅިގެން މިނިސްޓްރީން އެންމެ ފަހުން ބުނީ މިކަމާ މެދު ގޮތެއް ނިންމާނީ ޖެނުއަރީއަށް ނިންމަން ހަވާލުކޮށްފައިވާ ސްޓްރަކްޗަރަލް އެސެސްމަންޓަށް ފަހު ކަމަށެވެ. އެކަމަކު މިނިސްޓްރީން ވަނީ އެސެސްމަންޓުގެ ކުރިން މި ފިޔަވަޅުތައް އަޅަން ނިންމާފަ އެވެ.

އެގޮތުން އެޑިޔުކޭޝަނުގެ ބަޔާނުގައި ބުނީ އެ އިމާރާތަށް ދިމާވެފައިވާ މައްސަލަ ބަލާ ހައްލުކުރަން އިތުރު ވަގުތު ބޭނުންވާ ކަމަށެވެ.

އިއްޒުއްދީނަށް ކުދިން ބަދަލުކުރުން ދިފާއުކޮށް އެޑިޔުކޭޝަނުން ބުނީ، ދަރިވަރުން ބަދަލުކުރެވޭނީ ކިޔަވައި ދޭން ހާއްސަކޮށްގެން ފަރުމާކުރެވި، ބޭނުންވާ ވަސީލަތްތައް ގާއިމްކުރެވިފައިވާ ތަނަކަށް ވާން ޖެހޭ ކަމަށެވެ.

އޭގެ އިތުރުން މިނިސްޓްރީން ވަނީ ހުޅުމާލޭގައި މިހާރު އިމާރާތްކުރަމުންދާ ތިން ސްކޫލުގެ ތެރެއިން ސްކޫލެއް އަރަބިއްޔާއަށް ހާއްސަކުރަން ނިންމާފަ އެވެ. އެކަމަކު އެއީ އޭގެ ތެރެއިން ކޮން ސްކޫލެއް ކަމެއް އަދި ނުނިންމަ އެވެ.

ވަގުތީ ގޮތުން ދަރިވަރުން ބަދަލުކުރި ނަމަވެސް އެޑިޔުކޭޝަނުން ބުނީ އަރަބިއްޔާގެ އިމާރާތަށް ދިމާވެފައިވާ މައްސަލަތައް ހައްލުކުރަން ސްޓްރަކްޗަރަލް އެސެސްމަންޓުގެ ރެކޮމެންޑޭޝަނުގައި ބުނާ ކަންކަން ކުރާނެ ކަމަށެވެ. އަދި އިމާރާތަށް ދިމާވެފައިވާ މައްސަލަތައް ހައްލުކުރަން މަސައްކަތް ކުރާނެ ކަމުގެ ޔަގީންކަން ދެމުން މިނިސްޓްރީން ބުނީ އެ އިމާރާތް އަބަދުވެސް ހާއްސަވާނީ އަރަބިއްޔާއަށް ކަމަށެވެ.

އަރަބިއްޔާ ސްކޫލަކީ އަރަބި މީޑިއަމަށް ކިޔަވައިދޭން މާލޭގައި ހުންނަ ހަމައެކަނި ސްކޫލެވެ.