ހިޔާ ފްލެޓްތަކަށް މީޑިއާނެޓްގެ ހިދުމަތް ދޭން ފަށައިފި އެވެ.

ހުޅުމާލެ ދެ ވަނަ ފިޔައްވައްސަށް މީޑިއާނެޓްގެ ހިދުމަތް ދޭން ފަށާފައި ވަނީ ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)އިން ގާއުމުކޮށްފައިވާ އޯޕަން އެކްސެސް ނެޓްވޯކް ބޭނުންކޮށްގެންނެވެ.

ހުޅުމާލެ ދެ ވަނަ ފިޔަވަހީގައި ދިރިއުޅޭ ރައްޔިތުންނަށް މި ހިދުމަތް ފޯރުކޮށްދިނުމަށް އެޗްޑީސީ އާއި މީޑިއާނެޓާ ދެމެދު އިއްޔެ ވަނީ އެއްބަސްވުމެއްގައި ސޮއިކޮށްފަ އެވެ.

އެޗްޑީސީގެ އޯޕެން އެކްސެސް ނެޓްވޯކަކީ ޑިޖިޓަލް އިންފްރާސްޓްރަކްޗާއެއްގެ މައިގަނޑު ވިއުގަ އެވެ.

މި ނެޓްވޯކްގެ ޒަރީއާއިން އިންޓަނެޓާއި ޓީވީގެ ހިދުމަތްތައް ފޯރުކޮށްދޭ ފަރާތްތަކަށް އެއް ވިއުގައަކުން ހިދުމަތް ދެވޭނެ އެވެ.

މި ވިއުގައިގެ ސަބަބުން ހިދުމަތް ދިނުމަށް ހޭދަވާ ހަރަދު ކުޑަވެ، ރައްޔިތުންނަށްދެވޭ ހިދުމަތުގެ އަގު ކުޑަވެގެންދާނެ އެވެ. އަދި ގޮންޖެހުންތަކާ ކުރިމަތިނުވެ ފަސޭހަކަމާއެކު އަވަސް ހިދުމަތެއް ރައްޔިތުންނަށް ފޯރުކޮށްދެވޭނެ އެެވެ.

މީގެ އިތުރުން އިންޓަނެޓާ ކޭބަލް ޓީވީގެ ހިދުމަތް ދިނުމަށް ހިދުމަތްދޭ ކުންފުނިތަކަށް އަމިއްލަ އަށް ފައިބާ ކޭބަލް ވަޅުލާން ނުޖެހި ހިދުމަތް ފޯރުކޮށްދެވޭނެ އެވެ.

އެޗްޑީސީން ވަނީ އެކުންފުނީގެ ސްމާޓް ސިޓީ އިނީޝިއޭޓިވްގެ ދަށުން އެ ސަރަހައްދުގައި ގާއިމުކޮށްފައިވާ އޯޕަން އެކްސެސް ނެޓްވޯކްގެ ސަބަބުން މުޖުތަމައުއަށް ބޭނުންވާ ޑިޖިޓަލް ކުރިމަގަށް ވާސިލުވުމުގެ މަގު ފަހިވެގެންދާނެ ކަމަށް ބުނެފަ އެވެ.

މީގެ ފައިދާތަކާއި ތަފާތު ލުއިފަސޭހަތައް ހުޅުމާލޭގަ ދިރިއުޅޭ އާންމު ރަޔިތުންނަށާއި، ވިޔަފާރިތަކަށާއި މުވާސަލާތީ ހިދުމަތްތައްދޭ ފަރާތްތަކަށް ލިބިގެންދާނެ ކަމަށް އެކުންފުނިން ފާހަގަކުރެ އެވެ.