ކޮވިޑުގެ ހަަތަރު ވަނަ ރާޅާ ގުޅިގެން އަޅާފައިވާ ރައްކާތެރިކަމުގެ ފިޔަވަޅުތަކުގެ ސަބަބުން ކުދި ވިޔަފާރިތަކަށް ވަމުންދާ ގެއްލުންތައް ފޫބެއްދުމަށް ބީއެމްއެލް މެދުވެރިކޮށް ކޮވިޑް ރިލީފް ލޯން ދޫކުރަން ސަރުކާރުން ނިންމައިފި އެވެ.
ކޮވިޑު ބަލިމަޑުކަން ކޮންޓްރޯލް ކުރަން މިއަދުން ފެށިގެން މާލެ ހިމެނޭ ގޮތަށް ރާއްޖޭގެ ބައެއް ރަށްރަށުގައި ކާފިއު ހިންގާނެ އެވެ. އަދި ބަލި ކޮންޓްރޯލް ކުރަން އަޅާފައިވާ ފިޔަވަޅުތަކާއި ގުޅިގެން ވިޔަފާރިތަކުގެ އާމްދަނީއަށް ވަނީ އަސަރުކޮށްފަ އެވެ.
ރޭ ބޭއްވި ނޫސްވެރިންގެ ބައްދަލުވުމެއްގައި ވިޔަފާރިތަކަށް ލިބޭ ގެއްލުންތައް ފޫބައްދަން ސަރުކާރުން ދޭން ނިންމާފައިވާ އެހީއާ ގުޅޭގޮތުން ރައީސް އިބްރާހިމް މުހައްމަދު ސޯލިހު ވިދާޅުވީ، އެ ގެއްލުންތަކުން އަރައިގަންނަން މިފަހަރު ވެސް ބީއެމްއެލް މެދުވެރިކޮށް ލުއި ލޯންތަކެއް ކުދި ވިޔަފާރިތަކަށް ދޫކުރަން ނިންމާފައިވާ ކަމަށެވެ.
ރައީސް އިބްރާހިމް މުހައްމަދު ސޯލިހު ކޮވިޑާ ގުޅިގެން ސަރުކާރުން ދޭން ނިންމާފައިވާ އެހީތަކާ ގުޅޭގޮތުން ވާހަކަދައްކަވަނީ -- ފޮޓޯ: ރައީސް އޮފީސް
ރައީސް ސޯލިހު އެ އިޝާރާތްކުރެއްވީ ނިމުނު އަހަރުގެ ނޮވެމްބަރު މަހުން ފެށިގެން ޔޫރަޕިއަން އިންވެސްޓްމަންޓް ބޭންކް (އީއައިބީ)ގެ ފެސިލިޓީއެއްގެ ދަށުން ބީއެމްއެލްއިން ދޫކުރި ލޯނުތަކަށެވެ. ރައީސް ވިދާޅުވީ މިފަހަރު ވެސް 20 މިލިއަން ޔޫރޯ (377 މިލިއަން ރުފިޔާ)ގެ ލޯނު ފެސިލިޓީއެއް ހަމަޖެއްސުމުގެ މަސައްކަތް ކުރެވެމުންދާ ކަމަށެވެ.
ކުރިން މި ލޯނު ދޫކުރީ 3000 މުވައްޒަފުންނަށް ވުރެ މަދުން ތިބޭ ކުންފުނިތަކަށް ގިނަވެގެން 15.42 މިލިއަން ރުފިޔާ އެވެ. އެކަމަކު މިފަހަރުގެ ލޯން ފެސިލިޓީީއާ ގުޅޭ ތަފްސީލެއް އަދި ނުލިބެ އެވެ.
މި ލޯން ފެސިލިޓީއާ ގުޅޭ އިތުރު ތަފްސީލުތައް ކުރިއަށް އޮތް ދުވަސްތަކުގެ ތެރޭގައި ފިނޭންސް މިނިސްޓަރު މުހައްމަދު އަމީރު ހިއްސާކުރައްވާނެ ކަމަށް ރައީސް މައުލޫމާތު ދެއްވި އެވެ.
ކޮވިޑް ރިލީފް ލޯން ދޫކުރުމުގެ އިތުރަށް ވިޔަފާރިތަކުގެ ކަރަންޓު ބިލާއި ފެން ބިލުން 20 ޕަސެންޓުގެ ޑިސްކައުންޓެއް ދިނުމަށް ސަރުކާރުން ވަނީ ނިންމާފަ އެވެ. އަދި އިތުރު ފިޔަވަޅުތަކާ ގުޅޭ މަޝްވަރާތައް ކުރެވި ނިމެމުން އަންނަ ވަރަކަށް ސަރުކާރުން އެ މައުލޫމާތު ހިއްސާކުރަމުން އަންނާނެ ކަމަށް ރައީސް ސޯލިހު ވިދާޅުވި އެވެ.
ނުރައްކާތެރި މިންވަރަކަށް ކޮވިޑް ފެތުރޭތީ ސަރުކާރުން އަޅާފައިވާ ފިޔަވަޅުތަކުގެ ސަބަބުން ބައެއް ކަހަލަ ވިޔަފާރި ހަރަކާތްތައް، ހާއްސަކޮށް ހިދުމަތްދޭ ގިނަ ވިޔަފާރިތައް، ހުއްޓާލަން ޖެހި އެ ވިޔަފާރިވެރިން އަންނަނީ ކަންބޮޑުވުން ފާޅުކުރަމުންނެވެ. އަދި ނިމުނު އަހަރުގެ ތެރޭގައި ލިބުނު ގެއްލުމުން އަރައި ނުގަނެވެނީސް، އިތުރު ދަރަނިތަކެއް ބޮލުގައި އަޅަން ބޭނުންނުވާ ކަމަށް ކުރިން ވާހަކަދެއްކި ބައެއް ވިޔަފާރިވެރިން ބުންޏެވެ.
