ވިލާ ކޮލެޖުގެ 11 ވަނަ އިންޓަނޭޝަނަލް ކޮންފަރެންސް އޮން ސޯޝަލް ރިސާޗް އެންޑް އިނޮވޭޝަން (އައިސީއެސްއާރުއައި 2027) އަންނަ އަހަރުގެ ޖުލައި މަހު ބާއްވަން ތާވަލުކޮށްފި އެވެ.
އެ ކޮލެޖުން ހާމަކޮށްފައިވާ ގޮތުގައި މި ކޮންފަރެންސް އޮންނާނީ ޖުލައި ތިނަކުން ހަތަރަކަށެވެ. ވިލާ ކޮލެޖުގެ އިންސްޓިޓިއުޓް ފޯ ރިސާޗް އެންޑް އިނޮވޭޝަން (އައިއާރުއައި) އިން އިންތިޒާމުކޮށް ކޮންމެ އަހަރަކު ބާއްވާ މި ރިސަރޗް ކޮންފަރެންސަކީ ތައުލީމީ ދާއިރާއާއި، ސިނާއަތްތަކުގެ އިތުރުން މަދަނީ ޖަމިއްޔާތަކުގެ ތަފާތު ފަންތީގެ ބައިވެރިންގެ މެދުގައި އިލްމާއި ތަޖުރިބާ ހިއްސާކުރާ ހަރަކާތެކެވެ.
މި ކޮންފަރެންސްގެ ތެރެއިން މޫސުމަށް އަންނަ ބަދަލުތަކާއި، ވަސީލަތްތައް ބެލެހެއްޓުމާއި، އިޖުތިމާއީ އަދި އިގްތިސާދީ ހަމަހަމަކަމުގެ އިތުރުން ޒިންމާދާރުކަމާއެކު ޓެކްނޮލޮޖީ ބޭނުންކުރުމުގައި ދިމާވާ ގޮންޖެހުންތަކާ ގުޅޭގޮތުން މަޝްވަރާކޮށް އެއްބާރުލުން ދިނުމުގެ ފުރުސަތު ލިބިގެންދާނެ އެވެ.
އަންނަ އަހަރުގެ އަހަރުގެ ކޮންފަރެންސް ކުރިއަށް ގެންދިއުމަށް ހަމަޖެހިފައިވަނީ "ކޯ-ކްރިއޭޓިންގ ޓުމޯރޯ؛ ޕީޕަލް، ޕާޓްނަޝިޕްސް އެންޑް ޕާޕަސްފުލް އިނޮވޭޝަން" މި ޝިއާރުގެ ދަށުންނެވެ.
މި ޝިއާރުގެ ދަށުން ދިރާސާވެރިންނާއި، ތައުލީމީ ދާއިރާގެ ބޭފުޅުންނާއި، ސިޔާސަތު ކަނޑައަޅާ ފަރާތްތަކާއި އެކި ދާއިރާތަކުގެ ފަންނީ ބޭފުޅުންނަށް ދައުވަތު އަރުވަނީ އާންމު ގޮންޖެހުންތަކަށް ހައްލު ހޯދުމަށާއި މާނަހުރި ބަދަލުތަކެއް ގެނައުމަށްޓަކައި އެންމެން ގުޅިގެން މަސައްކަތް ކުރެވޭނެ ގޮތްތައް ހޯދުމަށެވެ. މި ބައްދަލުވުމުގައި ފާހަގަކޮށްލެވޭ ކީނޯޓް ސްޕީކަރުންގެ ވާހަކަދެއްކެވުމާއި، ސިނާއަތުގެ ލޯކަލް އަދި ބައިނަލްއަގުވާމީ ތަޖުރިބާކާރުންގެ ޕެނަލް ޑިސްކަޝަންތައްވެސް ކުރިއަށްދާނެ އެވެ.
ކޮންފަރެންސްގެ ތަފްސީލުތައް ހާމަކުރެއްވި ރަސްމިއްޔާތުގައި ވިލާ ކޮލެޖުގެ ޑެޕިއުޓީ ވައިސް ރެކްޓަރ ޑރ. މުހައްމަދު އާދިލް ވަނީ މިއީ ހައިބްރިޑް ފޯމެޓަށް ކުރިއަށްދާނެ ހަރަކާތެއްކަން އިއުލާން ކުރައްވާފަ އެވެ. އަދި އިތުރު މައުލޫމާތު ހިއްސާކުރެއްވީ އައިސީއެސްއާރުއައިގެ ކޯޑިނޭޓަރު ޑރ. މަމްދޫހާ އިސްމާއީލް އެވެ.
މި ކޮންފަރެންސަށް އެބްސްޓްރެކްޓް ހުށަހެޅުމުގެ ފުރުސަތު އޭޕްރީލް 4، 2027 ގެ ނިޔަލަށް ހުޅުވާލާފައިވާއިރު، ބައިވެރިވާން އެދޭ ފަރާތްތަކަށް ޖޫން 7، 2027 ގެ ނިޔަލަށް އެ ކޮލެޖުގެ ވެބްސައިޓް މެދުވެރިކޮށް ރަޖިސްޓްރީ ކުރެވޭނެ އެވެ.






