ކުރިއަށް އޮތް ހަތަރު ދުވަހު ރާއްޖޭގެ އެކި ސަރަހައްދަށް ބޯކޮށް ވާރޭވެހި ފެންބޮޑުވާނެ ކަމަށް މޯލްޑިވްސް މީޓިއޮރޮލޮޖިކަލް ސާވިސް (މެޓް އޮފީސް) އިން ލަފާކޮށްފި އެވެ.
މެޓް އޮފީސް އިން ބުނީ ހުޅަނގު މޫސުމުގެ ބާރުގަދަވުމާ ގުޅިގެން ނޮވެމްބަރު 7، އިން ފެށިގެން ނޮވެމްބަރު 11، އަށް ރާއްޖޭގެ ބޮޑު ބަޔަކަށް ވިއްސާރަކޮށް، ބައެއް ރަށްތަކަށް ބޯކޮށް ވާރޭވެހި ގުގުރުމުގެ އިތުރުން ފެންބޮޑުވާނެ ކަމަށް ލަފާކުރެވޭ ކަމަށެވެ.
އެންމެ ފަހުގެ މޫސުމީ މައުލޫމާތުތަކަށް ސަމާލުވެ، ރައްކާތެރިކަމުގެ ގޮތުން އަޅަންޖެހޭ ފިޔަވަޅުތައް އެޅުމަށް ހުރިހާ އެންމެންނަށް މެޓް އޮފީހުން ވަނީ އިލްތިމާސްކޮށްފަ އެވެ.
މެޓް އޮފީހުން ބުނީ ނޮވެމްބަރު 6، އިން ހެނދުނު 08:00 އިން ފެށިގެން ނޮވެމްބަރު 7، ގެ ހެނދުނު 08:00 އަށް އެންމެ ގިނައިން ވާރޭވެހުނު ކަމަށް ރެކޯޑު ކުރެވެނީ ގދ. ފަރެސްމާތޮޑާއަށެވެ. އެއީ 104.6 މިލިމީޓަރުގެ ވާރޭ އެވެ.
މެޓުން ވަނީ ހއ. އަތޮޅުން ފެށިގެން އަދ. އަތޮޅަށް ބޯކޮށް ވާރޭވެހުމާއެކު ގުގުރާނެ ކަމަށް ލަފާކޮށް ހެނދުނު 06:30 އިން ފެށިގެން 10:30 އަށް ރީނދޫ އެލާޓް ނެރެފަ އެވެ.
މިދިޔަ 24 ގަޑިއިރު ތެރޭގައި ރާއްޖޭގެ އެކި ހިސާބުތަކަށް ބޯކޮށް ވާރޭވެހުމުގެ ސަބަބުން ބައެއް ރަށްތަކުގައި ވަނީ ފެންބޮޑުވެފަ އެވެ.
