ނިމިދިޔަ އެމްޑީޕީ ސަރުކާރުގައި ލ. ގަމުގައި ތަރައްގީކުރަން ފެށި 100 ހައުސިން ޔުނިޓްގެ މަސައްކަތް ނިމޭއިރުވެސް އެ ހައުސިން ޔުނިޓްތައް ލިބޭ މީހުން ކަނޑަނޭޅޭތީ ކައުންސިލުން ކަންބޮޑުވުން ފާޅުކޮށްފި އެވެ.
އަދަދު ނޫހުން ގެނެސްދޭ ރަށު ނޯޓު ޕްރޮގްރާމުގައި ލ. ގަމުގެ ކައުންސިލް ރައީސް އަފްސަލް ޖައުވަރު ވިދާޅުވީ ހައުސިން ޔުނިޓްތައް ރައްޔިތުންނާ ހަވާލުކުރުމުގެ ޕްރޮސެސް ކައުންސިލުން ކުރިއަށްގެންދަން ފުރުސަތު ދިނުމަށް އެދުނު ކަމަށާއި އެގޮތަށް މިނިސްޓްރީން ބޭނުން ނުވާނަމަ މިނިސްޓްރީން އަމިއްލައަށް ވިޔަސް އެކަން ކުރިއަށްގެންގޮސް ނިންމައި ދިނުމަށް އެދިފައިވާ ކަމަށެވެ.
ނަމަވެސް މިހާތަނަށް ހައުސިން ޔުނިޓްތައް ހަވާލުކުރުމުގެ ޕްރޮސެސް ކުރިއަށްގެންދާނެ ގޮތާ ގުޅޭ އެއްވެސް ތަފްސީލެއް ހައުސިން މިނިސްޓްރީގެ ފަރާތުން ކައުންސިލަށް ނުދޭ ކަމަށް އަފްސަލް ވިދާޅުވި އެވެ.
އެންމެ ފަހުން އަޅުގަނޑުމެން ކައުންސިލުން ކުރި ދަތުރުގައި އަޅުގަނޑުމެން މިނިސްޓްރީއާވެސް ބައްދަލުކުރިން. އެ ބައްދަލުކުރުމުގައިވެސް އަޅުގަނޑުމެން ވަރަށް ބޮޑަށް އެދުނިން މިހާރު ނިމުމަކާ ގާތަކަށް އައިސްފައޭ ހުރީ. އެހެންވީމަ އެ ޕްރޮސެސް އަޅުގަނޑުމެންނާ ހަވާލުކޮށްގެން ކުރިއަށް ގެންދަންވިޔަސް އަޅުގަނޑުމެންނަށް އެންމެ ރަނގަޅޭ،" އަފްސަލް ވިދާޅުވި އެވެ.
"އަދި މިނިސްޓްރީން އެކަން ކުރިއަށްގެންދާ ނަމަވެސް އަޅުގަނޑުމެންނަށް އެންމެ ރަނގަޅޭ. އަޅުގަނޑުމެން ބޭނުންވަނީ ވީހާވެސް އަވަހަށް އެ ހައުސިން ޔުނިޓްތަކަށް ރައްޔިތުންނަށް ބޭނުން ކުރެވޭނެ ގޮތަށް އެ ހަވާލު ކުރެވިގެން ދިޔުމޭ. އެހެންނަމަވެސް އަދިއެއް އޭގެ އެއްވެސް ކަމެއް އަޅުގަނޑުމެންނާ ހިއްސާއެއް ނުކުރޭ."
އަފްސަލް ވިދާޅުވީ ހައުސިން ޔުނިޓްތައް ރައްޔިތުންނަށް ދޫކުރުމުގެ ކަންކަން މިނިސްޓްރީން ކުރިއަށް ގެންދަނީ ކައުންސިލްގެ އެއްވެސް ދައުރެއް ނޯންނަ ގޮތަށް ކަމަށެވެ.
"ކައުންސިލްގެ އެއްވެސް ދައުރެއް ނޯންނަ ގޮތަށް އެކަން ކުރިއަށްގެންދަނީ. އެ ހައުސިންތައް އިއުލާންކުރުން ވެސް އަދި ދިނުމުގެ އެއްވެސް ޕްރޮސެސްއެއް އަޅުގަނޑުމެންނާ ހަވާލެއް ނުކުރޭ ސަރުކާރުންނެއް،" އޭނާ ވިދާޅުވި އެވެ.
ލ. ގަމުގައި 100 ހައުސިން ޔުނިޓް އެޅުމުގެ މަސައްކަތް އެސްޖޭ ކޮންސްޓްރަކްޝަންއާ ހަވާލުކުރުމުން އެ މަޝްރޫއު ފެށީ ޑިސެމްބަރު، 2022 ގަ އެވެ. އެ މަޝްރޫއުގެ 95 ޕަސަންޓު މަސައްކަތް މިހާރު ނިމިފައިވާ ކަމަށް އަފްސަލް ވިދާޅުވި އެވެ.
ޖުމްލަ 84.24 މިލިއަން ރުފިޔާގެ މި މަޝްރޫއުގެ ދަށުން އަޅަނީ 1،000 އަކަފޫޓުގެ 100 ހައުސިން ޔުނިޓެވެ. އޭގެ ކޮންމެ ޔުނިޓެއްގައި ތިން ކޮޓަރި، ތިން ފާހަނަ، ސިޓިން ރޫމް، ބަދިގެ، ކާގެ، ލޯންޑްރީ އަދި ސްޓޯރޫމް ހިމެނެ އެވެ.
މި ޔުނިޓުތަކުގައި ދިރިއުޅޭ ރައްޔިތުންނަށް ހިތްފަސޭހަ މާހައުލެއް ގާއިމުކޮށްދިނުމަށް ޔުނިޓުތައް ވަށައިގެން އަލިކޮށް، ޕާކެއް ގާއިމުކޮށް، ވެހިކަލް ޕާކު ކުރާނެ ޕާކިން ޒޯނެއް ހެދުމަށްވެސް ވަނީ ހަމަޖެހިފަ އެވެ.
