ދިވެހިރާއްޖޭގެ ސުޕްރީމް ކޯޓުގެ ފަނޑިޔާރުކަމަށް ކުރިމަތިލުމުގެ ފުރުސަތު ހުޅުވާލައިފި އެވެ.
ޖުޑީޝަލް ސާވިސް ކޮމިޝަނުން މިއަދު ކުރި އިއުލާނުގައި ބުނީ، އެ ކޯޓުގެ ފަނޑިޔާރުކަމަށް ކުރިމަތިލުމުގެ ސުންގަޑިއަކީ އަންނަ އާދީއްތަ ދުވަހުގެ ހެނދުނު 10:00 ކަމަށެވެ. އެ މަގާމަށް ކުރިމަތިލުމަށް ބޭނުންވާ މީހުންނަށް ޖޭއެސްސީގެ ފަހިރެސް ޕޯޓަލް އިން ނުވަތަ އެ ކޮމިޝަނުގެ ކައުންޓަރަށް ވެސް އެޕްލިކޭޝަން ހުށަހެޅޭނެކަމަށް އެ އިއުލާނުގައި ބުންޏެވެ.
ސުޕްރީމް ކޯޓުގެ ފަނޑިޔާރުކަމަށް ކުރިމަތިލާ ފަރާތްތަކުން ހުށަހަޅަންޖެހޭ ތަކެއްޗާއި އިތުރު މައުލޫމާތު އެ އިއުލާނުގައި ބަޔާންކޮށްފައިވެ އެވެ.
ސުޕްރީމް ކޯޓުގެ ފަނޑިޔާރުކަމަށް ކުރިމަތިލުމުގެ ފުރުސަތު ހުޅުވާލައިފައި މިވަނީ، އެ ކޯޓުގެ ފަނޑިޔާރުކަމުގައި ހުންނެވި، އަލީ ރަޝީދު ހުސެއިން އެ މަގާމުން ރިޓަޔާކުރެއްވުމަށް ހުށާހެޅުއްވުމާ ގުޅިގެންނެވެ. ނަމަވެސް، އޭނާގެ ރިޓަޔާމެންޓާ ގުޅޭގޮތުން ރަސްމީ އިދާރާއަކުން ވަކި އެއްޗެއް އަދި، ހާމައެއް ނުކުރެ އެވެ.
ސުޕްރީމް ކޯޓުގެ ފަނޑިޔާރުކަމުން އަލީ ރަޝީދު ވަކިވުމާއެކު، މި ސަރުކާރު ވެރިކަމަށް އައުމުގެ ކުރިން އެ ކޯޓުގައި ތިއްބެވި ފަނޑިޔާރުންގެ ތެރެއިން، ބަދަލުނުވެ ތިއްބަވާނީ ފަނޑިޔާރު އާއިޝަތު ޝުޖޫން އާއި ޑރ. މުހައްމަދު އިބްރާހިމް އެކަންޏެވެ.
