ސްޕެއިންގެ ވެރިރަށް މެޑްރިޑްގެ ދެކުނުން އޮންނަ އުރުދާ ކައިރީގައި މިދިޔަ ބުދަ ދުވަހު ހިނގި ރޭލު އެކްސިޑެންޓާ ގުޅިގެން، އެ ގައުމުގެ ޓްރާންސްޕޯޓް މިނިސްޓަރު އޮސްކާ ޕުއެންޓޭ މަގާމުން އިސްތިއުފާ ދެއްވައިފި އެވެ. މަދުވެގެން 69 މީހުން މަރުވެ، އެތައް ބަޔަކު ޒަހަމްވި މި ނުރައްކާތެރި ހާދިސާ ހިނގާފައިވަނީ ބާރު ސްޕީޑުގައި ދަތުރުކުރި ރޭލެއް، ހުއްޓިފައި އޮތް ރޭލެއްގެ ފަހަތުން ގޮސް ޖެހިގެންނެވެ.
އޮސްކާ ޕުއެންޓޭ އިސްތިއުފާ ދެއްވިކަން އިއުލާން ކުރެއްވީ، އުރުދާ ކައިރީގައި ހިނގި އެކްސިޑެންޓާ ގުޅޭ ގޮތުން މަޖިލީހުގައި ހެކިބަސް ދެއްވުމަށް ފަހު އެވެ.
މަގާމުން ވަކިވެވަޑައިގަންނަވަމުން ޕުއެންޓޭ ވިދާޅުވީ، ސްޕެއިން ފަދަ ގައުމެއްގެ ޓްރާންސްޕޯޓް މިނިސްޓަރަކަށް، އެއް އަހަރު ދުވަހުގެ ތެރޭގައި މިފަދަ ނުރައްކާތެރި ދެ އެކްސިޑެންޓް ހިނގުމުން މަގާމުގައި ދެމިހުރެވޭނެ އެއްވެސް ގޮތެއް ނެތް ކަމަށެވެ. މިއީ މިދިޔަ ޖެނުއަރީ މަހު އެ ރޭލު ދަތުރުކުރާ ލައިނުގައި ހިނގި އެކްސިޑެންޓެއްގައި 46 މީހުން މަރުވި ހާދިސާއަށް އިޝާރާތް ކުރައްވައި އޭނާ ދެއްކެވި ވާހަކައެކެވެ.
މިދިޔަ ހަފުތާގައި ހިނގި މި އެކްސިޑެންޓަކީ ޔޫރަޕްގެ ފަހުގެ ތާރީޚެއްގައި ހިނގި އެންމެ ނުރައްކާތެރި އެއް ރޭލު އެކްސިޑެންޓެވެ. އަދި މިއީ 2013 ވަނަ އަހަރަށް ފަހު ސްޕެއިންގައި ހިނގި އެންމެ ބޮޑު ރޭލު ހާދިސާ ވެސް މެއެވެ.
އަންގާރަ ދުވަހުގެ ރޭ މަޖިލީހުގައި ބޭއްވި ދިގު ސެޝަނެއްގައި، ރޭލު ދަތުރުފަތުރުގެ ސަލާމަތީ ކަންކަން ވަރުގަދަ ކުރުމަށް އަޅާނެ އާ ފިޔަވަޅުތަކުގެ ތަފްސީލު ދެއްވުމަށް ފަހު، އިދިކޮޅު މެންބަރުންގެ ވަރުގަދަ ސުވާލުތަކެއް ކުރިމަތިވެފައި ވަނިކޮށް ޕުއެންޓޭ ވަނީ އޭނާގެ ނިންމުން އިއުލާން ކުރައްވާފަ އެވެ.
އޭނާ އިތުރަށް ވިދާޅުވީ، ޓްރާންސްޕޯޓް މިނިސްޓަރުގެ މަގާމުން އިސްތިއުފާ ދެއްވުމުގެ އިތުރުން، ކުރިއަށް އޮތް އަވަސް އާންމު އިންތިޚާބުގައި ވާދަކުރާ ކެންޑިޑޭޓުންގެ ލިސްޓުން ވެސް އޭނާގެ ނަން އަނބުރާ ގެންދަވާފައިވާ ކަމަށެވެ.
އޮކްޓޯބަރު 28 ގައި ހިނގި މި އެކްސިޑެންޓާ ގުޅިގެން، ޕުއެންޓޭގެ މަގާމާ މެދު ވަގުތުން ސުވާލު އުފެދިގެން ދިޔަ އެވެ.
އިދިކޮޅު މައި ޕާޓީ ކަމަށްވާ ކޮންޒަވޭޓިވް ޕީޕަލްސް ޕާޓީ (ޕީޕީ) އާއި ކަނާތު ފިޔައިގެ ވޮކްސް ޕާޓީގެ އިތުރުން، ސަރުކާރަށް ތާއީދުކުރާ ބައެއް ފަރާތްތަކުން ވެސް ދިޔައީ އޭނާގެ އިސްތިއުފާއަށް ގޮވަމުންނެވެ.
އިދިކޮޅު ފަރާތްތަކުން ބުނަމުން ދިޔައީ، ސްޕެއިންގެ ރައްޔިތުން މިހާރު އިތުބާރު ނުކުރާ އަދި ރައްކާތެރި ނޫން ކަމަށް ގަބޫލުކުރާ ހައި-ސްޕީޑް ރޭލު ނިޒާމުގެ ޒިންމާ މިނިސްޓަރު އުފުލަން ޖެހޭނެ ކަމަށެވެ. ސޯޝަލިސްޓް ބޮޑުވަޒީރު ޕެޑްރޯ ސަންޗޭޒް ވެސް ވަނީ މި ނިޒާމަށް އޮތް އިތުބާރު "ގެއްލިފައިވާ" ކަމަށް އެއްބަސްވެވަޑައިގެންފަ އެވެ.
މީގެ އިތުރުން، އެކްސިޑެންޓް ހިނގަން މެދުވެރިވީ އިންސާނީ ގޯހަކުން ކަމަށް ވިދާޅުވެ، އަމިއްލަ އިހުމާލުން ރެކެން ޕުއެންޓޭ މަސައްކަތް ކުރައްވާ ކަމަށް ބުނެ އިދިކޮޅު ފަރާތްތަކުން އޭނާއަށް ވަރަށް ބޮޑަށް ފާޑުކިޔެވެ.
ނަމަވެސް، މީގެ ދުވަސްކޮޅެއް ކުރިން މަގާމުގައި ދެމިހުންނަވާނެ ކަމަށް ވިދާޅުވުމަށް ފަހު، ކުއްލި ގޮތަކަށް އޭނާ އިސްތިއުފާ ދެއްވުމުން ގިނަ ބަޔަކަށް ވަނީ ހައިރާންކަން ލިބިފަ އެވެ.
މި ރޭލު އެކްސިޑެންޓާއި ޕުއެންޓޭގެ އިސްތިއުފާ މި އައީ ސްޕެއިންގެ ސިޔާސީ މަސްރަހު ވަރަށް ނާޒުކު ދަނޑިވަޅެއްގައި އޮއްވަ އެވެ. އެ ގައުމުގެ އާއްމު އިންތިހާބު އޮންނާނީ ނޮވެމްބަރު 29 ގަ އެވެ.
ސިޔާސީ މުހައްލިލުން ދެކޭ ގޮތުގައި، މި އެކްސިޑެންޓަކީ ސޯޝަލިސްޓް ސަރުކާރަށް އިންތިޚާބުގައި ކުރިމަތިވާނެ ވަރަށް ބޮޑު ހުރަހެކެވެ. އަދި މީގެ ސަބަބުން، ހިޔާލު ހޯދުމުގެ ވޯޓުތަކުން ނާކާމިޔާބުވާނެ ކަމަށް ދައްކާފައިވާ ބޮޑުވަޒީރު ސަންޗޭޒަށް އިންތިޚާބު ކާމިޔާބު ކުރުން އިތުރަށް އުނދަގޫ ވާނެ އެވެ.
ސްޕެއިންގެ ގިނަ ރައްޔިތުން މިހާރު ކުރާ ސުވާލަކީ، ޕުއެންޓޭގެ ފަހުން އެ މަގާމަށް ވަޑައިގަންނަވާ ބޭފުޅަކަށް ގައުމުގެ ރޭލު ނިޒާމަށް އޮތް އިތުބާރު އަލުން ހޯދައިދެވޭނެތޯ އެވެ.
މިދިޔަ ބުދަ ދުވަހު ހިނގި އެކްސިޑެންޓްގައި ހިމެނެނީ 397 ފަސިންޖަރުންނާއެކު ދަތުރުކުރި ސަރުކާރުގެ ރޭލަކާއި، އަމިއްލަ ކުންފުންޏެއް ކަމަށްވާ އިރިއޯ އިން 147 ފަސިންޖަރުންނާއެކު ދަތުރުކުރަނިކޮށް ހުއްޓިފައި އޮތް ރޭލެކެވެ.
މި ހާދިސާ ހިނގަން މެދުވެރިވީ އޮޓޮމެޓިކް ސިގްނަލް ނިޒާމަށް ދިމާވި ކޮމްޕިއުޓަރު މައްސަލައަކާ ގުޅިގެން، އެ ސަރަހައްދުން ދަތުރުކުރި ހުރިހާ ރޭލެއް ހުއްޓުމުންނެވެ.
އެކްސިޑެންޓް ހިނގިތާ މާގިނަ އިރުތަކެއް ނުވަނީސް، ސްޕެއިންގެ މީޑިއާތަކުން ވަނީ ރޭލު ޑްރައިވަރުންނާއި ކޮންޓްރޯލް ސެންޓަރާ ދެމެދު ދެކެވުނު ވާހަކަތަކުގެ އޯޑިއޯ ރެކޯޑިންތަކެއް އާންމުކޮށްފަ އެވެ.
މެޑްރިޑްގެ ކޮންޓްރޯލް ސެންޓަރާއި ދެ ރޭލުގެ ޑްރައިވަރުންނާ ދެމެދު ދެކެވުނު ތިން ރެކޯޑިންއަކުން އެނގޭ ގޮތުގައި، ސަރުކާރުގެ ރޭލަށް ދަތުރުކުރުމުގެ ހުއްދަ ދީފައިވަނީ އޭގެ 25 ކިލޯމީޓަރު ކުރީގައި އަނެއް ރޭލު ހުއްޓިފައި އޮއްވަ އެވެ.
