ސްޕެއިންގައި ކުރިމަތިވެފައިވާ ބޯހިޔާވަހިކަމުގެ މައްސަލަތަކާ ގުޅިގެން މުޅި ގައުމުގައި ބޮޑެތި މުޒާހަރާތަކެއް ފެށުމަށާއި، އަވަސް އިންތިޚާބެއް އިއުލާން ކުރުމަށް މަޖުބޫރުވި ސިޔާސީ ހަލަބޮލިކަމެއް އުފެދުމުގެ އަސްލަކަށްވި އުމުރުން ދުވަސްވީ އަންހެން މީހާ މަރުވެފައިވާ ކަމަށް މެޑްރިޑްގެ ޓެނަންޓްސް ޔޫނިއަނުން ބުނެފި އެވެ.
އުމުރުން 87 އަހަރުގެ މަރީކާމެން އަބަސްކަލް، އޭނާ 70 އަހަރަށް ވުރެ ގިނަ ދުވަހު ދިރިއުޅުނު އެޕާޓްމަންޓުން، ކުލި ބޮޑުވުމުގެ ސަބަބުން ކުލި ނުދެއްކިގެން މިދިޔަ ސެޕްޓެމްބަރު މަހުގެ 23 ވަނަ ދުވަހު ބޭރުކޮށްލާފައިވަނީ ސްޓްރެޗަރެއްގައި އޮއްވައި މަޖުބޫރުންނެވެ.
އެ އެޕާޓްމަންޓްގެ މިލްކުވެރި ކުންފުނިން ފަހުން އޭނާއަށް ކުޑަ ކުއްޔެއްގައި އެނބުރި އައުމުގެ ފުރުސަތު ދިނުމަށް ހުށަހެޅި ނަމަވެސް، އޭރު އޭނާ ހޮސްޕިޓަލުގައި އެޑްމިޓްކޮށްފައި އޮތުމުން އެ އެއްބަސްވުމުގައި ސޮއިކުރެވޭ ގޮތެއް ނުވި އެވެ.
މެޑްރިޑް ޓެނަންޓްސް ޔޫނިއަނުން ނެރުނު ބަޔާނެއްގައި ބުނެފައިވަނީ، މަރީކާމެން މިއަދު މަރުވި ޚަބަރު ހިތާމައާއެކު އިއުލާންކުރާ ކަމަށާއި، އޭނާއަށް ދިމާވި ހާލަތަކީ އެ ގައުމުގެ ތާރީޚު ބަދަލުކޮށްލި ކަމެއް ކަމަށެވެ.
ޔޫނިއަންގެ ތަރުޖަމާނު އެލީސިއާ ޑެލް ރިއޯ ވިދާޅުވީ، މުދަލުގެ އަގު އުފުލުމަށް ކުރާ މަސައްކަތްތަކުގެ ސަބަބުން އިންސާނުންގެ ފުރާނަ ގެއްލެމުންދާ ކަމަށާއި، ކުލީގެ ވިޔަފާރި ކުރާ ފަރާތްތަކުގެ އަމަލުތަކުގެ ސަބަބުން މިއަދު މަރީކާމެންގެ ފުރާނަ ގޮސްފައިވާ ކަމަށެވެ. ނަމަވެސް އޭނާގެ ހަނދާންތައް އަބަދުވެސް ދެމިހުންނާނެ ކަމަށް އޭނާ ވިދާޅުވި އެވެ.
މަރީކާމެން މަރުވި ސީދާ ސަބަބެއް މިހާތަނަށް ހާމަކޮށްފައެއް ނުވެ އެވެ.
އެ ޚަބަރު ޕުއެރްޓާ ޑެލް ސޯލް ސަރަހައްދަށް ލިބުމާއެކު، އެތަނަށް އެއްވެ ތިބި މީހުންނަށް ބޮޑު ސިހުމެއް ލިބި، އޭގެ ފަހުން އޭނާގެ ހަނދާނުގައި ސުކޫތެއް ގެނަ އެވެ.
މެޑްރިޑްގެ މެދުތެރޭގައި އޮންނަ މި މައިދާނަކީ، މިދިޔަ މަހު އޭނާގެ ގެއިން ބޭރުކޮށްލުމާ ގުޅިގެން، ބޯހިޔާވަހިކަމުގެ އަގުތައް ހެޔޮކުރުމަށް ގޮވާލައި އެތައް ހާސް ބަޔަކު ފޭލިގެ ޖަހައިގެން މުޒާހަރާ ކުރަމުންދާ ތަނެވެ.
ބުދަ ދުވަހު އެ ސަރަހައްދު ވެގެންދިޔައީ އޭނާގެ ހަނދާންތައް އާކޮށް، އިހުތިރާމް އަދާކުރާ ތަނަކަށެވެ.
