އުމުރަކީ ހަށިގަނޑުގެ ދުޅަހެޔޮކަމާއި ވަރުގަދަކަމަށް އޮތް ހުރަހެއް ނޫންކަން ސާބިތުކޮށްދިނުމަށްޓަކައި، ޖަޕާނުގެ އުމުރުން 90 އަހަރުގެ ބޮޑީބިލްޑަރު ޓޮޝިސުކޭ ކަނަޒާވާ ސްޕެއިންގެ ކޯސްޓާ ޑެލް މަރެސްމޭގައި ބޭއްވި މުބާރާތެއްގައި ސްޓޭޖަށް އަރައިފި އެވެ.
އިންޓަނޭޝަނަލް ފިޓްނަސް އެންޑް ބޮޑީބިލްޑިން ފެޑެރޭޝަނުން އިންތިޒާމުކޮށްގެން ސަންތާ ސުސާނާގެ އައްސޭރިފަށު ރަށުގައި ބޭއްވި މި މުބާރާތުގައި ކަނަޒާވާ ވާދަކުރީ އޭނާއަށް ވުރެ އެތައް އަހަރެއް ހަގު އެތުލީޓުންނާ އެކު، 50 އަހަރުން މަތީގެ މާސްޓާސް ކެޓަގަރީގަ އެވެ.
ސްޓޭޖަށް އެރުމުގެ ކުރިން ބެކްސްޓޭޖުގައި ކަނަޒާވާ ވަނީ އޭނާއަށް ވުރެ ހަގު ވާދަވެރިންނެކޭ އެއްފަދައިން، އޭނާގެ ޓީމާއެކު ވާމްއަޕް ހަދައި، ސްޓޭޖުގެ އަލީގައި މަސްތައް ދައްކާލުމުގެ ކުރިން ހަށިގަނޑުގައި ސްޕްރޭ ޓޭން ޖަހައި ތައްޔާރުވެފަ އެވެ.
"އަހަރެން ބޭނުންވަނީ އެހެން އެއްވެސް މީހަކު ނުކުރާ ކަހަލަ ކަންކަން ކުރަން އުޅެން. އަދި ހުރިހާ ކަމަކަށް ވުރެ ބޮޑަށް އަހަރެން ބޭނުންވަނީ މުޅި އުމުރަށް ބޮޑީބިލްޑިންގެ ދާއިރާގައި ކުރިއަށްދާން،" ކަނަޒާވާ ބުންޏެވެ.
ކަނަޒާވާ ގަބޫލުކުރާ ގޮތުގައި އޭނާގެ ދިގު އުމުރާއި ހަށިގަނޑުގެ ވަރުގަދަކަމުގެ ސިއްރަކީ މީގެ އެތައް އަހަރެއް ކުރިން ފެށިގެން އޭނާ ގެންގުޅޭ ހަރުދަނާ ކެއުމުގެ އުސޫލުތަކެވެ.
"މިއީ އަހަރެން ދިރާސާކޮށް، އިތުރަށް އުނގެނެން ބޭނުންވާ ކަމެއް. ނަމަވެސް އަހަރެންގެ އުމުރުން 50 އަހަރު ފުރުނީއްސުރެ މަސްތައް ވަރުގަދަ ކުރަމުން މިދަނީ މުޅިން ވެސް ޖަޕާނުގެ ކެއުންތައް ބޭނުންކޮށްގެން. އޭގެ ތެރޭގައި ބްރައުން ރައިސް އާއި، ނައްޓޯ (ފާމެންޓް ކޮށްފައިވާ ސޯޔާ ބީންސް) އަދި މިސޯ ސޫޕް ހިމެނޭ،" އޭނާ ބުންޏެވެ.
އޭނާ އިތުރަށް ބުނީ މިއީ ޖަޕާނުގެ ވަރަށް ސަގާފީ ކެއުމުގެ ގޮތްތަކެއް ކަމަށާއި، އެ ކެއުންތަކުގެ ސަބަބުން އުމުރުން 90 އަހަރު ވީއިރުވެސް އެއްވެސް ބައްޔެއް ނުޖެހި ސަލާމަތްވެފައިވާ ކަމަށެވެ.
މި މުބާރާތުން ވަނައެއް ނުލިބުނު ނަމަވެސް، ކަނަޒާވާ އަދިވެސް ހުރީ މި ކުޅިވަރުގައި އާ ހަރުފަތްތަކަކަށް ދިއުމަށް އަޒުމް ކަނޑައަޅައިގެންނެވެ. އޭނާ ވަނީ ކުޅިވަރުން ރިޓަޔާ ކުރުމުގެ ކުރިން އެންމެ ފަހު ފަހަރަށް މުބާރާތެއްގައި ބައިވެރިވުމުގެ ޕްލޭންތައް ހިއްސާކޮށްފަ އެވެ.
"އަހަރެން މި ވިސްނަނީ އުމުރުން 93 އަހަރުގައި އަދި އެއްފަހަރު މުބާރާތެއްގައި ވާދަކުރަން. އޭގެ ފަހުން ކަންނޭނގެ ރިޓަޔާ ކުރާނީ،" އޭނާ ބުންޏެވެ.
އޭނާ ބުނި ގޮތުގައި އުމުރުން ދުވަސްވާ ވަރަކަށް ހަންގަނޑުގައި ރޫޖެހުން އިތުރުވެ އެވެ. އަދި ޖަޕާނުގައި އާންމުކޮށް ގަބޫލުކުރާ ގޮތުގައި އެގޮތަށް ރޫޖެހުމުން ހަށިގަނޑުގެ ރީތިކަން ގެއްލިގެންދާ ކަމަށް ވެސް އޭނާ ފާހަގަކުރި އެވެ.
ކަނަޒާވާ އުންމީދު ކުރަނީ އޭނާގެ މި ހިތްވަރުގަދަ މަސައްކަތުގެ ސަބަބުން، އުމުރުން ދުވަސްވީ މީހުން ހަރަކާތްތެރިވެ އުޅުމަށާއި އާންމުކޮށް ކަނޑައަޅާފައިވާ ހުދޫދުތަކުން ބޭރަށް ނުކުމެ މަސައްކަތް ކުރުމަށް ހިތްވަރު ލިބިގެންދާނެ ކަމަށެވެ.
"ކަމަކަށް އަޒުމް ކަނޑައަޅައިފި ނަމަ، ކޮންމެ ފަދަ ހާލަތެއްގައި ވެސް އެކަމެއް ނިންމުމުގެ ނަފްސާނީ ހިތްވަރާއި ސާބިތުކަން ހުންނަންވާނެ،" ކަނަޒާވާ ބުންޏެވެ.
އޭނާ ބުނީ އޭނާ ފަދައިން އެހެން މީހުން ވެސް ބުރަކޮށް މަސައްކަތް ކުރުމަށް އެދޭ ކަމަށެވެ. އަދި އެގޮތަށް މަސައްކަތް ކޮށްފި ނަމަ، އުމުރުން ދުވަސްވީ ނަމަވެސް އޭނާ ފަދަ ދުޅަހެޔޮ މީހުން ގިނަވާނެ ކަމަށް ގަބޫލުކުރާ ކަމަށާއި، އޭނާ ބޭނުންވަނީ އެހެން މީހުންނަށް ނަމޫނާ ދައްކާ މީހަކަށް ވާން ކަމަށް ވެސް ކަނަޒާވާ ބުންޏެވެ.
