ސްޕެއިންގެ ސަރުކާރުން ހުށަހެޅި ބޯހިޔާވަހިކަމުގެ އިސްލާހުތައް އިދިކޮޅު ފަރާތްތަކުން ބޭރުކޮށްލުމާ ގުޅިގެން، އެ ގައުމަށް ކުރިމަތިވެފައިވާ ބޯހިޔާވަހިކަމުގެ މައްސަލައަށް އަވަސް ހައްލެއް ހޯދުމަށް ގޮވާލައި ހޮނިހިރު ދުވަހު އެތައް ހާސް ބަޔަކު މެޑްރިޑާއި ސްޕެއިންގެ އެހެން ސިޓީތަކުގެ މަގުތަކަށް ނުކުމެ މުޒާހަރާކޮށްފި އެވެ.
މެޑްރިޑުގައި ދިރިއުޅޭ އުމުރުން 87 އަހަރުގެ އަންހެނަކު އޭނާ ދިރިއުޅޭ ގެއިން ނެރުނު މައްސަލަ އާއި ބޯހިޔާވަހިކަމުގެ އެހެނިހެން މައްސަލަތަކާ ގުޅިގެން އާންމުންގެ މެދުގައި އުފެދިފައިވާ ނުރުހުމަށް ހައްލެއް ހޯދުމަށް ސަރުކާރުން އެކުލަވާލި ބިލު ހުކުރު ދުވަހު ޕާލަމެންޓުން ބޭރުކޮށްލުމާ ގުޅިގެން، މުޒާހަރާގެ ބައިވެރިން ވަނީ ގައުމީ ފެންވަރުގައި ހަޅުތާލެއް ކުރުމަށް ގޮވާލާ ބޯޑުތައް އުފުލާފަ އެވެ.
މެޑްރިޑުގައި ކުރިއަށްދިޔަ މުޒާހަރާގައި ބައިވެރިވި އުމުރުން 26 އަހަރުގެ ނަންޑޯ ޑި އަންގޫލޯ ބުނީ މިއީ ވަރަށް ލަދުވެތި ކަމެއް ކަމަށެވެ. އަދި މިއިން ދޭހަވަނީ ސިޔާސީ ޕާޓީތަކުން ރައްޔިތުން ބޭނުންވާ ގޮތަށް އަމަލުކުރުމުގެ ބަދަލުގައި، ރައްޔިތުން ސިޔާސީ ޕާޓީތަކަށް ދޫދޭން ޖެހޭކަން ކަމަށާއި، މިގޮތަށް މިކަން ކުރިއަށް ނުގެންދެވޭނެ ކަމަށް އޭނާ ބުންޏެވެ.
ބޯހިޔާވަހިކަމުގެ ބިލު ފާސްނުވުމާ ގުޅިގެން، ސްޕެއިންގެ ބޮޑުވަޒީރު ޕެޑްރޯ ސަންޗޭޒް އަންނަ ނޮވެމްބަރު މަހު އަވަސް އިންތިޚާބެއް ބޭއްވުމަށް ގޮވާލެއްވުން އެކަށީގެންވާ ކަމަށް ސްޕެއިންގެ މީޑިއާތަކުން ހުކުރު ދުވަހު ވަނީ ރިޕޯޓުކޮށްފަ އެވެ. އަދި އިންތިޚާބާ މެދު ގޮތެއް ނިންމެވުމުގެ ކުރިން ހޮނިހިރު ދުވަހުގެ މުޒާހަރާތަކުގެ ވަރުގަދަކަން ބޮޑުވަޒީރު ބައްލަވާނެ ކަމަށް ވެސް ރިޕޯޓުތައް ބުނެ އެވެ.
މި ރިޕޯޓުތަކާ ގުޅޭ ގޮތުން ބޮޑުވަޒީރު ސަންޗޭޒްގެ އޮފީހުން އެއްވެސް އެއްޗެއް ބުނަން ވަނީ އިންކާރުކޮށްފަ އެވެ.
ސްޕެއިންގެ އިރުދެކުނު ސިޓީއެއް ކަމަށްވާ ވެލެންސިއާގައި ހޮނިހިރު ދުވަހު ކުރިއަށްދިޔަ މުޒާހަރާތައް ރޫޅާލުމަށް ފުލުހުން ވަނީ ކަރުނަގޭހާއި ރަބަރު ވަޒަން ބޭނުންކޮށްފަ އެވެ. މި ހަމަނުޖެހުންތަކުގެ ތެރޭގައި މުޒާހަރާގެ ބައިވެރިންނާއި ފުލުހުންނާ ދެމެދު ކުރިމަތިލުންތަކެއް ހިނގާފައިވެ އެވެ.
ވެލެންސިއާގެ މަޝްހޫރު ސަގާފީ ބިނާއެއް ކަމަށްވާ "ސިޓީ އޮފް އާޓްސް އެންޑް ސައިންސަސް" އިމާރާތުގެ ތެރެއަށް މުޒާހަރާގެ 30 އެއްހާ ބައިވެރިން ވަދެގަތް ނަމަވެސް، ފުލުހުން ވަނީ އެމީހުން އެތަނުން ނެރެފަ އެވެ. ސްޕެއިންގެ އެހެން 50 ސިޓީއެއްގައި ކުރިއަށްދިޔަ މުޒާހަރާތައް ނިމިގެންދިޔައީ ސުލްހަވެރިކަމާއެކުގަ އެވެ.
ހޮނިހިރު ދުވަހު މެޑްރިޑުގައި ކުރިއަށްދިޔަ މުޒާހަރާގައި ގާތްގަނޑަކަށް 70،000 މީހުން ބައިވެރިވި ކަމަށް ސްޕެއިންގެ ސަރުކާރުން ވަނީ ހާމަކޮށްފަ އެވެ.
