މާސް ވަށައިގެން ދަތުރުކުރާ ދެ ހަނދުގެ ތެރެއިން އެއް ހަނދުން ސާމްޕަލް ނެގުމަށް ދުނިޔޭގައި ކުރިއަށްގެންދާ ފުރަތަމަ މިޝަންގައި ޖަޕާނުން އުޅަނދެއް ފޮނުވާލުމަށް ތައްޔާރުވެއްޖެ އެވެ.
ސައިންސްވެރިން އުންމީދު ކުރާ ގޮތުގައި ފަސް އަހަރު ދުވަހުގެ މުއްދަތަށް ކުރިއަށްގެންދާ މި މިޝަންގެ ސަބަބުން، މާސްގެ ބޮޑު ހަނދު "ފޯބޯސް" އާއި ކުޑަ ހަނދު "ޑީމޯސް" އުފެދުނު ގޮތުގެ މައުލޫމާތު ލިބިގެންދާނެ އެވެ.
މީގެ އިތުރުން އިރުގެ ނިޒާމުގައި ދިރުން އުފެދުނު ގޮތުގެ މައްޗަށް އަލިކަމެއް ލިބިގެންދާނެ ކަމަށް ވެސް ސައިންސްވެރިން ގަބޫލުކުރެ އެވެ.
ޖަޕާން އެއަރޯސްޕޭސް އެކްސްޕްލޮރޭޝަން އެޖެންސީ (ޖަކްސާ) އިން ޖަޕާނުގެ އައު "އެޗް-3" ރޮކެޓުގައި މި އުޅަނދު އަންގާރަ ދުވަހު ފޮނުވާލުމަށް ހަމަޖެހިފައިވަނީ، އެމެރިކާ އާއި ޗައިނާ ފަދަ ގައުމުތަކުން މާސް އަށް އިންސާނުން ފޮނުވުމަށް ތައްޔާރުވަމުންދާ ދަނޑިވަޅެއްގަ އެވެ.
މާސް އެކްސްޕްލޮރޭޝަން (އެމްއެމްއެކްސް) ޕްރޮޖެކްޓް މެނޭޖަރު ޔަސުހީރޯ ކަވަކަޓްސޫ ވިދާޅުވި ގޮތުގައި، ފޯބޯސް އިން ނަގާ ސާމްޕަލްތަކުގެ އެހީގައި ކުރިމަގުގައި މާސް އަށް ކުރާ އިންސާނީ ދަތުރުތަކުގައި އެ ހަނދު ބޭސްއެއްގެ ގޮތުގައި ބޭނުންކުރުމާ މެދު ސައިންސްވެރިންނަށް މުހިންމު ނިންމުންތަކެއް ނިންމޭނެ އެވެ.
"މާސްގެ ހަނދުތަކަކީ ނުހަނު މުހިންމު ތަންތަނަށް ވީ ނަމަވެސް، މިހާތަނަށް އެ ތަންތަން ފުރިހަމައަށް ދިރާސާ ކުރެވިފައެއް ނުވޭ،" ކަވަކަޓްސޫ ވިދާޅުވި އެވެ. "އެއީ އިރުގެ ނިޒާމުގައި މިހާތަނަށް އެއްވެސް ބަޔަކު އަރާފައި ނުވާ އެންމެ މުހިންމު ފަރުބަދަތަކުގެ ގޮތުގައި ބެލެވިދާނެ."
ޖަޕާނުން އިސްވެ އޮވެ ކުރިއަށްގެންދާ މި ބައިނަލްއަގުވާމީ މިޝަންގައި އެމެރިކާގެ ނާސާ އާއި އެހެނިހެން ގައުމުތަކުގެ ޖައްވީ އިދާރާތަކުން ވަނީ އާލާތްތަކާއި މުވާސަލާތީ އެހީތެރިކަން ފޯރުކޮށްދީފަ އެވެ.
