އަމްސްޓެޑަމް، ނެދަލެންޑްސް (ނޮވެމްބަރު 2) - މެންޗެސްޓާ ޔުނައިޓެޑްގައި މިހާރު މައްސަލައަކަށް ވެފައި ހުރި ކަަންކަން ރަނގަޅުނުކޮށްފިނަމަ އެ ކްލަބަށް ރެލިގޭޝަންގެ ބިރު އެބައޮތް ކަމަށް ޔުނައިޓެޑްގެ ކުރީގެ ކޯޗު، ނެދަލެންޑްސްގެ އެރިކް ޓެން ހާގް ބުނެފި އެވެ.
އިނގިރޭސި ޕްރިމިއާ ލީގުގައި މި ހަފްތާގައި، ޗެލްސީ އަތުން ޔުނައިޓެޑަށް ބަލިވުމާ އެކު، 1988-1989 އަހަރަށް ފަހު ފުރަތަމަ ފަހަރަށް ޔުނައިޓެޑުން މި ވަނީ މޮޅެއް ނުލިބި ޖެހިޖެހިގެން ނުވަ މެޗު ނިންމާލައިފަ އެވެ. މިއީ، މިދިޔަ 40 އަހަރު ތެރޭގައި ޔުނައިޓެޑަށް ލީގުގައި އެންމެ ދަށް ފެށުމެވެ. އަދި، މިދިޔަ 38 އަހަރު ތެރޭ އައި އެންމެ ދަށް ފޯމެވެ. ޗެލްސީ މެޗުގެ ނަތީޖާއާ އެކު ޔުނައިޓެޑް އޮތީ 16 ވަނައިގަ އެވެ. އެއީ، ނުވަ މެޗުން ލިބުނު ހަތް ޕޮއިންޓާ އެކު އެވެ.
ޔުނައިޓެޑް އެންމެ ފަހުން، އިނގިރޭސި ފުރަތަމަ ޑިވިޝަނުން ރެލިގޭޓްވީ، 1974 ވަނަ އަހަރު އެވެ. އިނގިރޭސި ލީގު ޗެމްޕިއަންކަން 20 ފަހަރު ހޯދާފަައިވާ ޔުނައިޓެޑުން އެންމެ ފަަހުން ލީގު ތަށި އުފުލާލީ 2013 ވަނަ އަހަރު އެވެ.
ޔުނައިޓެޑަށް 2022 އިން 2024 އަށް ކޯޗުކޮށްދިން ޓެން ހާގް ބުނީ، މި ވަގުތުގެ ހާލަތަށް ބަލާއިރު، ޔުނައިޓެޑަށް ރެލިގޭޝަނާ ކުރިމަތިލާން ޖެހުން އެއީ އެކަށީގެންވާ ކަމެއް ކަމަށެވެ.
"ޕްރިމިއާ ލީގުގައި އޮތީ ވަރުގަދަ ސްކޮޑުތަކާ އެކު ރަނގަޅު މެނޭޖަރުން، ގޯސް ފަޅި އަކަށް އަރައިގެން ފޯމަށް އަސަރުކޮށްފިއްޔާ ވަަރަށް އުނދަގޫ ހާލަތަކަށް ކުރިމަތިލާން ޖެހޭނެ. ދެން، އެ ހާލަތުން އަރައިގަތުން ވާނީ ވަރަށް އުނދަގޫ ކަމަކަށް،" ޓެން ހާގް ބުންޏެވެ.
މީގެ ދެ އަހަރު ކުރިން، ޔުނައިޓެޑްގައި އޭނާ ހުރިއިރު، އެ ކްލަބްގެ ކަންތައްތަކާ ގުޅޭގޮތުން ވެސް ޓެން ހާގް ވަނީ ވާހަކަ ދައްކައިފަ އެވެ. އޭނާ ހުރިއިރު ޔުނައިޓެޑުން ރަނގަަޅަށް ކަންކަން ކުރުމުގެ ނަތީޖާ ވެސް ފެންނަން އެބައޮތް ކަމަށާއި އެކަމަކު ކުރެވުނު މަސައްކަތް އިތުރަށް ރަނގަޅު ކުރެވޭނެ ކަމަށް ވެސް ޓެން ހާގް ވަނީ ބުނެފަ އެވެ.
"އަހަރެން ޔުނައިޓެޑަށް އައިއިރު އެ ކްލަބް އޮތީ ތަށްޓެއް ނުހޯދައި ހަ އަހަރު ވެފައި. މިހާރު އޮތް ހިސާބު ބަލަމާ. އަހަރެމެން ވެމްބްލީގައި ހަ ފަހަރު ކުުޅުނިން، ދެ ފަހަރު އެފްއޭ ކަޕް ފައިނަލުގައި ވާދަކުރިން. ދެ ތަށި ހޯދިން. ލީގުގެ ތިން ވަނައިގައި ވެސް ނިންމިން. އަހަރެމެން ރަނގަޅަށް ކުޅެ، ރަނގަޅު ފުޓްބޯޅައެއް ވެސް ދައްކައިދިނިން،" ޓެން ހާގް ބުންޏެވެ.
ރަނގަޅަށް ކަަންކަން ދިޔަކަން ފާހަގަކުރުމަށް ފަހު، ޓެން ހާގް ވަނީ އެ ޓީމުގައި ގޯސްކޮށް ދިޔަ ވަގުތުތަކެއްގެ ސަބަބުން އުނދަގޫ ކަންތައްތަކާ ވެސް ކުރިމަތިލާން ޖެހުނު ކަމަށް ބުނެފަ އެވެ.
މިދިޔަ އަހަރު ބަޔާ ލެވަކޫސަންގެ ކޯޗުކަމުން ވަކިކުރި ފަހުން، ޓެން ހާގް ހުރީ އަދި ޓީމަކާ ހަވާލުނުވެ އެވެ. އެ ޓީމާ އެކު، ތިން މެޗަށް ނުކުތް ޓެން ހާގް ވަނީ އެ މެޗުތަކަށް ފަހު، ލެވަކޫސަން ކޯޗުކަމުން ވަކިކޮށްފަ އެވެ. އެއީ، ނަތީޖާ ދަށްވުމާއި ކުޅުމުގެ ވައްޓަފާޅިއާ މެދު ކްލަބްގެ މެނޭޖްމަންޓުން ހިތްހަމަނުޖެހިގެންނެވެ.
