މިއަދަކީ ދިވެހިރާއްޖޭގެ ފަހުރުވެރި ނަސްރުގެ ދުވަހެވެ. މިއީ މި ދިވެހި އިސްލާމީ ބިމުގެ ދިފާއުގައި ދިވެހިން ނުކުމެ، އަމިއްލަ ލެޔާއި ފުރާނައިން މި ގައުމު ދިފާއުކުރި ހިތްވަރުގަދަ އަބްތާލުންގެ ޒިކުރާ އާކުރާ ދުވަހެވެ. އެ ބޭފުޅުންގެ ގުރުބާނީން އަޅުގަނޑުމެންނަށް ދަސްކޮށްދިން އެންމެ އަގުބޮޑު ފިލާވަޅަކީ، މިނިވަންކަމަކީ ހިލޭ ލިބޭ ހަދިޔާއެއް ނޫން ކަމާއި، އެއީ ކޮންމެ ޖީލަކުން ފާރަވެރިވެގެން މެނުވީ ދެމެހެއްޓޭނެ ނިއުމަތެއް ނޫން ކަމެވެ.
ނަމަވެސް، މިއަދު އަޅުގަނޑުމެންގެ މިނިވަންކަމާއި ސިޔާދަތަށް ކުރިމަތިވެފައިވާ ނުރައްކާ އަންނަނީ ބަޑިއާއި ބޮމަކުން ނޫނެވެ؛ އެ ނުރައްކާ ފޯރަމުންދަނީ ތަރައްގީގެ ނަމުގައި ދައްކާ ކުލަގަދަ މަންޒަރުތަކާއި، ސިއްރުން ސޮއިކުރެވޭ އެއްބަސްވުންތަކުގެ ތެރެއިންނެވެ.
މިފަދަ ދުވަހެއް ފާހަގަކުރަމުންދާއިރު، މުޅި ގައުމުގެ ސަމާލުކަން ހުއްޓިފައިވަނީ ދިވެހިންގެ ބޯހިޔާވަހިކަމުގެ ހައްގާ ގުޅުވައިގެން ހިންގާ އެންމެ ބިޔަ މަޝްރޫއު ކަމުގައިވާ "ރަސްމާލެ" އަށެވެ. ދިވެހި ރައްޔިތަކަށް ގޯއްޗެއް ކަނޑާފައި ދިނުމުގެ ކުރިން، ބީލަމަކަށް ލުމެއް ނެތި، އިޒްރޭލުގެ ވާގިވެރިޔާ ކަމަށް ތުހުމަތުކުރެވޭ ޔޫއޭއީގެ ބިލިއަނަރު އަލައްބާރުގެ އީގަލް ހިލްސް ކުންފުންޏަށް 500 ހެކްޓަރުގެ ބިން ދޫކޮށްލަން ނިންމި ނިންމުމަކީ ނުހަނު ކަންބޮޑުވާންޖެހޭ މައްސަލައެކެވެ.
މިއީ ދިވެހި ބިމުގެ ވެލިފުކެއް ވެސް ބޭރު ބަޔަކަށް ނުވިއްކާނެ ކަމަށާއި، ބޭރުގެ ނުފޫޒުން ރާއްޖެ ތޯހިރުކުރާނެ ކަމަށް ވިދާޅުވެ ވެރިކަމަށް ވަޑައިގެންނެވި ރައީސް މުއިއްޒުގެ ވައުދާ މުޅިން ދިމާ އިދިކޮޅު އަމަލެކެވެ.
މިއަށްވުރެ ބޮޑު މައްސަލައެއް އެބަ އޮތެވެ. ރާއްޖޭގެ ބިން ބިދޭސީންނަށް މިލްކުކުރެވޭ ގޮތަށް ކެބިނެޓުން ނިންމައި، ބިލެއް ޑްރާފްޓުކޮށް، އެކަން ސިއްރުކުރުމަކީ ވެރިކަމުގެ އަމާނާތްތެރިކަމާމެދު ސީރިއަސް ސުވާލުތަކެއް އުފެދޭ ކަމެކެވެ.
ގާނޫނުއަސާސީގެ 115 ވަނަ މާއްދާގައި ރައީސުލްޖުމްހޫރިއްޔާގެ މަސްއޫލިއްޔަތުތައް ވަރަށް ސާފުކޮށް ބަޔާންކޮށްފައިވެ އެވެ. އޭގެ ތެރޭގައި ދައުލަތުގެ ސިޔާސަތުތައް ތަންފީޒުކުރުމުގައި އިހުލާސްތެރިވުމާއި، ގައުމުގެ މިނިވަންކަމާއި ސަރަހައްދުގެ ރައްކާތެރިކަން ދެމެހެއްޓުން ހިމެނެ އެވެ. ނަމަވެސް، ގާނޫނުއަސާސީގެ 251 ވަނަ މާއްދާއިން ބޭރުގެ ފަރާތްތަކަށް ބިން މިލްކު ނުކުރެވޭނެ ކަމަށް ސާފުކޮށް ކަނޑައަޅާފައި ވަނިކޮށް، ހުސްނުވާ 99 އަހަރަށް ބޭރު ބަޔަކަށް ރަސްމާލެއިން ބޮޑު ބައެއް ދޫކޮށްލަން ނިންމުމަކީ ގާނޫނުއަސާސީގެ ހުރުމަތް ކަނޑާލުމެވެ.
މިފަދަ ބޮޑު މަޝްރޫއެއް ރައްޔިތުންގެ މަޖިލީހަށް ނާންގައި، އަދި އާންމުންގެ ހިޔާލެއް ނެތި ފެށުމަކީ އިހުލާސްތެރިކަމުގެ ކަންފުޅެއްވެސް ނެތްކަން ހާމަކޮށްދޭ ކަމެކެވެ. ދިވެހިންގެ ފައިސާއިން ހިއްކާ ބިމެއް ހިލޭ ބަޔަކަށް ދިނުމަކީ ބަލައިގަނެވޭނެ ކަމެއް ނޫނެވެ.
މި މަޝްރޫއަށް ތާއީދުކުރާ ފަރާތްތަކުން 65،000 ހައުސިން ޔުނިޓާއި މާލޭގެ ތޮއްޖެހުމަށް އޮތް ހައްލުގެ ވާހަކަ ދެއްކި ނަމަވެސް، އަޅުގަނޑުމެންގެ ގައުމީ އައިޑެންޓިޓީ ބިނާވެފައިވަނީ މިނިވަން މުސްލިމް ދައުލަތެއްގެ ގޮތުގައެވެ. އެއްވެސް ސަރުކާރަކަށް، ގައުމުގެ މިނިވަންކަމަށް ބުރޫއަރާ ފަދަ ސިއްރު އެއްބަސްވުންތައް ހެދުމުގެ މެންޑޭޓެއް ރައްޔިތުން ދީފައެއް ނުވެއެވެ. އިންވެސްޓްމަންޓްތަކަށް މަރުހަބާ ކިޔަންވާނީ ގައުމުގެ ތަޅުދަނޑި ބޭރު މީހުންނާ ހަވާލުނުކޮށެވެ. ރަސްމާލެ ޑީލަކީ މަޖިލީހާއި މިނިވަން މުއައްސަސާތަކުން ތަހުގީގުކޮށް ރައްޔިތުންނަށް ހާމަކޮށްދޭންޖެހޭ ކަންކަމެވެ.
ނަސްރުގެ ދުވަހުގެ އަބްތާލުން ގައުމުގެ މިނިވަންކަން ހޯދައިދިނީ ސިއްރު އެއްބަސްވުންތަކެއްގެ ތެރެއިންނެއް ނޫނެވެ. އެހެންކަމުން، ސިފައިންނާއި ފުލުހުންގެ އެންމެ އިސް ވާޖިބަކީ ވަކި ސަރުކާރެއްގެ ސިޔާސީ މަންފާއަށްވުރެ މަތީގައިވާ ގައުމީ މަސްލަހަތާއި ގާނޫނުއަސާސީ ހިމާޔަތްކުރުމެވެ. ހަމައެފަދައިން، ގާނޫނަށް ކިޔަމަންވުމަކީ ލޯ މަރާލައިގެން ހަމައެކަނި "ޔެސް ސަރ" ބުނެގެން ތިބުން ކަމުގައި ނުހަދައި، ދަރީންގެ ދަރީންނަށްޓަކައި މި މި މި ދިވެހި ބިން އޭގެ އަސްލު ގޮތުގައި ހިމާޔާތްކޮށް ފޯރުކޮށްދޭންޖެހެ އެވެ. އެއީ ނަސްރުގެ ދުވަހުގެ ބަތަލުންނަށް އަދާކުރެވޭނެ އެންމެ ބޮޑު އިހުތިރާމެވެ.
