ދިވެހިރާއްޖެ އާއި ފޯޅަވައްސާ ދެމެދުވާ ކަނޑުން ބައެއް ވިއްކައިލި ކަމަށް ބުނާ މައްސަލައިގައި ރާއްޖެއިން އަމަލުކޮށްފައިވާ ގޮތް ބަލައި ފިޔަވަޅު އަޅަން ރައީސް މުހައްމަދު މުއިއްޒު ކޮމިޝަނެއް އުފައްދަވައިފި އެވެ.
ރައީސް އޮފީހުން ބުނީ އެ ކޮމިޝަން އުފެއްދީ ރާއްޖޭގެ ކަނޑުން ބޮޑު ސަރަހައްދެއް ގެއްލިފައިވަނީ ރާއްޖެއިން އަމަލުކޮށްފައިވާ ގޮތުގެ ސަބަބުން ކަމަށް ކަނޑުން އެކަމުގައި އަމަލުކުރާނެ ގޮތެއް ހޯދުމަށް އައްޔަނުކުރި ބޭރުގެ މާހިރުންގެ ރިޕޯޓުތަކުން ލަފާދީފައި ވާތީ، އެކަން ބަލައި ފިޔަވަޅު އެޅުމުގެ ގޮތުން ކަމަށެވެ.
ކޮމިޝަނަށް ރައީސް އައްޔަން ކުރި މެންބަރުން
- އަހުމަދު ޝާކިރު (ކަށިމާ ޝާކިރު)
- އަބްދުލްއަޒީޒް ޔޫސުފް
- އާމިނަތު ޝާފިޔާ އާދަމް
- އަބްދުލްމުހުސިން މުހައްމަދު
- ޑެޕިއުޓީ ކޮމިޝަނާ އޮފް ޕޮލިސް (ރޓޑ) މުހައްމަދު ސާދިގު
- އަހުމަދު އަލީ މަނިކު
- ފާތިމަތު މިންހަތު އިއްޒަތު
އެ ކޮމިޝަނުގެ މަސްއޫލިއްޔަތުތަކުގެ ތެރޭގައި ހަ ކަމެއް ހަމަޖައްސާފައިވެ އެވެ. އެއީ އިޓްލޮސްއަށް މައްސަލަ ހުށަހެޅުމާ ހަމައަށް އެ މައުލޫ އެގޮތަށް ހުށަހެޅި ކުރިއަށް ދިޔުމާއި އެ މައްސަލައިގައި ޖަވާބުދާރީވުމަށްޓަކައި ސީދާގޮތުންނާއި ނުސީދާގޮތުން ލަފާދިން މީހުން އަމަލުކޮށްފައިވާ ގޮތް ބަލައި ތަހުގީގު ކުރުމާއި އެ މީހުންނަށް އިހުތިޔާރާއި ބާރުތައް ލިބިގެންވީ މީހުންގެ ގާނޫނީ އިހުމާލެއް އޮތް ތޯ ބެލުމެވެ.
އޭގެ އިތުރުން، އެ ފަރާތްތަކުގެ މައްޗަށް ގާނޫނީ އިހުމާލެއް އޮތްނަމަ، އެކަންކަން ބަލައި އެ ފަރާތްތަކުގެ ގާނޫ އިހުމާލުގެ ކަންކަން ކަނޑައެޅުމާއި އިޓްލޮސް މައްސަލައާ ގުޅޭ އެންމެހައި ލިޔެކިޔުންތައް ބަލަހައްޓައި ރައްކާކޮށްފައިވާ ގޮތް ތަހުގީގު ކުރުން ވެސް އެ ކޮމިޝަނުގެ ޒިންމާއެއްގެ ގޮތުގައި ހަމަޖައްސައިފައިވެ އެވެ.
އަދި، އިޓްލޮސް މައްސަލައާ ގުޅިގެން ޒިންމާކުރުވަންޖެހޭ ފަރާތްތަކާމެދު އަޅާނެ ފިޔަވަޅުތައް ކަނޑައެޅުމާއި އެފަދަ ކަންކަން ތަކުރާރު ނުވާނެ ގޮތަކަށް ކަންކަން އިންތިޒާމުކުރަން ކޮމިޝަނަށް ފެންނަ ކަންކަން ހުށަހަޅަން ވެސް އެ ކޮމިޝަނުގެ މަސްއޫލިއްޔަތެއްގެ ގޮތުގައި ހަމަޖައްސައިފައިވެ އެވެ.
