ރަސްމާލެ މަޝްރޫއުގެ ދަށުން ބޯހިޔާވަހިކަމަށް އެދުނު މީހުންގެ ތެރެއިން ޝަރުތު ހަމަވާ އެންމެންނަށް އެ ތަނުން ގޯތި ލިބޭނެ ކަމަށް ރައީސް މުހައްމަދު މުއިއްޒު މިރޭ އިއުލާންކުރައްވައިފި އެވެ.
ޕީއެސްއެމްގެ "ނޭޝަން ޗެޓް" ޕްރޮގްރާމުގައި ވާހަކަ ދައްކަވަމުން މުއިއްޒު ވިދާޅުވީ، ސަރުކާރުން ކަނޑައެޅި ހުރިހާ ކެޓަގަރީއަކުން ވެސް ޝަރުތު ހަމަވާ މީހުންނަށް ދޭނެ ވަރަށް އެ ތަނުގައި ޖާގަ އެބައޮތް ކަމަށެވެ. އަދި މި ނިންމެވުން ނިންމެވީ އެޕްލިކޭޝަންތަކުގެ ނަންބަރުތައް ސީދާ ޗެކްކުރެއްވުމަށް ފަހު ކަމަށް އެމަނިކުފާނު ވިދާޅުވި އެވެ.
"މާލެ ރައްޔިތުންގެ ކެޓަގަރީން ވެސް، ދަފްތަރުގެ ކެޓަގަރީން ވެސް، ފަނަރަ އަހަރު ވަންދެން މާލޭގައި އުޅުނު މީހުންގެ ރައްޔިތުންގެ ކެޓަގަރީން ވެސް. މިހެން ގޮސް އަޅުގަނޑުމެން އިޢުލާނުކުރީ ގޯތި ބޭނުންވާ ގޯތިދޭ ކެޓަގަރީތައް. އެ ހުރިހާ ކެޓަގަރީއަކުން ކުރިމަތިލާ ޝަރުތު ހަމަވާ އެންމެންނަށް ގޯތި ލިބޭނެ. ކާކުތޯ ބާކީވީ؟" މުއިއްޒު ވިދާޅުވި އެވެ.
މުއިއްޒު މިހެން ވިދާޅުވީ، ރަސްމާލޭގެ ބިމުން 500 ހެކްޓަރު އީގަލް ހިލްސްއަށް ދިނުމުން އާންމުންގެ ބޯހިޔާވަހިކަމުގެ ފުރުސަތު ހަނިވާނެ ކަމަށް ބުނެ އަޑުއުފުލަމުންދާ ދަނޑިވަޅެއްގަ އެވެ. އެކަން ދޮގުކުރައްވަމުން އެމަނިކުފާނު ވިދާޅުވީ، ރަސްމާލޭން ލިބޭ ޖާގައިގެ އިތުރުން ހުޅުމާލޭގައި އެ ކުންފުނިން އަޅާ 5،000 ފްލެޓު ވެސް މި ދައުރުގައި ރައްޔިތުންނަށް ލިބޭނެ ކަމަށެވެ.
އެ ގޮތުން އާބަން އައިލްގެ ފެނާއި ނަރުދަމާ އަދި ކަަރަންޓު ފަދަ އަސާސީ ހިދުމަތްތައް ވެސް ހިމަނައިގެން، މި 5،000 ހައުސިން ޔުނިޓުގެ މަސައްކަތް 2028 ވަނަ އަހަރުގެ އޯގަސްޓަށް ނިންމައި ހަވާލުކުރެވޭނެ ކަމަށް މުއިއްޒު ވިދާޅުވި އެވެ. އަދި މި ފްލެޓުތައް ހާއްސަކުރާނީ، މުއިއްޒު ވިދާޅުވި ގޮތުގައި، ޒުވާނުންނާއި، ރިސޯޓު މުވައްޒަފުންނާއި މަސްވެރިން ފަދަ އެކި ދާއިރާތަކުގެ މަސައްކަތްތެރިންގެ ތެރެއިން އަދި މިހާތަނަށް ބޯހިޔާވަހިކަމެއް ލިބިފައި ނުވާ މީހުންނަށެވެ.
ރަސްމާލޭގެ އިންވެސްޓްމަންޓްތަކާ ގުޅޭގޮތުން ވާހަކަ ދައްކަވަމުން މުއިއްޒު ވިދާޅުވީ، އެ ބިމުގައި ހިނގާނީ ރާއްޖޭގެ ގާނޫނުއަސާސީ އާއި ގާނޫނުތައް ކަމަށެވެ. އަދި އެ ތަނަކީ އަސްކަރީ ގޮތުންނާއި ގާނޫނު ތަންފީޒުކުރުމުގައި ދިވެހި ފުލުހުންނާއި ދައުލަތުގެ ފުރިހަމަ ބާރު އޮންނާނެ ތަނެއް ކަމަށް ވިދާޅުވި އެވެ.
މީގެ އިތުރުން، ރަސްމާލޭގައި ރަލާއި ކެސީނޯ ފަދަ ކަންކަން މަނާވާނެ ކަމަށާއި ފަސްވަގުތު ބަންގިގޮވާ މިސްކިތްތައް ހުންނާނެ ކަމަށް ވެސް މުއިއްޒު ވިދާޅުވި އަދި ރޯދަމަހު ކެއިންބުއިމުގެ އިންތިޒާމުތައް ވެސް ހުންނާނީ މީހުން ދިރިއުޅޭ ރަށްރަށުގައި އަމަލުކުރާ ގޮތަށް ފޮރުވިގެން ކަމަށް ވިދާޅުވި އެވެ.
"ކުރު ގޮތަކަށް ދަންނަވަންޏާ ރިސޯޓެއްގައި ކަންކަން އޮންނަ ފުޅާމިނަށް ވުރެ ވެސް ލިމިޓެޑޭ އިނގޭތޯ. ލިމިޓެޑްވާ ގޮތަކީ މި ތަނުގައި ރަލެއް ނުވިއްކޭނެ. އޫރު މަހެއް ނުހުންނާނެ. މިތާނގައި ފަސް ވަގުތު ބަންގިގޮވާ މިސްކިތް ހުންނާނެ. ބޭރުގެ އެއްވެސް ފަރާތްތަކެއްގެ ކޮންޓްރޯލް ހިނގާ ގޮތަށް އަދި އެ ނޫން ގޮތަކަށް ވެސް ސްކޫލެއް، ތައުލީމީ މުއައްސަސާއެއް ނޯންނާނެ. އެހެންވީމާ ދެން ކެސިނޯއެއް ވެސް ނުހުންނާނެ." މުއިއްޒު ވިދާޅުވި އެވެ.
އެންމެނަށް ގޯތި ލިބޭނެ ކަމުގެ ޔަގީންކަން ރައީސް ދެއްވިއިރު، ސަރުކާރުގެ ބޯހިޔާވަހިކަމުގެ ސްކީމްގެ ދަށުން ގޯއްޗަށް އެދި 22،500 އަށް ވުރެ ގިނަ ފޯމު ވަނީ ހުށަހަޅައިފަ އެވެ. މި ފޯމުތައް އިވެލުއޭޓުކޮށް ނިންމުމަށްފަހު، ގޯތި ލިބޭ މީހުންގެ ލިސްޓު އަންނަ ޑިސެމްބަރު މަހު އާންމުކުރާނެ ކަމަށް ހައުސިން މިނިސްޓްރީން ވަނީ ބުނެފަ އެވެ.
