ދިވެހިރާއްޖޭގައި އެހެން ދީންތަކުގެ މީހުން ވަޒަންވެރިކުރުވުމުގެ ކުރިން ކަށަވަރުކުރަން ޖަމިއްޔަތުއް ސަލަފުން ހުށަހެޅި ކަންކަމަށް ރިއާޔަތްކުރައްވާނެކަމުގެ ޔަގީންކަން ރައީސް މުހައްމަދު މުއިއްޒު ދެއްވި ކަމަށް އެ ޖަމިއްޔާގެ ތަރުޖަމާނު، ހަސަން މޫސާ ފިކުރީ ވިދާޅުވެއްޖެ އެވެ.
ފިކުރީ އެކްސްގައި ކުރެއްވި ޕޯސްޓެއްގައި ވިދާޅުވީ ރަސްމާލެ މަޝްރޫއުއާ ގުޅޭގޮތުން މިދިޔަ އާދީއްތަ ދުވަހު ސަލަފު ޖަމިއްޔާއިން މުއިއްޒުއާ ބައްދަލުކޮށް އެ ޖަމިއްޔާގެ ހުށަހެޅުންތައް ހިއްސާކުރި ކަމަށެވެ.
"އަދި، އެ ކަންކަމަށް ރިއާޔަތް ކުރައްވާނެކަމުގެ ޔަގީންކަން ރައީސް ވަނީ ދެއްވައިފައި،" ފިކުރީ ވިދާޅުވި އެވެ.
ސަލަފުން މިއަދު ނެރުނު ބަޔާނެއްގައި ސަރުކާރަށް ގޮވާލައިފައި ވަނީ އެހެން ދީންތަކުގެ މީހުން ވަޒަންވެރި ކުރުވުމުގެ ކުރިން އަށް ކަމެއް ކަށަވަރު ކުރުވުމަށެވެ. އެއީ؛
- އިސްލާމީ ޝަހުސިއްޔަތާއި ގައުމީ ސިޔާދަތު ހިމާޔަތް ކުރުން
- ދައުލަތުގެ ސިޔާދަތާއި އިސްތިރާޖީ މިނިވަންކަން ހިމާޔަތް ކުރުން
- އާބާދީގެ އޮނިގަނޑަށް އަންނާނެ ބަދަލުތަކާއި ސަލާމަތީ ނުރައްކާތައް ދިރާސާކުރުން
- ދިވެހި ރައްޔިތުންނަށް އެންމެ މަތީ މަންފާ ލިބޭނެ އިގްތިސާދީ ތަރައްގީއަކަށް އަމާޒުހިފުން
- ދެފުށްފެންނަ ހާމަކަން ބޮޑު ސިޔާސަތެއް ގާއިމް ކުރުން
- ހުޅުވާލެވިފައިވާ އިގްތިސާދެއް އޮތުން އަދި ގައުމީ އަސާސްތަކުގެ މެދުގައި ހަމަހަމަކަން ގާއިމް ކުރުން
- ދާއިމީ މޮނިޓަރިންގެ ނިޒާމެއް ގާއިމް ކުރުން
- އިޖްތިމާއީ އަސަރުތައް ވަޒަން ކުރުން
އެހެން ދީންތަކުގެ މީހުން ރާއްޖޭގައި ވަޒަންވެރިވުމަށް ތާއީދުކޮށް ސަލަފުން މިއަދު ބަޔާނެއް އާންމު ކުރީ އިޒްރޭލާއި ޒަޔަނިސްޓުންނަށް ވާގިވެރިވާ ޔޫއޭއީގެ އީގަލް ހިލްސްއަށް ރަސްމާލެ ވިއްކާލަން ސަރުކާރުން ނިންމި ނިންމުން ދިރާސާ ކުރުމަށްފަހު އެވެ.
ރަސްމާލޭގެ އެއްވެސް ތަނެއް އަދި ދިވެހިރާއްޖޭގެ އެއްވެސް ސަރަހައްދެއްގައި އިޒްރޭލުގެ ރައްޔިތަކަށް ވަޒަންވެރި ނުވެވޭނެ ގޮތެއް ކަށަވަރު ކުރަންޖެހޭ ކަމަށް ސަލަފުގެ ބަޔާނުގައި ބުނެފައިވެ އެވެ. އަދި ރަސްމާލެ މަޝްރޫއިން ދިވެހި ރައްޔިތުންނަށް ބޮޑު މަންފާއެއް ލިބޭނެކަން ކަށަވަރު ކުރަންޖެހޭނެ ކަމަށް ވެސް އެ ޖަމިއްޔާއިން ބުނެފި އެވެ.
އޭގެ އިތުރުން، އެފަދަ މަޝްރޫއުއެއް ކުރިއަށްގެންދިޔުމުގެ ކުރިން ސިޔާސީ ޕާޓީތަކާއި އާންމު ރައްޔިތުންގެ މަޝްވަރާ ވަރަށް ފުޅާ ދާއިރާއެއްގައި ހޯދުމަށް ސަލަފުގެ ބަޔާނުގައި އޮތީ ސަރުކާރަށް ގޮވާލައިފަ އެވެ.
"މިފަދަ ބޮޑު ނިންމުންތަކުގައި ސިޔާސީ ޕާޓީތަކާއި ޖަމިއްޔާ ޖަމާއަތްތަކާއި މުޖްތަމައުގެ އަފުރާދުން ފާޅުކުރާ އިހުލާސްތެރި ހިޔާލާއި މަޝްވަރާ ވީހާ ވެސް ފުޅާ ދާއިރާއެއްގައި ހޯދައި ރައްޔިތުންގެ އިތުބާރު އޮންނާނެ ގޮތަކަށް ކަންކަން ކުރިއަށްގެންދިއުން [ލާޒިމު]،" ސަލަފުގެ ބަޔާނުގައި ބުނެފައިވެ އެވެ.
ރަސްމާލޭ މަޝްރޫއު ކުރިއަށްދާނެ ގޮތް މިހާތަނަށް ހާމަވެފައިނުވާ ކަމަށް ވެސް ސަލަފުގެ ބަޔާނުގައި ފާހަގަކޮށްފައިވެ އެވެ.
"މަޝްރޫއުގެ އަމަލީ އަދި ގާނޫނީ ތަފުސީލުތައް ފުރިހަމައަށް ކަށަވަރުވެގެންދާނީ އެ އެއްބަސްވުމާއި ކަމާ ބެހޭ ގާނޫނު ވުޖޫދުވުމުން،" ސަލަފުން ބުންޏެވެ.
ހަމައެއާއެކު ރަސްމާލޭ މަޝްރޫގެ އެއްބަސްވުންތައް ހާމަކުރަން ވެސް އެ ޖަމިއްޔާއިން ގޮވާލި އެވެ. އަދި އެ ޕްރޮޖެކްޓުގެ ގާނޫނީ އޮނިގަނޑު ފަރުމާ ކުރަންޖެހޭނީ ގައުމީ މަސްލަހަތު އެންމެ އިސްކުރުމަށްފަހު ކަމަށް ސަލަފުން ބުނެފައިވެ އެވެ.
"... އެއްބަސްވުން ދެފުށް ފެންނަ ގޮތެއްގައި ހާމަކޮށް، ރައްޔިތުންގެ މަޝްވަރާއާއެކު އިސްލާމީ އަދި އިޖްތިމާއީ މިންގަނޑުތަކަށް ފުރިހަމައަށް ބޯލަނބާކަން މޮނީޓާކޮށް، ގައުމީ މަސްލަހަތު އެންމެ އިސްކޮށް ރައްކާތެރި ކުރެވޭނެހެން މަޝްރޫއުގެ އެއްބަސްވުންތަކާއި ގާނޫނީ އޮނިގަނޑު ފަރުމާ ކުރުމަށް ދިވެހި ސަރުކާރަށް ޖަމިއްޔަތުއްސަލަފުން އިލްތިމާސް ކުރަން،" އެ ބަޔާނުގައި ބުނެފައިވެ އެވެ.
ސަރުކާރުން ބުނަނީ ރަސްމާލެ ދޫކޮށްލަނީ 99 އަހަރަށް ކަމަށެވެ. އެކަމަކު އަލައްބާރުގެ އީގަލް ހިލްސް ކުންފުނިން ބުނީ ރަސްމާލެއިން ފުރަތަމަ ލިބޭ 99 އަހަރުގެ ކުލީގެ މުއްދަތު ހަމަވުމުގެ ކުރިން އެތަން ވިއްކާލައިފި ނަމަ 99 އަހަރުގެ ކުލީގެ އާ މުއްދަތެއް ފެށޭނެ ކަމަށެވެ.
ދައުލަތުގެ ފައިސާއިން ފުށިދިއްގަރުފަޅު ހިއްކައިގެން ހަދަމުން އަންނަ ރަސްމާލޭގެ 500 ހެކްޓަރު އީގަލް ހިލްސްއަށް ވިއްކާލުމުގެ ކޮމާޝަލް ޓާމްސްގައި ސޮއި ކުރީ ސެޕްޓެމްބަރު 21، ގަ އެވެ. އެ ޕްރޮޖެކްޓުގެ ދާއިމީ އެގްރިމެންޓުގައި ސޮއި ކުރަން މަސައްކަތް ކުރަނީ ނޮވެމްބަރު 11، ގަ އެވެ. އެއީ ރާއްޖޭގެ ޖުމްހޫރީ ދުވަހެވެ.
