ކުޅުދުއްފުށި ސިޓީގެ ވައިގެ ސާފުކަން ހުރި މިންވަރު, ނުވަތަ އެއާ ކޮލިޓީ އިންޑެކްސް 151 އަށް އަރައި، ސިއްހަތަށް ނުރައްކާތެރި މިންވަރަކަށް މި ސިޓީގެ ވައި ނުސާފުވެއްޖެ އެވެ.
ކުޅުދުއްފުށި ސިޓީ ކައުންސިލްގެ ރަސްމީ ވެބްސައިޓުން އާންމުކޮށްފައިވާ ތަފާސްހިސާބުތަކަށް ބަލާއިރު، އެ ސިޓީގެ ވައިގެ ނުސާފުކަން ހުރީ އާންމު ސިއްހަތަށް ބުރޫއަރާ ފަދަ މިންވަރެއްގަ އެވެ.
މިގޮތުން ވައިގެ ތެރޭގައި ހުންނަ ނުސާފު މާއްދާގެ ތެރެއިން ސިއްހަތަށް އެންމެ ބޮޑަށް އަސަރުކުރާ ޕީއެމް, 2.5 ގެ މިންވަރު ވެސް ވަނީ މަތިވެފަ އެވެ.
މިކަމާ ގުޅިގެން މެޓް އޮފީހުން ވަނީ ރާއްޖޭގެ މެދުތެރެއާއި އުތުރުގެ އަތޮޅުތަކަށް ވައި ނުސާފުވެ، ދުންފިނި ބޯވަމުންދާތީ ސަމާލުވާން އެދި އިލްތިމާސެއް ނެރެފަ އެވެ.
މެޓް އޮފީހުން ބުނި ގޮތުގައި، ހުޅަނގު އުތުރުން ޖެހެމުންދާ ވައިގެ ސަބަބުން ރާއްޖޭގެ ސަރަހައްދުތަކުގެ ފެންނަ މިންވަރު (ވިޒިބިލިޓީ) ވަނީ ބޮޑުތަނުން ދަށްވެފަ އެވެ. އަދި ސާފު ދުވަސްތަކުގައި 10 ކިލޯމީޓަރަށްވުރެ ދުރަށް ފެނުނު ނަމަވެސް، ވޭތުވެދިޔަ ދެ ދުވަހު އުތުރުގެ އަތޮޅުތަކަށް ފެންނަ މިންވަރު ވަނީ ދެ ކިލޯމީޓަރަށް ދަށްވެފައިކަމަށް އެ އޮފީހުން ބުނެ އެވެ.
އެއާ ކުއަލިޓީ އިންޑެކްސް 150 އިން މައްޗަށް ދިޔުމުން އާންމުކޮށް ހުރިހާ އެންމެންގެ ސިއްހަތަށް ވެސް އޭގެ ނޭދެވޭ އަސަރު ފޯރާނެ އެވެ. ހާއްސަކޮށް ނޭވާލާ ނިޒާމުގެ ބަލިތައް ހުންނަ މީހުންނާއި، ކުޑަކުދިންގެ އިތުރުން އުމުރުން ދުވަސްވީ މީހުން މިފަދަ ވަގުތުތަކުގައި ބޭރަށް ނުކުމެ އުޅުމުގައި ސަމާލުވުމަށް ސިއްހަތާ ބެހޭ އިދާރާތަކުން އިރުޝާދު ދެއެވެ.
އިރުވަޔާއެކު ރާއްޖޭގައި ކޮންމެ އަހަރަކު ވެސް ވައިނުސާފުވެ އެވެ. އެއީ އުތުރު އިންޑިއާގައި އުފެދޭ ދުންފުސް ވަޔާއެކު ރާއްޖެއާ ހަމައަށް އަންނާތީ އެވެ. އިންޑިއާގެ ވައިނުސާފުވަނީ ވެހިކަލާއި ފެކްޓަރީތަކުގެ ސަބަބުންނެވެ. އަދި ދަނޑުބިން އަންދާތީ ވަރަށް ބޮޑަށް ވައިނުސާފުވެ އެވެ.
