ކުޅުދުއްފުށި ސިޓީގައި ނަފްސާނީ ދުޅަހެޔޮކަމަށް މަސައްކަތްކުރާ ހާއްސަ މަރުކަޒެއް ކަމަށްވާ މަނަސްހަބް" ރަސްމީކޮށް ހުޅުވައިފި އެވެ.
ކުޅުދުއްފުށީ ސިޓީ ކައުންސިލުން އިސްނަގައިގެން ހުޅުވި މި މަރުކަޒު ހުޅުވައިދެއްވީ މޭޔަރު މުހައްމަދު އާތިފު އާއި އޮސްޓްރޭލިއާއިން ދިވެހިރާއްޖެއަށް ކަނޑައަޅުއްވާފައި ހުންނަވާ ހައިކޮމިޝަނަރު ޑޭވިޑް ޖެސަޕެވެ.
މި މަރުކަޒަކީ މުޖުތަމައުގެ ފެންވަރުގައި ނަފްސާނީ ދުޅަހެޔޮކަމަށް ހޭލުންތެރިކަން އިތުރުކުރުމާއި، ނަފްސާނީ ބަލިތަކާ ގުޅޭގޮތުން މުޖުތަމައުގައި ހުންނަ ނުރަނގަޅު ތަސައްވަރުތައް ނައްތާލުމަށް އަމާޒުކޮށްގެން ހުޅުވި މަރުކަޒެކެވެ. އޭގެ އިތުރުން، ނަފްސާނީ އެހީތެރިކަމަށް ބޭނުންވާ މީހުންނަށް ކުރީބައިގައި އެހީތެރިކަމާއި ފަރުވާ ފޯރުކޮށްދިނުމަށް މި މަރުކަޒުން މަގުފަހިކޮށްދޭނެ އެވެ.
މަނަސްހަބް ހުޅުވުމަކީ ކުޅުދުއްފުށި ސިޓީގައި މުޖުތަމައުގެ ފެންވަރުގައި ނަފްސާނީ ދުޅަހެޔޮކަމުގެ ޚިދުމަތްތައް ވަރުގަދަކުރުމަށް އެޅުނު މުހިންމު ފިޔަވަޅެއް ކަމަށް ސިޓީ ކައުންސިލުން ބުނެ އެވެ.
މި މަރުކަޒުގެ ސަބަބުން ނަފްސާނީ ދުޅަހެޔޮކަމަށް އިސްކަންދޭ، އަދި އެކަކު އަނެކަކަށް އެހީތެރިކަން ފޯރުކޮށްދޭ ބަދަހި މުޖުތަމައެއް ބިނާކުރުމަށް ބާރަކަށް ވެގެންދާނެ ކަމަށް ކައުންސިލުން ގަބޫލުކުރެ އެވެ. ހާއްސަކޮށް، ނަފްސާނީ މައްސަލަތަކަށް ފަރުވާ ހޯދުމުގައި ހުރި ގޮންޖެހުންތައް ކުޑަކޮށް، ފަސޭހަކަމާއެކު އެހީތެރިކަން ލިބޭނެ އިންތިޒާމު މި މަރުކަޒުގެ ތެރެއިން ހަމަޖެހިގެންދާނެ އެވެ.
