ސައުދީ އަރަބިއްޔާގެ ޖިއްދާގައި ހުންނަ ރާއްޖޭގެ ކޮންސިއުލޭޓުގެ ކޮންސިއުލް ޖެނެރަލްގެ މަގާމަށް ބަދޫރާ ސައީދު މިއަދު ހަމަޖައްސައިފި އެވެ.
އޭނާއަށް މަގާމުގެ ލިޔުން ހަވާލުކުރީ ފޮރިން މިނިސްޓްރީގައި މިއަދު ބޭއްވި ރަސްމިއްޔާތެއްގަ އެވެ.
ބަދޫރާއަކީ ޖިއްދާގައި ހުންނަ ރާއްޖޭގެ ކޮންސިއުލް ޖެނެރަލްގެ މަގާމު އަދާކުރައްވާ ފުރަތަމަ އަންހެން މީހާ އެވެ. މި މަގާމަށް އައްޔަންކުރުމުގެ ކުރިން އޭނާ ހުންނެވީ ފޮރިން މިނިސްޓްރީގެ ޖޮއިންޓް ސެކްރެޓަރީގެ މަގާމުގަ އެވެ.
ހާރިޖީ ދާއިރާގައި 1988 ވަނަ އަހަރުން ފެށިގެން ހިދުމަތް ކުރައްވަމުން ގެންދަވާ ބަދޫރާއަކީ ޕްރޮޓޮކޯލް، ކޮންސިއުލާ އަދި ދެ ގައުމުގެ ގުޅުންތަކުގެ ދާއިރާއިން ބޮޑު ތަޖުރިބާއެއް ހޯއްދަވާފައިވާ ބޭފުޅެކެވެ. މީގެ ކުރިން އޭނާ ވަނީ ރިޔާދުގައި ހުންނަ ދިވެހި އެމްބަސީގެ މިނިސްޓާ ކައުންސިލަރު އަދި ހެޑް އޮފް ޗާންސަރީގެ މަގާމު ވެސް ފުރުއްވައިފަ އެވެ.
މީގެ އިތުރުން އިންޑިއާގެ ޓްރިވެންޑްރަމްގައި ހުންނަ ދިވެހި ކޮންސިއުލޭޓްގެ ފަސްޓް ސެކްރެޓަރީގެ މަގާމާއި ފޮރިން މިނިސްޓްރީގެ ޑެޕިއުޓީ ޗީފް އޮފް ޕްރޮޓޮކޯލްގެ މަގާމު ވެސް އޭނާ އަދާކުރެއްވި އެވެ.
