ރަސްމާލޭގެ ދެބައިކުޅަ އެއްބައި ޔޫއޭއީގެ އީގަލް ހިލްސްއަށް ދީގެން ކުރިއަށް ގެންދަން ސަރުކާރުން މަސައްކަތް ކުރަމުންދާ މަޝްރޫއު ޕްރޮމޯޓުކުރާ ނޫސްވެރިންނާމެދު ނަފުރަތު އުފައްދައި އިންޒާރުދޭ މައްސަލަ ސީރިއަސް މައްސަލައެއްގެ ގޮތުގައި ތަހުގީގުކޮށްދިނުމަށް އެދި ނޫސްވެރިންގެ ހައްގުގައި މަސައްކަތް ކުރާ މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިން ފުލުހަށް މައްސަލަ ހުށަހަޅައިފި އެވެ.
ސޯޝަލްމީޑިއާގައި އިންޒާރުދެމުން ދަނީ އީގަލް ހިލްސް ކުންފުނީގެ ސްޕޮންސަރުގައި ޔޫއޭއީއަށް ގޮސް އެ ކުންފުނިން ކުރިއަށް ގެންދާ އެކި މަޝްރޫއުތަކާ ގުޅޭ ހަބަރުތައް ގެނެސްދޭ ނޫސްވެރިންނަށެވެ. އޭގެ ތެރެއިން ބައެއް ނޫސްވެރިންނަށާއި އެމީހުންގެ އާއިލާތަކަށް ސޯޝަލްމީޑިއާގައި މަރުގެ އިންޒާރު ވެސް ދީފައިވެ އެވެ.
އެމްޖޭއޭއިން ފުލުހުންނަށް ހުށަހެޅި މައްސަލައިގައި ވަނީ، އެ ނޫސްވެރިންނަށް ބޭނުންވާ ސަލާމަތާއި ރައްކާތެރިކަން ކަށަވަރުކޮށްދިނުމަށް ވެސް ފުލުހުންގެ ކިބައިން އެދިފަ އެވެ.
އެމްޖޭއޭއިން ބުނީ ނޫސްވެރިން މަސައްކަތް ކުރަނީ އެ ނޫސްވެރިއަކު ނިސްބަތްވާ މީޑިއާ އިދާރާއެއްގެ އެޑިޓޯރިއަލް އުސޫލުތަކާއި ސިޔާސަތުތަކާ އެއްގޮތަށް ކަމަށެވެ. އެހެން އެކަން އޮތްއިރު، ވަޒީފާގެ ޒިންމާ އަދާކުރާ ވަކިވަކި ނޫސްވެރިންނާމެދު ނަފުރަތު އުފައްދައި އިންޒާރު ދިނުމަކީ ބަލައިގަނެވޭނެ ކަމެއް ނޫން ކަމަށް އެ ޖަމިއްޔާއިން ބުންޏެވެ.
އެގޮތަށް ދޭ އިންޒާރުތަކުގެ ސަބަބުން ނޫސްވެރިންނާއި އެ މީހުންގެ އާއިލާތަކަށް ބޮޑު ބިރުވެރިކަމެއް ކުރިމަތިވެ އެ ފަރާތްތަކުގެ ސަލާމަތަށް ނުރައްކާވެފައިވާކަމަށް ވެސް އެ ޖަމިއްޔާއިން ބުންޏެވެ.
އެމްޖޭއޭއިން ފުލުހުންނަށް ފޮނުވި ސިޓީގައި ވަނީ މީގެ ކުރިން ވެސް ނޫސްވެރިންނަށް ކުރާ ފުރައްސާރަ މީގެ ކުރިން ވެސް ކަންބޮޑުވާ މިންވަރަށް އިތުރުވަމުން ގޮސްފައިވާކަން ފާހަގަކޮށްފައިވެ އެވެ.
ފުލުހުންނަށް މައްސަލަ ހުށަހެޅުމުގެ އިތުރުން، އެމްޖޭއޭއިން ވަނީ ސްޕޮންސާ ކޮށްގެން ގެނެސްދޭ ކޮންޓެންޓާއި މިނިވަން ނޫސްވެރިކަމުގެ މަސައްކަތްތައް ސާފުކޮށް ވަކިވާނެހެން ގެނެސްދިނުމަށް ރާއްޖޭގެ ހުރިހާ ނޫސްތަކުގެ އެޑިޓަރުންނަށް ގޮވައިލައިފަ އެވެ.
