އިޒްރޭލާއި ޒަޔަނިސްޓުންނަށް ވާގިވެރިޔާ ޔޫއޭއީގެ މުހައްމަދު އަލައްބާރަށް ރަސްމާލެ ވިއްކާލުމާ ދެކޮޅަށް ވެރި ރަށް މާލޭގައި ބޮޑު މުޒާހަރާއެއް ބާއްވަން އިއުލާނު ކުރި "ދިވެހީންގެ ބިން ދިވެހިންނަށް" ހަރަކާތުގެ ޑިމާންޑަކީ ރައްޔިތުންގެ ފެންނަ ނުފެންނަ ވޯޓެއް ބޭއްވުން ކަމަށް މިއަދު ބުނެފި އެވެ.
އެ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ގާނޫނީ ވަކީލު އަލީ ހުސެއިން ވިދާޅުވީ އެ ހަރަކާތުން ކުރާ ޑިމާންޑަކީ ރަސްމާލެ ޑީލާމެދު ރައްޔިތުން ދެކޭ ގޮތް ހޯދަން ފެންނަ ނުފެންނަ ވޯޓަކަށް ދިޔުން ކަމަށެވެ.
"އަޅުގަނޑުމެން މި ވަކާލާތު ކުރަނީ ތިޔަ އެގްރިމެންޓުގައި ސޮއި ކުރުމުގެ ކަންކަން މަޑުޖައްސާލާފައި ރައްޔިތުންގެ ފެންނަ ނުފެންނަ ވޯޓަކަށް ދިޔުމަށް،" އަލީ ހުސެއިން ވިދާޅުވި އެވެ. "ޒަޔަނިސްޓުންނަށް ބިން ދިނީމާ އެއީ ދިވެހިރާއްޖޭގެ ސަރަހައްދަށް އަންނަ ބޮޑު ބަދަލެއް."
އެ މުޒާހަރާ އޮންނާނީ ނޮވެމްބަރު 6، ގައި ކަމަށް އެ ހަރަކާތުގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމެއްގައި ކުރީގެ ހޯމް މިނިސްޓަރު އިމްރާން އަބްދުﷲ އެވެ.
"މިއީކީ ހަމަ ހުރެލާފައި ތަނަކަށް ގޮސް ސިއްރުސިއްރުން ސޮއިކޮށްލާފައި ނިންމާލެވޭނެ ކަމެއް ނޫން. ދިވެހި ރައްޔިތުން ކައިރީގައި ނާހައި ދިވެހި ރައްޔިތުންގެ މުޅި މުސްތަގްބަލް އެހެން ގޮތަކުން ބަދަލެއް ނުކުރެވޭނެ ދިވެހި ރައްޔިތުންގެ ހުއްދައެއް ނެތި،" އިމްރާން ވިދާޅުވި އެވެ.
ސަރުކާރުން ބުނަނީ ރަސްމާލެ ދޫކޮށްލަނީ 99 އަހަރަށް ކަމަށެވެ. އެކަމަކު އަލައްބާރުގެ އީގަލް ހިލްސް ކުންފުނިން ބުނީ ރަސްމާލެއިން ފުރަތަމަ ލިބޭ 99 އަހަރުގެ ކުލީގެ މުއްދަތު ހަމަވުމުގެ ކުރިން އެތަން ވިއްކާލައިފި ނަމަ 99 އަހަރުގެ ކުލީގެ އާ މުއްދަތެއް ފެށޭނެ ކަމަށެވެ.
ދައުލަތުގެ ފައިސާއިން ފުށިދިއްގަރުފަޅު ހިއްކައިގެން ހަދަމުން އަންނަ ރަސްމާލޭގެ 500 ހެކްޓަރު އީގަލް ހިލްސްއަށް ވިއްކާލުމުގެ ކޮމާޝަލް ޓާމްސްގައި ސޮއި ކުރީ ސެޕްޓެމްބަރު 21، ގަ އެވެ. އެ ޕްރޮޖެކްޓުގެ ދާއިމީ އެގްރިމެންޓުގައި ސޮއި ކުރަން މަސައްކަތް ކުރަނީ ނޮވެމްބަރު 11، ގަ އެވެ. އެއީ ރާއްޖޭގެ ޖުމްހޫރީ ދުވަހެވެ.
ރަސްމާލެ ވިއްކާލަން ސަރުކާރުން ޑީލެއް ހެދީ، އެތަނުގެ ވެލިފުކެއް އެންމެ ދުވަހަކަށް ނަމަވެސް ބޭރުގެ ބަޔަކަށް ކުއްޔަށް ނުވަތަ ހިލޭ ވެސް ނުދޭން ރައީސް މުހައްމަދު މުއިއްޒު ވައުދުވެވަޑައިގެންނެވުމަށްފަހު އެވެ.
"އެތަނުން [ރަސްމާލެއިން] ހިއްކާ ކޮންމެ ބިމެއްގެ، ކޮންމެ ވެލިފުކަކީ ދިވެހި ރައްޔިތުންނަށް މިލްކުވާ ވެލިފުކެއް. އެއްވެސް ބޭރު ފަރާތަކަށް އެންމެ ދުވަހަކަށް ވެސް ކުއްޔަށް ދޭން، ނޫނީ ހިލޭ ވެސް ލިބޭނެ ބިމެއްނޫން، ދެން އެތަނުން ހިކިގެން ދާނީކީއެއް،" މުއިއްޒު ވިދާޅުވެފައިވެ އެވެ.
