ޕާކިސްތާނުގެ ވެރިރަށް، އިސްލާމްއާބާދުގައި ހުންނަ އިންޓަނޭޝަނަލް އިސްލާމިކް ޔުނިވާސިޓީން ރައީސް މުހައްމަދު މުއިއްޒުއަށް އޮނަރަރީ ޑޮކްޓަރޭޓުގެ ޝަރަފު މިއަދު އަރުވައިފި އެވެ.
އެ ޔުނިވާސިޓީން މުއިއްޒުއަށް އޮނަރަރީ ޑޮކްޓަރޭޓުގެ ޝަރަފު އަރުވާފައި ވަނީ ޕޮލިޓިކްސް އެންޑް އިންޓަނޭޝަނަލް ރިލޭޝަންސްގެ ދާއިރާއިންނެވެ. އެމަނިކުފާނަށް އެ ޝަރަފު އެރުވީ ޕާކިސްތާނުގެ ބޮޑުވަޒީރު، ޝެހްބާޒް ޝަރީފުގެ ރަސްމީ ގެކޮޅުގަ އެވެ.
މުއިއްޒު ވަނީ އެ ޝަރަފު އެމަނިކުފާނަށް އެރުވުުމުން ޝުކުރުއަދާ ކުރައްވައި، އެ ޝަރަފު ހާއްސަ ކުރައްވަނީ ދިވެހިންނަށް ކަމަށް ވިދާޅުވެފަ އެވެ.
ރަސްމީ ދަތުރެއްގައި މުއިއްޒު ޕާކިސްތާނަށް ވަޑައިގެންނެވީ އިއްޔެ އެވެ. މިއީ ފާއިތުވި 10 އަހަރުދުވަހުގެ ތެރޭގައި ޕާކިސްތާނަށް ރާއްޖޭގެ ރައީސްއަކު ވަޑައިގެންނެވި ފުރަތަމަ ފަހަރެވެ. މީގެ ކުރިން ޕާކިސްތާނަށް އެންމެފަހުން ވަޑައިގެންނެވީ ކުރީގެ ރައީސް އަބްދުﷲ ޔާމީން އަބްދުގައްޔޫމް އެވެ.
ޕާކިސްތާނަށް މުއިއްޒު ވަޑައިގެން މިއަދު ވަނީ ރަސްމީ ބައްދަލުވުންތައް އެ ގައުމާއެކު ކުރިއަށް ގެންގޮސްފަ އެވެ. އެ ބައްދަލުވުންތަކަށްފަހު، ޕާކިސްތާނާއެކު ދިވެހިރާއްޖެއިން ވަނީ 20 ފަހުމުނާމާއެއްގައި ސޮއިކޮށްފަ އެވެ. އޭގެ ތެރޭގައި އަސްކަރީ އެއްބަސްވުމެއް ވެސް ހިމެނެ އެވެ.
ޕާކިސްތާނާއެކު މިއަދު ސޮއި ކުރި އެއްބަސްވުންތައް
- ޓެކްނޮލޮޖީ، ސައިބާ ސެކިއުރިޓީ، އޭއައި، ގެ ދާއިރާއިން އެއްބާރުލުން ދިނުމަށް
- މަސްތުވާތަކެއްޗާ ދެކޮޅަށް މަސައްކަތް ކުރުމަށް
- އިޖްތިމާއީ ރައްކާތެރިކަމާ ގުޅޭ
- ސިއްހީ ދާއިރާއިން އެއްބާރުލުން ދިނުމަށް އަދި އެފްޑީއޭއަށް އެހީތެރިވުމަށް
- ޕާކިސްތާނުން ސިއްހީ ހިދުމަތްތެރިން ހޯދުމަށް
- އަސްކަރީ ގޮތުން ދެ ގައުމުން އެއްބާރުލުން ދިނުމަށް
- މެރިޓައިމް ސެކިއުރިޓި ކޯޕަރޭޝަންގެ ދާއިރާއިން އެއްބާރުލުން ދިނުމަށް
- ދަނޑުވެރިކަމުގެ ދާއިރާއިން އެއްބާރުލުން ދިނުމަށް
- މަސްވެރިކަމުގެ ދާއިރާއިން އެއްބާރުލުން ދިނުމަށް
- ޓެކްނިކަލް އަދި ވޮކޭޝަނަލް ޓްރެއިނިން ދިނުމަށް
- ތައުލީމީ ދާއިރާއިން އެއްބާރުލުން ދިނުމަށް
- ޔޫތު އެންޑް ސްޕޯޓްސް ޑިވެލޮޕްމަންޓުގެ ދާއިރާއިން އެއްބާރުލުން ދިނުމަށް
- ދެ ގައުމުގެ ދެމެދުގައި ކުރާ ވައިގެ ދަތުރުފަތުރު އިތުރު ކުރަން
- ފަތުރުވެރިކަމުގެ ދާއިރާއިން ގުޅުން ބަދަހި ކުރަން
- އާޓްސް، ކަލްޗާ އަދި ހެރިޓޭޖުގެ ދާއިރާއިން ގުޅުން ބަދަހި ކުރަން
- ދެ ގައުމުގެ ޕޮލިސް އެކަޑަމީއިން ސޮއި ކުރި އެމްއޯޔޫ
- ދެ ގައުމުގެ ސިވިލް ސާވިސް ކޮމިޝަނުގެ މެދުގައި ސޮއި ކުރި އެމްއޯޔޫ
- ސިވިލް ސާވިސް ކޮމިޝަނާއި ޕާކިސްތާނުގެ ފެޑެރަލް ޕަބްލިކް ސާވިސް ކޮމިޝަނާ ދެމެދު ސޮއި ކުރި އެމްއޯޔޫ
- ދަނޑުވެރިކަމުން އުފައްދާ ތަކެތީގެ ވިޔަފާރި ކުރން އެސްޓީއޯ އާއީ ޓްރޭޑިން ކޯޕަރޭޝަން ޕާކިސްތާނާ ދެމެދު ސޮއި ކުރި އެމްއޯޔޫ
- ތިމާވެށީގެ ދާއިރާއިން ގުޅުން ބަދަހި ކުރަން
ފަހުމުނާމާތަކުގައި ސޮއިކުރެއްވުމަށްފަހު، ވާހަކަދައްކަވަމުން މުއިއްޒު ވިދާޅުވީ ޝެހްބާޒްއާއެކު ބޭއްވުނު މަޝްވަރާތަކަކީ ވަރަށް ފުޅާ ދާއިރާއެއްގައި ކުރިއަށްދިޔަ، ނަތީޖާ ނެރެވޭނެ ފަދަ މަޝްވަރާތަކެއް ކަމަށެވެ.
މި މަޝްވަރާތައް ނިމިގެންދިޔައިރު، ރާއްޖެއާއި ޕާކިސްތާނުގެ ގުޅުން އާ އުސްމިންތަކަކަށް ގެންދިއުމަށް ދެ ގައުމުގެ މެދުގައި އޮތް ސާފު އަޒުމާއި އެއްގޮތް ވިސްނުންތައް ހާމަވެގެން ގޮސްފައިވާ ކަމަށް އެމަނިކުފާނު ވިދާޅުވި އެވެ.
މި ބައްދަލުވުމުގެ ތެރެއިން ދެ ގައުމުގެ ދެމެދުގައި މުހިންމު ދާއިރާތަކަކުން 20 ފަހުމުނާމާއެއްގައި ސޮއިކުރެވިގެން ދިޔުމަކީ ލިބުނު ބޮޑު ކުރިއެރުމެއްގެ ގޮތުގައި މުއިއްޒު ސިފަކުރެއްވި އެވެ.
ހާއްސަކޮށް އިގްތިސާދީ ގޮތުން ދެ ގައުމުގެ ގުޅުން ވަރުގަދަކުރުމަށްޓަކައި، މިހާރު އޮތް 13 މިލިއަން ޑޮލަރުގެ ވިޔަފާރީގެ މުއާމަލާތްތައް ކުރިއަށް އޮތް ދެ އަހަރު ދުވަހުގެ ތެރޭގައި 200 މިލިއަން ޑޮލަރަށް އިތުރުކުރުމަށް އެއްބަސްވެފައިވާ ކަމަށް އެމަނިކުފާނު ވިދާޅުވި އެވެ.
