ކަޝްމީރުގައި މިނިވަން މުސްތަގިއްލު ވަކި ދައުލަތެއް ގާއިމް ކުރަން ޕާކިސްތާނުގެ ބޮޑުވަޒީރު ޝެހްބާޒް ޝަރީފް، ރައީސް މުހައްމަދު މުއިއްޒާއެކު މިއަދު ދެއްވި ރަސްމީ ސްޓޭޓްމަންޓުގައި ގޮވާލައިފި އެވެ.
ޕާކިސްތާނަކީ އިންޑިއާގެ ދުޝަމަން ގައުމެއް ނަމަވެސް އިންޑިއާއަކީ ރާއްޖެއާ އެންމެ ރަހުމަތްތެރި ގައުމެވެ. ޕާކިސްތާނުން ކަޝްމީރުގެ ވާހަކަ ދެއްކެވި ނަމަވެސް މުއިއްޒު ދެއްވި ސްޓޭޓްމަންޓުގައި ކަޝްމީރުގެ ވާހަކަ ދައްކަވާފައެއް ނުވެ އެވެ.
"ކަޝްމީރުގައި ވަކި ދައުލަތެއް ގާއިމް ކުރަން ޕާކިސްތާނުން ދަނީ އެއްބާރުލުން ދެމުން. މި މައްސަލައިގައި އދ. ގެ ސެކިއުރިޓީ ކައުންސިލުން ނިންމާފައިވާ ނިންމުންތަކަށް އިހުތިރާމް ކުރަންޖެހޭނެ،" ބޮޑުވަޒީރު ވިދާޅުވި އެވެ.
ރައީސް މުއިއްޒު ޕާކިސްތާނަށް ކުރައްވާ ދަތުރުގެ ތެރެއިން މިއަދު ދެގައުމުގެ ދެމެދުގައި ވަނީ 20 އެމްއޯޔޫއެއްގައި ސޮއިކޮށްފަ އެވެ. އަސްކަރީ ގޮތުން އަދި ތައުލީމާއި ސިއްހީ ދާއިރާއިން އެއްބާރުލުން ދިނުމުގެ އެއްބަސްވުންތައް ވެސް އޭގެ ތެރޭގައި ހިމެނެ އެވެ.
ރައީސް މުއިއްޒު ވެރިކަމަށް އައީ "އިންޑިއާ އައުޓް" އެޖެންޑާއަކާއެކު އެވެ. އިންޑިއާއާ ދުރަށް ޖެހުމުގެ މަގުޗާޓެއް ވެސް ވެރިކަމަށް ވަޑައިގަތުމަށްފަހު އެމަނިކުފާނު އިއުލާނު ކުރެއްވި އެވެ. ނަމަވެސް މާލީ ގޮތުން ދަތިވުމުން ރައީސް މުއިއްޒު ވަނީ އިންޑިއާއާއެކު އޮތް ގުޅުން ރަނގަޅު ކުރަން މަސައްކަތް ކުރައްވާފަ އެވެ.
އޭގެ ފަހުން އޮކްޓޯބަރު، 2024، ގައި މުއިއްޒު އިންޑިއާއަށް ވަޑައިގެން ބޮޑުވަޒީރު މޯދީއާ ބައްދަލު ކުރެއްވި އެވެ. އަދި ރާއްޖެ އާއި އިންޑިއާގެ ގުޅުން ކުރިއަށްގެންދާނެ ގޮތުގެ އެއްބަސްވުމެއްގައި ދެ ގައުމުން ސޮއި ކުރި އެވެ.
ޕާކިސްތާނާއެކު 20 އެމްއޯޔޫއެއްގައި ދިވެހި ސަރުކާރުން މިއަދު ސޮއިކުރިއިރު، އިންޑިއާ ސަރުކާރުން ވަނީ ރާއްޖެއިން ދައްކަންޖެހޭ 30 ބިލިއަން ރުޕީސްގެ ކަރަންސީ ސްވޮޕެއް ރޯލްއޯވާ ކޮށްދީފަ އެވެ. އަދި އެއީ އިންޑިއާ އަތުން ކުރިން ނެގި ކަރަންސީ ސްވޮޕު ދެއްކި ދުވަހު ދިން ސްވޮޕެކެވެ.
