ޕާކިސްތާނާއި ދިވެހިރާއްޖެއާ ދެމެދު ކުރާ ވިޔަފާރީގެ މުއާމަލާތްތައް ކުރިއަށް އޮތް ދެ އަހަރު ދުވަހުގެ ތެރޭގައި 13 މިލިއަން ޑޮލަރުން 200 މިލިއަން ޑޮލަރަށް އިތުރުކުރަން އެއްބަސްވެފައިވާކަމަށް ޕާކިސްތާނުގެ ބޮޑުވަޒީރު، ޝެހްބާޒް ޝަރީފް ވިދާޅުވެއްޖެ އެވެ.
ޕާކިސްތާނަށް ރައީސް މުއިއްޒު ކުރައްވަމުން ގެންދަވާ ދަތުރުގެ ތެރެއިން މިއަދު ކުރިއަށް ގެންދިޔަ ރަސްމީ ވާހަތަކަށް ފަހު، ވާހަކަދައްކަވަމުން ޝެހްބާޒް ވިދާޅުވީ ޕާކިސްތާނާއި ދިވެހިރާއްޖެއަކީ ވަރަށް ޒަމާންވީ ގާތް ގުޅުމެއް އޮތް ދެ ގައުމު ކަމަށެވެ. ނަމަވެސް، ދެ ގައުމުގެ މެދުގައި އޮތް ވިޔަފާރި ގުޅުމުން އެކަން ނުފެންނަ ކަމަށް އެމަނިކުފާނު ވިދާޅުވި އެވެ.
"އެމަނިކުފާނުގެ ފުރިހަމަ ތާއީދާއެކު އަޅުގަނޑު އިއުލާނުކުރަން، ކުރިއަށް އޮތް ދެ އަހަރު ދުވަހުގެ ތެރޭގައި ދެ ގައުމުގެ ދެމެދުގައި ކުރެވޭ ވިޔަފާރީގެ މިންވަރު 13 މިލިއަން ޑޮލަރުން 200 މިލިއަން ޑޮލަރަށް އިތުރުކުރުމަށް ދެ ފަރާތް ގުޅިގެން ކުރެވެން ހުރި ހުރިހާ މަސައްކަތެއް ކުރާނެ ކަމުގެ ޔަގީންކަން އަރުވަން،" ޝެހްބާޒް ވިދާޅުވި އެވެ.
ޝެހްބާޒް ވިދާޅުވީ ދިވެހިރާއްޖޭގައި ކުރިއަށް ގެންދާ ފަސް މިލިއަން ގަސް އިންދުމުގެ މަޝްރޫއުއަށް ވެސް ޕާކިސްތާނުން އެހީތެރިކަން ފޯރުކޮށްްދިނުމަށް ދެ ގައުމުގެ ދެމެދުގައި އެއްބަސްވެފައިވާ ކަމަށެވެ. އެގޮތުން، 100,000 ޒައިތޫނި ކުރި އާއި އެކި ބާވަތުގެ 100،000 އޮށް ދިވެހިރާއްޖެއަށް ހަދިޔާކުރުމަށް ނިންމާފައިވާ ކަމަށް އެމަނިކުފާނު ވިދާޅުވި އެވެ.
"ދިވެހިރާއްޖޭގައި ފަސް މިލިއަން ގަސް އިންދުމަށް ކުރިއަށްގެންދާ މަޝްރޫއަށް އެހީތެރިކަން ފޯރުކޮށްދިނުމަށް އަޅުގަނޑުމެން މިވަނީ އެއްބަސްވެފައި. އަދި އެ މަޝްރޫއުގެ ދަށުން، 100،000 ޒައިތޫނި ކުރި އާއި، ތަފާތު އެކި ބާވަތްތަކުގެ ގަސްގަހާގެހީގެ 100،000 އޮށް ހަދިޔާކުރުމަށް ނިންމާފައިވާކަން އުފަލާއެކު އިއުލާނުކުރަން،" ޝެހްބާޒް ވިދާޅުވި އެވެ.
އެ ތަކެތި ރާއްޖެއަށް ހަދިޔާކުރާނީ އެއްބަސްވެފައިވާ ގޮތަށް، ވަކި މުއްދަތުތަކެއްގައި ކަމަށް އޭނާ ވިދާޅުވި އެވެ.
މިއަދު ކުރިއަށް ގެންދިޔަ ރަސްމީ ބައްދަލުވުމުގެ ތެރެއިން ޕާކިސްތާނާއި ދިވެހިރާއްޖެއާ ދެމެދު ވަނީ 20 އެއްބަސްވުމެއްގައި ސޮއިކޮށްފަ އެވެ.
