ދިވެހިރާއްޖޭގެ ހާއްސަ އިގްތިސާދީ ސަރަހައްދަށް ވަދެ އުޅުނު މަސް ބޯޓެއް ދިވެހި ކޯސްޓްގާޑުން މިރޭ އަތުލައިގަނެފި އެވެ.
އަތުލައިގަތީ ކޮން ގައުމެއްގެ ބޯޓެއް ކަމެއް އެމްއެންޑީއެފް އިން ނުބުނެ އެވެ. އެ ބޯޓު އަތުލައިގަތީ ހއ. ތުރާކުނުގެ އުތުރުން 46 ނޯޓިކަލް ބޭރުން ހަތް މީހުންނާއެކު އިރުއޮއްސި 6:34 ގަ އެވެ.
"އެމްއެންޑީއެފް ކޯސްޓްގާޑުން ހިންގި ހާއްސަ އޮޕަރޭޝަނެއްގައި ރާއްޖޭގެ ހާއްސަ އިގްތިސާދީ ސަރަހައްދުގައި ގާނޫނާ ހިލާފަށް ހަރަކާތްތެރިވަމުން ދިޔަ ބޭރުގެ މަސްބޯޓެއް، އެމްއެންޑީއެފް ކޯސްޓްގާޑް ޝިޕް އިމާދުއްދީނުގެ ބެލުމުގެ ދަށަށް ގެނެސްފި،" ސިފައިން ބުނެފައިވެ އެވެ.
އެ ބޯޓު ހދ. ކުޅުދުއްފުއްޓަށް ގެންދިޔުމުގެ މަސައްކަތް މިހާރު ދަނީ ކުރަމުންނެވެ.
މަސް ބޯޓު އަތުލައިގަތް އިމާދުއްދީނަކީ ޖުލައި 27، ގައި ކޮމިޝަން ކުރި، ކޯސްޓުގާޑުގެ އެންމެ ޒަމާނީ އެއް ބޯޓެވެ. އެއީ އޮސްޓްރޭލިއާ ސަރުކާރުން ދިން ހަދިޔާއެކެވެ.
