ރަސްމާލޭގެ 500 ހެކްޓަރުގެ ބިން އިޒްރޭލަށް ވާގިވެރިވާ ޔޫއޭއީގެ އީގަލް ހިލްސްއަށް ދީފިނަމަ، ރާއްޖޭގެ އިސްލާމީ ވަހުދަތާއި ސިޔާދަތާއި މިނިވަންކަމަށް ނުރައްކާވެދާނެ ކަމަށް އިލްމުވެރިންގެ ގުޅުމުން ކަނޑައަޅައިފި އެވެ.
ގައުމީ އަދި، ދީނީ އެކިއެކި ކަންކަމުގައި ބަސްބުނުމަށް 150 އަށްވުރެ ގިނަ އިލްމުވެރިން އެކުވެގެން އުފައްދާފައިވާ އިލްމުވެރިންގެ ގުޅުމުން އެކްސްގައި ކުރި ޕޯސްޓެއްގައި ބުނީ ރަސްމާލެ ޕްރޮޖެކްޓާ ގުޅޭގޮތުން އެ އިއްތިހާދުގެ ބޮޑެތި ކަންބޮޑުވުންތަކެއް އެބަހުރި ކަމަށެވެ. އަދި، އެ ކަންބޮޑުވުންތައް އިސްލާމިކް މިނިސްޓަރު، ޑރ. މުހައްމަދު ޝަހީމް އަލީ ސައީދުއާ ހިއްސާކޮށްފައިވާނެ ކަމަށް އެ އިއްތިހާދުން ބުންޏެވެ.
"މި ބައްދަލުކުރެއްވުމުގައި އިލްމުވެރިންގެ ގުޅުމުން ވަނީ ރަސްމާލެ މަޝްރޫއުގެ ސަބަބުން ދިވެހި ރާއްޖޭގައި ބޭރު މީހުން ރަށްވެހިވެ، ރާއްޖޭގެ އިސްލާމީ ވަހުދަތާއި ސިޔާދަތާއި މިނިވަންކަމާއި އިގުތިސާދީ އަމިއްލަވަންތަކަމާއި ދިވެހި ސަގާފަތަށް ކޮށްފާނެ ނުރައްކާތެރި އަސަރުތަކާމެދު ހުރި ކަންބޮޑުވުންތައް ހިއްސާކޮށްފަ،" އިލްމުވެރިންގެ ގުޅުމުން ކުރި ޕޯސްޓުގައި ލިޔެފައިވެ އެވެ.
އެ ކަންބޮޑުވުންތައް ހުށަހަޅާފައިވަނީ އިލްމުވެރިންގެ ގުޅުމުގެ ފަރާތުން ސަރުކާރުގެ ކަމާބެހޭ އެކި ފަރާތްތަކާ ބައްދަލުކޮށް އެއްކުރި މައުލޫމާތުގެ މައްޗަށް ބިނާކޮށް ކަމަށް ވެސް އެ އިއްތިހާދުން ބުންޏެވެ.
އިލްމުވެރިންގެ ގުޅުމުން ހިއްސާކުރި ކަންބޮޑުވުންތައް ރައީސް މުހައްމަދު މުއިއްޒުއާ ހިއްސާކޮށްދެއްވުމަށް މިނިސްޓަރު، ޝަހީމް އަރިހުން އެދުނު ކަމަށް އެ އިއްތިހާދުން ބުންޏެވެ.
ރަސްމާލެ މަޝްރޫއުގެ ސަބަބުން ރާއްޖޭގެ އިސްލާމީ ވަހުދަތާއި މިނިވަންކަމަށް ނުރައްކާވެދާނެ ކަމަށް އިލްމުވެރިންގެ ގުޅުމުން ބުނެފައިވާއިރު، އެ މަޝްރޫއުގެ ދާއިމީ އެއްބަސްވުމުގައި މި އަހަރުގެ ޖުމްހޫރީ ދުވަހު ސޮއި ކުރުމަށް ސަރުކާރުން އަންނަނީ ތައްޔާރުވަމުންނެވެ.
ސަރުކާރުން ރަސްމާލެ ދޫކޮށްލީ ލޭންޑް އިކުއިޒިޝަން ފީއެއް އަދި ބިމު ކުުއްޔެއް ނުނަގާ ގޮތަށެވެ. ރަސްމާލެއިން ސަރުކާރަށް ލިބެނީ، އެ ތަނުގައި އަޅާ އިމާރާތް ޑިވެލޮޕަރު ފުރަތަމަ ފަހަރު ވިއްކާލުމުން ލިބޭ 10 ޕަސެންޓުގެ ފީއަކާއި ގަންނަ ފަރާތުން ދައްކަންޖެހޭ ހަތަރު ޕަސެންޓުގެ ފީއެކެވެ. އެތަނުގެ އޯނާޝިޕް ޓްރާންސްފާ ކުރާ ކޮންމެ ފަހަރަކު ވެސް ހަތަރު ޕަސެންޓުގެ ފީއެއް ލިބޭނެ އެވެ.
ރަސްމާލެ ދޫކޮށްލީ 99 އަހަރަށް ކަމަށް ސަރުކާރުން ބުނި ނަމަވެސް އެގްރިމެންޓު ފްރޭމްކޮށްފައި އޮތް ގޮތުން އެތަން އެއްކޮށް ގެއްލޭނެ އެވެ. ރަސްމާލެއިން ޕްރޮޕަޓީސް ގަންނަ މީހާއަށް ލިބޭ މީހާ އެތަން ވިއްކާލުމުން، އަލުން 99 އަހަރުގެ އާ ލީސް މުއްދަތެއް ފެށޭނެ އެވެ. އަދި ހިބައިން ދިނަސް އަނެއްކާ 99 އަހަރުގެ އާ ލީސް މުއްދަތެއް ފެށޭނެ އެވެ. މިކަން ވަނީ އީގަލް ހިލްސް އިން ޔަގީންކޮށްދީފަ އެވެ.
