ރައްޔިތުންގެ މަޖިލީހުގެ އިންތިހާބާ ދިމާކޮށް ފެބްރުައަރީ 2024، ގައި ސަރުކާރުން ސޮއިކުރި ގއ. ވިލިނގިލީގައި އިންޓަނޭޝަނަލް އެއާޕޯޓެއް ތަރައްގީ ކުރާށާއި އިންޓަގްރޭޓަޑް ޓޫރިޒަމް ޒޯނެއް ތަރައްގީކުރުމުގެ މަޝްރޫއުގެ އަމަލީ މަސައްކަތް މި އަހަރުގެ ނޮވެމްބަރުގެ ނިޔަލަށް ފެށޭނެ ކަމަށް ސަރުކާރުން ބުނެފި އެވެ.
ފެބްރުއަރީ 22، 2024 ގައި ވިލިނގިލީގައި ބޭއްވި ރައީސް މުހައްމަދު މުއިއްޒު ވެސް ބައިވެރިވެވަޑައިގެންނެވި ޖަލްސާއެއްގައި އެ މަޝްރޫއުގެ އެއްބަސްވުމެއްގައި ބެލްޖިއަމްގެ އެންވީ ބެސިކްސް ކުންފުންޏާއެކު ސޮއިކުރި އެވެ. ދިވެހި ސަރުކާރުގެ ފަރާތުން ސޮއިކުރެއްވީ ކޮންސްޓްރަކްޝަން މިނިސްޓަރު އަބްދުالله މުއްތަލިބު އެވެ.
އާދީއްތަ ދުވަހުގެ ރޭ ބޭއްވި "އަހާ ފޯރަމް" ގައި ވާހަކަ ދައްކަވަމުން ޓޫރިޒަމް މިނިސްޓަރު މުހައްމަދު އަމީން ވަނީ އެ މަޝްރޫއު މިހާރު ހަވާލުކޮށްފައިވަނީ އާ ކޮންޓްރެކްޓަރަކާ ކަމަށް ހާމަކުރައްވާފަ އެވެ. ނަމަވެސް، އެއީ ކޮން ކުންފުންޏެއް ކަމެއް ނުބުނެ އެވެ.
"އާ ކޮންޓްރެކްޓަރަކާ އެކީގައި އަޅުގަނޑުމެން ސޮއިކޮށް، މަސައްކަތުގެ އަމަލީ މަސައްކަތް ފެށުމުގެ މަރުހަލާގައި މިހާރު މިއޮތީ. އިރާދުކުރެއްވިއްޔާ އަޅުގަނޑު ގަބޫލުކުރާ ގޮތުގައި އަމަލީ މަސައްކަތް މި އަހަރުގެ ނޮވެމްބަރު މަހު ނިމުމުގެ ކުރިން ފެށޭނެ،" އަމީން ވިދާޅުވި އެވެ.
ވިލިނގިލި އެއާޕޯޓު ތަރައްގީކުރަން ހުށަހެޅީ ބޭރު ކުންފުންޏާއި ޖަނާ ގުޅިގެން ހަދާފައިވާ ޖޭވީއަކުން
ކުރީ ސަރުކާރަށް އައި މި ހުށަހެޅުމުގައި ވަނީ ދެ ފަޅުގެ މުގާބިލުގައި ކްރޮސް ސަބްސިޑީ މޮޑެލްގެ ދަށުން އިންޓަނޭޝަނަލް އެއާޕޯޓަކާއި އިންޓަގްރޭޓަޑް ޓޫރިޒަމް ޒޯނެއް ތަރައްގީކުރަން.
މި މަޝްރޫއުގެ އެއްބަސްވުމުގައި ކުރިން ސޮއިކުރުމަށްފަހު އޭރު ސަރުކާރުން ބުނެފައިވާ ގޮތުގައި ވިލިނގިލީ އެއާޕޯޓާއި ޓޫރިޒަމް މަޝްރޫއަކީ 750 މިލިއަން ޑޮލަރުގެ މަޝްރޫއު އެކެވެ.
ސަރުކާރުން ބުނި ގޮތުގައި އެ ކުންފުންޏާއެކު ސޮއިކުރީ އެއާޕޯޓެއް އަޅަން "ފެންވަރު ބެލުމުގެ ފަހުމުނާމާއެއްގައި" ކަމަށެވެ. ނަމަވެސް، އެ މަޝްރޫއުގެ އެއްވެސް މަސައްކަތެއް މިއަދާ ހަމައަށް ކޮށްފައި ނުވެ އެވެ.
